လါမးရှး(၆)သီ,၂၀၂၅နံၣ်
တနီသရံးကီၢ်ခီ,တနီသရံးကီၢ်ဆၣ်အပူၤခီဖျိတၢ်ဒုးတၢ်ယၤကဲထီၣ်အဃိလီၢ်က၀ီၤကမျၢၢ်လၢဘၣ်ဃ့ၢ်ပူၤဖျဲးသး(၅)ကထိဘျဲၣ် လိၣ်ဘၣ်တၢ်အီၣ်တၢ်အီဒီးတၢ်မၤစၢၤတဖၣ်အဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
တနီသရံး-မီတီၣ်ကျဲမုၢ်(ကီၢ်စၢဖှိၣ်ကျဲမုၢ်အဖီခိၣ်)အိၣ် သ၀ီတဖၣ်အပူၤ တၢ်ဘၣ်သဂၢၢ်ခးလိၥ်သးတဖၣ် ကဲထီၣ်လၢ သုးကီၣ်ကးအသုးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဃိ လီၢ်က၀ီၤကမျၢၢ်တဖၣ် ဘၣ်ဃ့ၢ်ပူၤဖျဲးသးအိၣ်ထီၣ်လံ ဘူးထီၣ်သၢလါဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဒုးဆူၣ်လၢ သ့ၣ်ခိ, ဘၣ်လီ, ညီၣ်ပ့ၣ်ကွ့,ထိၣ်မခၣ်, ခၠီနပီးပၥ်ဃုၥ် သ၀ီလၢဘူးဒီးဖဲန့ၣ်တဖၣ်အပူၤ လီၢ်က၀ီၤကမျၢၢ်(၅)ကထိဘျဲၣ်အံၤ ဘၣ်လဲၤဃ့ၢ်အိၣ်ကဒု၀ဲဒၣ်လၢ ကစၢၢ်ကလိဒီးပှၢ်တဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ထံလီၢ်ကီၢ်ပူၤပှၤလီၢ်အိၣ်ကမှံၤဖိတဖၣ်အံၤ တၢ်မၤစၢၤအီၤတၢ်အီၣ်တၢ်အီ, ကသံၣ်ကသီတဖၣ်ဘၣ်ဆၣ် တၢ်မၤစၢၤတဖၣ်လိၣ်ဒံးအဖၢမုၢ်လီၤအဂ့ၢ် ပိၥ်မုၣ်လၢ အမၤစၢၤ၀ဲတဂၤ စံး၀ဲန့ၣ်လီၤ.
“ယဟဲက့ၤလၢ ပှၤလီၢ်အိၣ်ကမှံၤဖိတဖၣ်အိၣ်အလီၢ် တနံၤအံၤလီၤ. (၅)ကထိန့ၣ် ပှၤလၢပမၤစၢၤအီၤတုၤအိၣ်နီၣ်ဂံၢ်လီၤ. တၢ်လီၢ်လၢတၢ်မၤစၢၤတတုၤအပူၤစ့ၢ်ကီးပှၤလီၢ်အိၣ်ကမှံဖိအိၣ်အါမးလီၤ.လိၣ်သပှၢ်ကတၢၢ်လၢကသံၣ်ကသီဒီးတၢ်အီၣ်တၢ်အီတဖၣ်လီၤ. တၢ်မၤစၢၤတဖၣ်တဒိး၀ဲညီနုၥ်အသိး တၢ်ဒုးစ့ၢ်ကီးဆူၣ်ထီၣ်အဃိ တၢ်ဒီၣ်တဲၥ်ဃၥ် ဟုသး, တၢ်အီၣ်တၢ်အီတဖၣ်အဃိ ပှၤလီၢ်အိၣ်ကမှံဖိတဖၣ် တၢ်ကီတၢ်ခဲဘၣ်အီၤအဂ့ၢ်” ပိၥ်မုၣ်လၢအမၤစၢၤတၢ်တဂၤ စံး၀ဲန့ၣ်လီၤ.
တကးဘၣ် ပှၤလီၢ်အိၣ်ကမှံဖိတဖၣ်အံၤ ခီဖျိထံအီတလၢတလီၣ်ဘၣ်ဒီး တၢ်ဟးလီၢ်တလၢလီၣ်ဘၣ်အဃိ ဘၣ်ကွၢ်ဆၢၣ်မဲၥ်ဘၣ် ဟၢဖၢလူတၢ်ဆါတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကိးမုၢ်နံၤဃၣ်ဃၣ် သုးကီၣ်ကးအသုးတဖၣ် ဟဲဒုးတၢ်လၢကလံၤကျါလၢ တနီသရံးကီၢ်ဆၣ်အပူၤ လၢတၢ်ဒုးကဲထီၣ်သးအလီၢ်တဖၣ်တကးဘၣ် တၢ်ဒုးကဲထီၣ်သးတအိၣ်တၢ်လီၢ်တဖၣ်အပူၤအဃိ လီၢ်က၀ီၤကမျၢၢ်တဖၣ် ဘၣ်ပျံၤဘၣ်ဖူး ဘၣ်ဃ့ၢ်ပူၤဖျဲးသးန့ၣ်လီၤ.
သုးကီၣ်ကးအသုးလၢ ဟဲထီၣ်သုးကျိၤဟူးဂဲၤသုးဂ့ၢ်၀ီတဖၣ်ဆူ မီတီၣ်တဖၣ်န့ၣ်မ့ၢ်၀ဲ ပီၣ်လဲၢ်နံၤကီၢ်ခီသုး၀ဲၤလီၢ်ခိၣ်သ့ၣ်(ကရခ)အစုတီၤဖီလၥ် ဘျံးအိၣ်သူၣ်လီၤခီၣ်ချ့သုးရ့ၣ် ခလရ(၁၀၁), ဘိးပၠ့အိၣ်သူၣ်လီၤ ခလရ(၂၂၄)ဒီး ကီးသီအိၣ်သူၣ်လီၤ ခိၣ်ချ့သုးရ့ၣ် (ခမရ၄၃၁)တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Mizzima
