လါဖ့ၤဘြူၤအါရံၤ(၂၇)သီ,၂၀၂၅နံၣ်
အံၣ်လိၣ်မၢး ကထုးကွံာ်အသးလၢတၫ်ကဲကီၫ်ခဲနဒၣ်ထံဖိကီၫ်ဖိအဂီၫ် ပှၤဆဲးလီၤစုမုၫ်ကျၢၫ်ဃ့ထီၣ်၀ဲလၢ အဂၤလၢအကထိန့ၣ်လီၤ.
ဖဲထရၢးပဒိၣ်ဒီးကီၫ်ခဲနဒၣ်ထံကီၫ်အဘၢၣ်စၢၤ တၫ်ဖ့ၣ်ဆၢအိၣ်ထီၣ်အဆၢကတီၫ် ဖဲအပူၤကွံာ်စှၤသီန့ၣ် တၫ်ဆဲးလီၤစုမုၫ် ကျၢၫ်အမူး စးထီၣ်၀ဲလီၤ.
တၫ်စံးအၢစံးသီအံၣ်လိၣ်မၢးလၢ မၤထီဒါကီၫ်ခဲနဒၣ်ထံကီၫ်အမုာ်ကျိၤ၀ဲၤကွာ်ဒီး မၤဘၣ်ဒိထံကီၫ်အတၫ်စိတၫ်ကမီၤန့ၣ်လီၤ.
တၫ်ကထုးကွံာ်အီၤလၢတၫ်ကဲကီၫ်ခဲနဒၣ်ထံဖိကီၫ်ဖိခီဖျိလၢ တၫ်လံၣ်တၫ်လီ,တီၣ်ဖျါထီၣ်တၫ်ဂ့ၫ်လၢကမၣ်(မ့တမ့ၫ်) လၢတၫ်ပၢဆှၢရဲၣ်ကျဲၤပှၤကညီတၫ်နုာ်လီၤဟးထီၣ်အပူၤ သ့ၣ်ညါတၫ်ဂ့ၫ်တၫ်ကျိၤဘၣ်ဆၣ်သနာ်က့ ပာ်ဘၢ၀ဲတၫ်ဂ့ၫ်တဖၣ် ပာ်ဃုာ်လီၤ.
အံၣ်လိၣ်မၢးန့ၣ် မ့ၫ်ပှၤအိၣ်ဖျဲၣ်ထီၣ်လၢ ကလံၤထံးအၣ်ဖရံးကၣ်ထံကီၫ်၀ံၤ မ့ၫ်ပှၤဒိးကဲအသးလၢခဲနဒၣ်ဒီးအမဲရကၤထံကီၫ်(၂)ဘ့ၣ်လၢာ် ထံဖိကီၫ်ဖိန့ၣ်လီၤ.
တၫ်ဆဲးလီၤစုမုၫ်ကျၢၫ်ဃ့ထီၣ်၀ဲဒ်သိးအံၤအဖီခိၣ် “ခဲနဒၣ်န့ၣ်တမ့ၫ်ထံကီၫ်လၢအမ့ၫ်အတီဘၣ်”အဂ့ၫ် အံၣ်လိၣ်မၢးကွဲး ခီၣ်ဆၢက့ၤ၀ဲလၢ Xဆိၣ်ရှၢၣ်မံၣ်ဒံၣ်ယၢၣ်အပူၤန့ၣ်လီၤ.ဘၣ်ဆၣ်နာ်သက့အလီၫ်ခံန့ၣ် ထုးသံကွံာ်၀ဲတၫ်လၢကွဲးတ့ၫ်၀ဲ အဂ့ၫ် မံၣ်ဒံၣ်ယၣ်တဖၣ် ပာ်ဖျါ၀ဲလီၤ.
