လါဖ့ၤဘြူၤအါရံၤ(၂၈)သီ,၂၀၂၅နံၣ်
တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ(AAPP) ထုးထီၣ်ဘိးဘၣ်ရၤလီၤ၀ဲလၢ လါဖ့ၤဘြူၤအါရံၤအပူၤ သုးကီၣ်ကးဖီၣ်၀ဲ ပှၤဟံးန့ၫ်တၫ်ကစီၣ်ဒီးပှၤလီၫ်အိၣ်ကမှံဖိပာ်ဃုာ် ကမျၢၫ်(၁၉)ဂၤအဂ့ၫ်န့ၣ်လီၤ.
ဖဲလါဖ့ၤဘြူၤအါရံၤ(၁)သီနံၤ တုၤ ၂၆သီအတီၫ်ပူၤ ပှၤလၢဘၣ်တၫ်ဖီၣ်တၫ်အိၣ်သးတဖၣ် ဖဲလါဖ့ၤဘြူၤအါရံၤ(၂၆)သီ အနံၤန့ၣ် AAPPထုးထီၣ်ဘိးဘၣ်ရၤလီၤ၀ဲလီၤ.
ပှၤလၢဘၣ်တၫ်ဖီၣ်တဖၣ်အကျါ အ့ၣ်ယၣ်၀တံၣ်ကီၫ်ခီ,မၠၣ်အီၣ်ကီၫ်ဆၣ် ပှၤဟံးန့ၫ်တၫ်ကစီၣ် ကိၣ်သါထဲးမၠံးဒီး ရၢၫ်ခၢၣ် ကီၫ်စဲၣ်,ကွးကီၫ်ဆၣ်,ပဒိၣ်ပှၤမၤတၫ်ဖိတဂၤပာ်ဃုာ်၀ဲအဂ့ၫ် တၫ်သ့ၣ်ညါဘၣ်လၢ AAPPစရီတၫ်မၤနီၣ်အဖီခိၣ်န့ၣ်လီၤ. ကိၣ်သါထဲးမၠံးန့ၣ် မ့ၫ်သုးကီၣ်ကးဖီၣ်အီၤခံ၀ီတ၀ီ၀ံၤ လၢကတီၫ်အံၤ တၫ်လိာ်ဘၢလိာ်ကွီၫ်ဃာ်အီၤခီဖျိလၢ တၫ်ဒုးလီၤ ပှီၫ်ကွံာ်တၫ်မၤအၢမၤသီ တၫ်ဘျၢအဆၢဒိၣ် ၅၂(က)အဂ့ၫ် AAPPပာ်ဖျါ၀ဲလီၤ.
လၢမါတလ့ကီၫ်ခီအပူၤစ့ၫ်ကီး ပိာ်ခွါ(၆)ဂၤ တၫ်စံးအၢ၀ဲလၢ PDFသုးဖိတဖၣ်၀ံၤ ဘၣ်တၫ်ဖီၣ်အီၤ,ကမျၢၫ်ပှၤလီၫ်အိၣ် ကမှံဖိ(၅)ဂၤလၢအိၣ်ဖဲရၢၫ်ခၢၣ်ကီၫ်စဲၣ်ဒီး လဲၤဃ့ၫ်အိၣ်ကဒုဆူ အ့ၣ်ယၣ်၀တံၣ်ကီၫ်ခီ,ယ့ၣ်ကၠံၣ်ကီၫ်ဆၣ်,ငသဲခၠီ၀့ၫ် တၫ်စံးအၢစံးသီ၀ဲလၢ ဘၣ်ထွဲဒီးရၢၫ်ခၢၣ်သုးမုၫ်ဒိၣ်(AA)အဃိဘၣ်တၫ်ဖီၣ်,ဒီးပိာ်မုၣ်(၃)ဂၤပာ်ဃုာ် ကမျၢၫ်(၇)ဂၤ ကွဲးကမၣ်တၫ်ကစီၣ်လၢ ဘၣ်ထွဲဒီးထံရူၫ်ကီၫ်သဲး၀ံၤ တီၣ်ထီၣ်၀ဲဆူပှၤတ၀ၢလံာ်ကဘျံးပၤပူၤအဃိ ဘၣ်တၫ်ဖီၣ်၀ဲအဂ့ၫ် ပာ်ဖျါ၀ဲလီၤ.
သုးဟံးန့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ သုးကီၣ်ကးန့ၣ် ပှၤလၢကွဲးထီဒါအီၤလၢပှၤတ၀ၢလံာ်ကဘျံးပၤပူၤတဖၣ် ဖီၣ်ဟံးန့ၫ်၀ဲဂ့ၫ်၀ီတပယူာ်ဃီ၀ံၤ ဖဲလါဖ့ၤဘြူၤအါရံၤအပူၤ ပှၤလၢဘၣ်တၫ်ဖီၣ်အီၤအကျါ သုးကီၣ်ကးအ၀ဲၤဒၢး အိၣ် သူၣ်လီၤသးအလီၫ် န့ၣ်ပၠံၣ်တီၣ်အပူၤ ပိာ်မုာ်(၁)ဂၤပာ်ဃုာ်၀ဲလီၤ.အပူၤကွံာ် လါယနူၤအါရံၤအပူၤစ့ၫ်ကီး ပိာ်မုာ်(၅)ဂၤ ပာ်ဃုာ် ခဲလၢာ်ပာ်ဖှိၣ် ပှၤ(၂၅)ဂၤ တဲ၀ဲလၢဘၣ်ထွဲဒီးထံရူၫ်ကီၫ်သဲး၀ံၤ ဘၣ်တၫ်ဖီၣ်ဃာ်၀ဲအဂ့ၫ် AAPPတၫ်မၤနီၣ်အဖီ ခိၣ်တၫ်သ့ၣ်ညါဘၣ်လီၤ.
ဖဲလါဖ့ၤဘြူၤအါရံၤ(၂၇)သီအနံၤန့ၣ် AAPPထုးထီၣ်ဘိးဘၣ်ရၤလီၤဃာ်၀ဲလီၤလၢ၂၀၂၁နံၣ်,လါဖ့ၤဘြူၤအါရံၤ သုးဟံး န့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ သုးကီၣ်ကးန့ၣ် ဖီၣ်၀ဲ ပှၤဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီဒီး ကမျၢၫ်ခံလၢာ်ပာ်ဖှိၣ် ၂၈,၆၉၃ဂၤ၀ံၤ လၢအကျါ ပှၤ ၂၁,၉၃၇ဂၤန့ၣ် ဖီၣ်ဒုးဃာ်၀ဲအဖၢမုၫ်ဒံးန့ၣ်လီၤ
