လါမးရှး(၇)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤတလါအတီၢ်ပူၤ ခီဖျိသုးကီၣ်ကးအသုး အတၢ်မၤသံမၤ၀ီတၢ်တဖၣ်အဃိ ထံကီၢ်ဒီတဘ့ၣ် ပိၥ်မုၣ်(၆၆)ဂၤ ဘၣ်သံ၀ဲဒီး ဘၣ်ဒိ၀ဲ(၆၈)ဂၤအဂ့ၢ် ကီၢ်ပယီၤပိၥ်မုၣ်ကရၢ(BWU)ထုးထီၣ်ပၥ်ဖျါဃၥ်၀ဲ ဖဲလါမးရှး(၆)သီအနံၤန့ၣ်လီၤ.
ခီဖျိသုးကီၣ်ကးအတၢ်ဒုးတဖၣ်အဃိ ကီၢ်ပယီၤဒီတဘ့ၣ်ပိၥ်မုၣ်တဖၣ် ဘၣ်သံ၀ဲကျဲအကလုၥ်ကလုၥ်ဒ်အမ့ၢ် မၤကလံၤကျါတၢ်ဒုးအဃိ (၄၅)ဂၤ, ခးကျိဖးဒိၣ်အဃိ(၁၁)ဂၤ, တၢ်ဒွဲၣ်အူမၤသံအီၤလၢမ့ၣ်အူအဃိ(၂)ဂၤ, ဃိၣ်ပူၤတၢ်တဟ့ၣ်ပျဲဒိးကူစါယါဘျါသးအဃိ(၁)ဂၤ, မ့ၣ်ပိၢ်ယီၢ်အဃိ(၇)ဂၤအဂ့ၢ် စံး၀ဲန့ၣ်လီၤ. ပှၤသံတဖၣ်အကျါ ဖိသၣ်လၢသးနံၣ်(၁၈)နံၣ်ဆူအဖီလၥ် ပၣ်ဃုၣ်၀ဲ(၁၃)ဂၤန့ၣ်လီၤ.
ပှၤလၢသံတဖၣ်အံၤ အိၣ်ဖဲစကဲကီၢ်ခီအပူၤ(၂၁)ဂၤဒီးအအါကတၢၢ်၀ံၤ မ့မ့ၢ်လၢမကွ့ကီၢ်ခီဒီးယိၤဒိၣ်ကီၢ်စဲၣ်ပူၤတခီ သံ၀ဲ(၉)ဂၤစုၥ်စုၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါဖ့ၤဘြူၤအါရံၤအတီၢ်ပူၤ သုးကီၣ်ကးအသုး မၤအါထီၣ်၀ဲကလံၤကျါတၢ်ဒုးတဖၣ်အဂ့ၢ် (BWU) စံး၀ဲန့ၣ်လီၤ.
တၢ်ဂ့ၢ်တၢ်ကျိၤတဖၣ်အံၤ တၢ်ထၢဖှိၣ်အီၤလၢ မံၣ်ဒံၣ်ယၣ်တဖၣ်အအိၣ်ဒီး BWUထၢဖှိၣ်မၤနီၣ်ဃၣ်စရီအဖီခိၣ်လီၤ၀ံၤ တၢ်လီၢ်လၢတၢ်ထၢဖှိၣ်အီၤတန့ၢ်တဖၣ်စ့ၢ်ကီးအိၣ်အဃိ ဟီၣ်ခိၣ်မဲၥ်ဖံးခိၣ်နီၢ်နီၢ်တခီ တၢ်သံနီၣ်ဂံၢ်နီၣ်ဒွးစရီတဖၣ် အါန့ၢ်ဒံးတၢ်ပၥ်ဖျါတ့ၢ်လၢထးသ့အဂ့ၢ် စံး၀ဲန့ၣ်လီၤ.
အပူၤကွံၥ် ၂၀၂၅နံၣ်, လါယနူၤအါရံၤအတီၢ်ပူၤစ့ၢ်ကီး ခီဖျိသုးကီၣ်ကးအသုး အတၢ်မၤသံမၤ၀ီတဖၣ်အဃိ ကီၢ်ပယီၤဒီတဘ့ၣ် ပိၥ်မုၣ်ဘၣ်သံ၀ဲ(၈၆)ဂၤအဂ့ၢ် BWUထုးထီၣ်ပၥ်ဖျါဃၥ်၀ဲန့ၣ်လီၤ.
တၢ်မၤစၢၤထံရူၢ်ကီၢ်သဲးပှၤလီၤဃိၣ်ဖိကရၢ(AAPP) အလါမးရှ(၅)သီအနံၤ တၢ်မၤနီၣ်စရီတဖၣ်အဖီခိၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအတီၢ်ပူၤ ပှၤဟူးဂဲၤလၢဒံၣ်မိၣ်ကခြ့ၣ်စံၣ်ဂ့ၢ်၀ီဒီး ကမျၢၢ်ထံဖိကီၢ်ဖိခဲလၢၥ်ပၥ်ဖှိၣ် (၆၃၈၀)ဂၤ ဘၣ်သံတ့ၢ်၀ဲလံန့ၣ်လီၤ.
