လါမးရှး(၃)သီ,၂၀၂၅နံၣ်
အပူၤကွံာ် လါဖ့ၤဘြူၤအါရံၤအပူၤ သုးကီၣ်ကးလဲၤဒုးလၢကလံၤကျါအဃိ အ့ၣ်ယၣ်၀တံၣ်ကီၫ်ခီ,ပသံၣ်ကီၫ်ဆၣ်, လၢ ၀့ၫ်ရွှ့ၣ်သီၣ်ယၣ်, မကၠံစ့ၣ်ဒီးကၠဲၣ်လဲၣ်သ၀ီပူၤ ကမျၢၫ်ဟံၣ်ဃီ(၁၀၀)ဖျၢၣ်ဘျဲၣ် မ့ၣ်အူအီၣ်ဟးဂီၤကွံာ်၀ဲဒီး လီၫ်က၀ီၤဖိ တဖၣ်ဘၣ်ကဲထီၣ်ပှၤဟံၣ်ဃီတအိၣ်အဂ့ၫ် တၫ်သ့ၣ်ညါဘၣ်လၢလီၫ်က၀ီၤဖိတဖၣ်အိၣ်န့ၣ်လီၤ.
ရၢၫ်ခၢၣ်သုးမုၫ်ဒိၣ်(AA)ဒီးသုးကီၣ်ကးန့ၣ် ဖဲအပူၤကွံာ် လါယနူၤအါရံၤအကတၢၫ်တနွံအပူၤ တၫ်ဒုးကဲထီၣ်၀ံၤ ဖဲလါဖ့ၤ ဘြူၤအါရံၤ(၁၁)သီ,(၁၂)သီဒီး(၁၃)သီအနံၤ,လၢဂီၤခီ(၁)နၣ်ရံၣ်အဆၢကတီၫ်ဃၣ်ဃၣ်န့ၣ် သုးကီၣ်ကး ဟဲတ့ၫ်လီၤမ့ၣ် ပိၫ်ခးလီၤ၀ဲ မကၠံစ့ၣ်ဒီးကၠဲၣ်လဲၣ်သ၀ီလၢကလံၤကျါအဂ့ၫ် တဲ၀ဲလီၤ.
လီၫ်က၀ီၤဖိတဂၤတဲ၀ဲလၢ”မ့ၫ်ခးလီၤ၀ဲန့ၣ်တမ့ၫ်လၢတၫ်ဟးဂီၤကအိၣ်အါဘၣ်.ဟဲတ့ၫ်လီၤမ့ၣ်ပိၫ်လၢကဘီယူၤ လၢ(၃) သီအတီၫ်ပူၤတပယူာ်ဃီအဃိ တၫ်ဟးဂုၤဟးဂီၤအိၣ်အါအဂ့ၫ်”တဲ၀ဲလီၤ.
သုးကီၣ်ကးဒုးခးလီၤတၫ်လၢ(၃)သီအတီၫ်ပူၤဒ်သိးအံၤအဃိ ကၠဲၣ်လဲၣ်ဒီးမကၠံစ့ၣ်သ၀ီ ဟံၣ်ဃီဘၣ်ဟးဂီၤ အါန့ၫ်ဒံး(၁၀၀)ဖျၢၣ်၀ံၤ လီၫ်က၀ီၤဖိတဖၣ်တုၤဒၣ်လဲၣ်အိၣ်တသ့ဆိးတသ့လၢၤဘၣ်အဂ့ၫ် တဲ၀ဲလီၤ.
သုးကီၣ်ကးအစုတီၤဖီလာ် ပှၤမၤတၫ်ဖိတဂၤတဲ၀ဲလၢ”ပှၤကညီတသံဘၣ်န့ၣ် မ့ၫ်လၢစံၣ်သုးအဃိလီၤ.သုးကီၣ်ကးန့ၣ် တၫ်လီၫ်လၢအ၀ဲသ့ၣ် ဘၣ်ပျၢ်ကွံာ်၀ဲအပူၤ တယာ်၀ဲလၢတၫ်ပၢၫ်ဆၢသုအိၣ်အဃိ တ့ၫ်လီၤမ့ၣ်ပိၫ်ဒ်သိးအံၤ”န့ၣ်လီၤ.
လၢကတီၫ်အံၤ သုးကီၣ်ကးဒီးAAသုးမုၫ်ဒိၣ်အဘၢၣ်စၢၤ တၫ်ဒုးကဲထီၣ်၀ဲဖဲရၢၫ်ခၢၣ်ကီၫ်စဲၣ် ဒီးအ့ၣ်ယၣ်၀တံၣ်ကီၫ်ခီ အဆၢ ကီၫ်ဆၣ်တဖၣ်အပူၤ၀ံၤ သုးကီၣ်ကးအသုးဖိလၢဘၣ်ဒိသံတဖၣ် ဘၣ်တၫ်က့ၤဆှၢအီၤဆူ ပသံၣ်တကပၤ ကိးမုၫ်နံၤဒဲးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
AAန့ၣ် အ့ၣ်ယၣ်၀တံၣ်ကီၫ်ခီလၢ ဘျးစဲဒီးရၢၫ်ခၢၣ်အဆၢပာ်ဃုာ် လၢမကွ့ဒီးပကိကီၫ်ခီအဆၢတၫ်လီၫ်တဖၣ်အပူၤစ့ၫ်ကီး ထီၣ်ဒုးဃီၤ၀ဲအိၣ်အဂ့ၫ် ဖဲလါယနူၤအါရံၤ(၂၀)သီအနံၤန့ၣ် ထုးထီၣ်ဘိးဘၣ်ရၤလီၤဃာ်၀ဲန့ၣ်လီၤ.
Ref: DVB
