လါမးရှး(၆)သီ,၂၀၂၅နံၣ်
စးထီၣ်လၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီးတုၤ ၂၀၂၅နံၣ်, (၄)နံၣ်ဘျဲၣ်အတီၢ်ပူၤ ခီဖျိသုးကီၣ်ကးအသုး မၤ၀ဲကလံၤကျါတၢ်ဒုးတဖၣ်အဃိ ခၠီကလုၥ်ဖိ(၂၈၀)ဂၤ ဘၣ်သံ၀ဲအဂ့ၢ် ခၠီကလုၥ်ဂ့ၢ်၀ီကရၢ ICA ထုးထီၣ်ပၥ်ဖျါဃၥ်၀ဲ လံၥ်ပၥ်ဖျါလၢ လါမးရှး(၃)သီအနံၤန့ၣ်လီၤ.
ပှၤလၢသံ(၂၈၀)ဂၤအကျါ လီၢ်က၀ီၤကမျၢၢ်(၂၀၀)ဂၤ ဒီး ခၠီတၢ်ပၢၢ်ဆၢကရၢဖိအဂၤ(၈၀)ပၥ်ဃုၥ်၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်အတီၢ်ပူၤ သုးကီၣ်ကးအသုး လဲၤမၤ၀ဲကလံၤကျါတၢ်ဒုး ဆူ, ခၠီကီၢ်စဲၣ်, ခၠီကလုၥ်ဖိတဖၣ်အိၣ်ဆိးလီၢ်တဖၣ်အပူၤ အိၣ်ထီၣ်၀ဲခဲလၢၥ်ပၥ်ဖှိၣ်(၂၅၀)ဘျီအဂ့ၢ် ပၥ်ဖျါဃၥ်၀ဲလၢ အလံၥ်ပၥ်ဖျါအပူၤန့ၣ်လီၤ.
ခီဖျိသုးကီၣ်ကးအသုး မၤ၀ဲကလံၤကျါတၢ်ဒုးတဖၣ်အဃိ ခၠီကလုၥ်ဟံၣ်ဃီဘူးထီၣ်(၁၈၀၀)ဖျၢၣ်ဒီး တၢ်ဘူၣ်တၢ်ဘါတၢ်သူၣ်ထီၣ်ခဲလၢၥ်ဘူးထီၣ်(၇၀)ဖျၢၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ခၠီကီၢ်စဲၣ်ပူၤ ခီဖျိတၢ်ဒုးတၢ်ယၤတဖၣ်ဒီး သုးကီၣ်ကးအသုးမၤကလံၤကျါတၢ်ဒုးတဖၣ်အဃိ ခၠီကမျၢၢ်ဖိ(၆၅,၀၀၀)ဘျဲၣ်အံၤ ဘၣ်လဲၤဃ့ၢ်ပူၤဖျဲးသး ဆူ ကီၢ်အ့ဒံယါတပၤအဂ့ၢ် တၢ်သ့ၣ်ညါဘၣ်လၢ ခၠီကလုၥ်ဂ့ၢ်၀ီကရၢ အလံၥ်ပၥ်ဖျါအဖီခိၣ်န့ၣ်လီၤ.
