လါမးရှး(၆)သီ,၂၀၂၅နံၣ်
ကရ့ၣ်နံၣ်ကီၫ်စဲၣ်,လၢဘီၣ်လခဲကီၫ်ဆၣ်တကပၤ သုးကီၣ်ကးမၤဒုးယၤတၫ်ရဲၣ်တၫ်ကျဲၤအဃိ မီၣ်ခံဟီၣ်က၀ီၤပူၤ ကမျၢၫ်လၢကူၣ်လဲၫ်မၤကၤတၫ်တဖၣ် စးထီၣ်ဖဲလါမးရှး(၄)သီအနံၤန့ၣ် တၫ်သုတသူ နါဖဲ-ဖါဆီကျဲအဂီၫ် ကီၫ်က ရ့ၣ်နံၣ်တၫ်ဘၢၣ်စၢၤပဒိၣ်(IEC),ထံလီၫ်ကီၫ်ပူၤ၀ဲၤကျိၤ ထုးထီၣ်ဘိးဘၣ်ရၤလီၤ၀ဲလီၤ.
သုးကီၣ်ကးန့ၣ် ဟဲထီၣ်လၢသုးကျိၤဟူးဂဲၤ၀ဲအိၣ်အဃိ ကမျၢၫ်တၫ်ဘံၣ်တၫ်ဘၢအဖီခိၣ် ဘၣ်တၫ်ကးတံာ်ကွံာ် တၫ်ဟးထီၣ်က့ၤလီၤအဂ့ၫ် ကီၫ်ကရ့ၣ်နံၣ်တၫ်ဘၢၣ်စၢၤပဒိၣ်(IEC) နဲၣ်ရွဲၣ် ကိၣ်ဘညါတဲ၀ဲလီၤ.
“မ့ၫ်လၢတၫ်ဘံၣ်တၫ်ဘၢတၫ်အိၣ်သးအဃိလီၤ.သုးကီၣ်ကးန့ၣ် လၢဘီၣ်လခဲ နါဖဲ-မဲးစလီကစၢၫ်တကပၤ လၢက တီၫ်အံၤ ဟဲထီၣ်က့ၤလၢသုးကျိၤအိၣ်၀ဲအဂ့ၫ်”န့ၣ်လီၤ.
သုးဂ့ၫ်၀ီတၫ်အိၣ်သးဖ့ၣ်ဆၢအဃိ တၫ်ဘံၣ်တၫ်ဘၢအဖီခိၣ် ပှၤလၢကူၣ်လဲၫ်မၤကၤတၫ်ဖဲ မီၣ်ခံဟီၣ်က၀ီၤတဖၣ် အသိလ့ၣ်တၫ်မၢပတုာ်ဃာ်၀ဲ၀ံၤ တၫ်မ့ၫ်ထုးထီၣ်ဘိးဘၣ်ရၤလီၤလၢ တၫ်ဟးထီၣ်က့ၤလီၤခွဲးန့ၫ်လံမးဒီး ကက့ၤဒုး သူ၀ဲကမျၢၫ်ကျဲအံၤအဂ့ၫ် တၫ်ဘိးဘၣ်ရၤလီၤအပူၤ ကွဲးဃာ်၀ဲလီၤ.
လၢတနံၣ်အံၤအပူၤ သုးကီၣ်ကးန့ၣ် ပညိၣ်ခးလီၤကမျၢၫ်လၢကလံၤကျါဒီးကျိဖးဒိၣ်တဖၣ်၀ံၤ ၀့ၫ်မိပၠဲလၢတၫ်ပၢၫ်ဆၢ သုးထီၣ်ဒုးမၤန့ၫ်ပၢဆှၢဃာ်၀ဲစ့ၫ်ကီး ကထီၣ်ဒုးမၤန့ၫ်ကဒါက့ၤ၀ဲအဂီၫ် သုးကီၣ်ကးဟဲထီၣ်ဒုးဃီၤတၫ်အဂ့ၫ် ကရ့ၣ်နံၣ် ဒီကလုာ်တၫ်ဒီသဒၢသုး(KNDF)ပှၤဘၣ်မူဘၣ်ဒါတဖၣ် တဲ၀ဲဖဲလါမးရှး(၄)သီအနံၤန့ၣ်လီၤ.
ကီၫ်ကရ့ၣ်နံၣ်အပူၤ ဟီၣ်က၀ီၤ (၈၀)မျးကယၤဃၣ်ဃၣ် ပၢဆှၢ၀ဲန့ၫ်အဂ့ၫ် IECန့ၣ် တဲဃာ်၀ဲ၀ံၤ ၀့ၫ်လၢထီၣ်ဒုးန့ၫ်၀ဲတ ဖၣ်အပူၤ ဒုးအိၣ်ထီၣ်ဃာ်၀ဲ၀ဲၤကျိၤဒ်အမ့ၫ် ပၢပြးဂ့ၫ်၀ီ,သဲစးတၫ်ဒိၣ်စိဂ့ၫ်၀ီ,တၫ်ဘံၣ်တၫ်ဘၢ, ကူၣ်သ့,ဘုၣ်ဖီၣ်, ဆူၣ်ချ့ ဂ့ၫ်၀ီဒီးမိၫ်ဒီးဖိဆံးဂ့ၫ်၀ီတဖၣ်၀ံၤ ပၢပြးတၫ်ဖံးတၫ်မၤတဖၣ်လဲၤတရံးအသးန့ၣ်လီၤ.
Ref: RFA
