လါမးရှး(၇)သီ,၂၀၂၅နံၣ်
၂၀၂၅နံၣ်, လါမးရှး(၆)သီအနံၤ, ဟါ(၄)နၣ်ရံၣ်အဆၢကတီၢ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ကဘီယူၤဟဲတ့ၢ်မ့ၣ်ပိၢ်ဆူ ကၠီးကွ့သ၀ီလၢအိၣ်ဖဲ ကီၢ်ဆၣ်ဒွဲၣ်လိ, ကီၢ်ရ့ၣ်မုၢ်တြီၢ်ဟီၣ်က၀ီၤအပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုး ဟဲတ့ၢ်လီၤမ့ၣ်ပိၢ်အဃိ ဘၣ်ကၠီးကွ့သီခါဖၠၣ်၀ံၤသီခါတဂၤဘၣ်သံ၀ဲလၢအလီၢ်တဘျီဃီအသိး သီခါအဂၤတဂၤစ့ၢ်ကီး ဘၣ်အစုတခီ၀ံၤတဲၥ်ကွံၥ်၀ဲဒီး တကွဲဖိတဂၤစ့ၢ်ကီး ဘၣ်ဒိအခီၣ်အဂ့ၢ် လီၢ်က၀ီၤဖိစံး၀ဲန့ၣ်လီၤ. သီခါတဂၤလၢ အစုတဲၥ်ကွံၥ်တဂၤတခီ ဘၣ်တၢ်လဲၤဆှၢအီၤဆူ တၢ်ဆါဟံၣ်လံအဂ့ၢ် စံး၀ဲန့ၣ်လီၤ.
ကၠီးကွ့သ၀ီလီၢ်က၀ီၤအပူၤ တၢ်ဒုးကဲထီၣ်သးတအိၣ်ဘၣ်ဒီး သုးကီၣ်ကးအသုး ပညိၣ်ဒုး လီၢ်က၀ီၤကမျၢၢ်အိၣ်ဆိးလီၢ်ကျဲတဖၣ်, တၢ်ဘူၣ်တၢ်ဘါတၢ်သူၣ်ထီၣ်တဖၣ်ဒီး တၢ်သိၣ်လိၣ်ကၠိတဖၣ်လၢ ကလံၤကျါမ့ၢ်ဂ့ၤဒီး ခးကျိဖးဒိၣ်တဖၣ် အိၣ်ထီၣ်ကိးမုၢ်နံၤလီၤအဂ့ၢ် ဂံၢ်ခီၣ်ထံးလီၢ်က၀ီၤတၢ်ကစီၣ်စံး၀ဲန့ၣ်လီၤ.
သုးကီၣ်ကးအသုး ကဘီယူၤဟဲတ့ၢ်လီၤမ့ၣ်ပိၢ်အဃိ သီခါလၢဘၣ်သံ၀ဲၤတဂၤအံၤ သးနံၣ်အိၣ်(၆၂)နံၣ်ဒီး အကဲတ့ၢ်သီခါ(၄၁)နံၣ်လံန့ၣ်လီၤ.
ခီဖျိသုးကီၣ်ကးအသုး ပညိၣ်ဒုးကမျၢၢ်တဖၣ်အဃိ ကၠီးကွ့သ၀ီလီၢ်က၀ီၤဖိတဖၣ် ဘၣ်လဲၤဃ့ၢ်အိၣ်ကဒုလၢ တၢ်လီၢ်လၢအပူၤဖျဲးလီၢ်တဖၣ်အဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
Ref: Salween Press