တၫ်ဆဲးလီၤစုမုၫ်ကျၢၫ်ဃ့ထီၣ်အပူၤ ဘိးဘၣ်ရၤလီၤဃာ်၀ဲလၢ အံၣ်လိၣ်မၢးန့ၣ် သူအတၫ်အိၣ်တၫ်ယၢၤဒီးအတၫ်စိတၫ် ကမီၤလၢဂုၤကျဲးစၢးလုၫ်ဘၢတၫ် လၢကီၫ်ခဲနဒၣ် တၫ်ဃုထၢအဖီခိၣ်န့ၣ်လီၤ.
လၢကတီၫ်အံၤ ကဲစ့ၫ်ကီး ထံဂုၤကီၫ်ဂၤပဒိၣ်ကရၢဖိတဂၤအဃိ တၫ်မၤ၀ဲအံၤန့ၣ် မ့ၫ်တၫ်ဂုၤကျဲးစၢးမၤဟးဂီၤ ခဲနဒၣ် အထံကီၫ်တၫ်စိတၫ်ကမီၤအဂ့ၫ်တဲ၀ဲလီၤ. အံၣ်လိၣ်မၢးန့ၣ် အမိၫ်အိၣ်ဖျဲၣ်ထီၣ်ဖဲ ဆးကၣ်ခၠံး၀ၣ်ပူၤအဃိ အ၀ဲကဲထီၣ်ခဲနဒၣ်ထံဖိကီၫ်ဖိန့ၣ်လီၤ.
တၫ်ဆဲးလီၤစုမုၫ်ကျၢၫ်ဃ့ထီၣ်တၫ်န့ၣ် ဘၣ်တၫ်စးထီၣ်၀ဲဖဲလါဖ့ၤဘြူၤအါရံၤ(၂၀)သီနံၤ၀ံၤတၫ်ကမၤ၀ဲ တုၤ လါယူၤ (၂၀) သီတပယူာ်ဃီ၀ံၤ လၢကတီၫ်အံၤ ပှၤဆဲးလီၤစုမုၫ်ကျၢၫ်အိၣ်လံ ၂၅၀,၀၀၀ဂၤလံန့ၣ်လီၤ.
တၫ်ဆဲးလီၤစုမုၫ်ကျၢၫ်ဃ့ထီၣ်တၫ်ဒ်သိးအံၤန့ၣ် မ့ၫ်ဒၣ်တၫ်ပနီၣ်တခါလီၤ၀ံၤ တမ့ၫ်ဖိးသဲစးဘၣ်.ဘၣ်ဆၣ်သနာ်က့ မ့ၫ်ဒိး န့ၫ် စုမုၫ်ကျၢၫ်(၅၀၀)ဒီးပၣ်လံၣ်မၣ်ခၢၣ်စးတဂၤ အတၫ်တူၫ်လိာ်ဆီၣ်ထွဲန့ၣ် ပဒိၣ်အတၫ်ခီၣ်ဆၢကအိၣ်ထီၣ်၀ဲလီၤ.
ထရၢးဟဲထီၣ်၀ံၤအလီၫ်ခံ တဲ၀ဲလၢကပာ်ပနီၣ်ခဲနဒၣ်ဒ်အမဲရကၤကီၫ်စဲၣ်တဘ့ၣ်အသိး,ဒီးတဲ၀ဲလၢ ကထၢအါထီၣ်တၫ်ခိ တၫ်သွဲလၢ ထး,အလူၣ်မံၣ်နံၣ်ယၣ်ဒီးပနံာ်အဂၤလၢတၫ်တီၣ်သွီနုာ်တဖၣ်အဖီခိၣ်အဃိ တၫ်ဖ့ၣ်ဆၢဘၣ်အိၣ်ထီၣ်၀ဲန့ၣ် လီၤ.
လၢကတီၫ်အံၤ ကီၫ်ခဲနဒၣ်ထံဖိကီၫ်ဖိတဖၣ် လၢတၫ်ခီၣ်ဆၢက့ၤအဖီခိၣ် ပတုာ်ကွံာ်တၫ်လဲၤထီၣ်က့ၤလီၤလၢအမဲရကၤ အသိး,အမဲရကၤပနံာ်စ့ၫ်ကီး တပှ့ၤ၀ဲလၢၤဘၣ်.
Ref:DVB
