ကပျဲကဲသုးအဂီၢ် ဖီၣ်န့ၢ်ဆူၣ်တၢ်တဖၣ်အိၣ် တကးဘၣ် ဃ့န့ၢ်ဆူၣ်ကျိၥ်စ့တဖၣ်ကဲထီၣ် လၢ၀့ၢ်တကူၣ်

လါဖ့ၤဘြူၤအါရံၤ(၁၉)သီ,၂၀၂၅နံၣ်

သုးကီၣ်ကးအတၢ်ထၢန့ၢ်ဆူၣ်သုးသဲစးတၢ်ဘျၢအဂီၢ် ၀့ၢ်တကူၣ်ကမျၢၢ်ဖိတဖၣ် တၢ်ဖီၣ်မၢန့ၢ်ဆူၣ်သုးတဖၣ်အိၣ်အသိး အပှၤမၤသကိးတၢ်တဖၣ် ဖီၣ်ကမျၢၢ်မၤဆူၣ်မၤဆါ ဃ့န့ၢ်ဆူၣ်ကျိၥ်စ့တဖၣ်ကဲထီၣ်၀ဲအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.

ဖဲအပူၤကွံၥ် လါဖ့ၤဘြူၤအါရံၤ(၆)သီအနံၤန့ၣ်, ပှၤသးစၢ်(၃)ဂၤ ဘၣ်တၢ်ဖီၣ်ဆူၣ်အီၤ ဖဲ၀့ၢ်တကူၣ်, အ့စ့ၣ်ကီၢ်ဆၣ်, စီၣ်ဘွါကၠံကိသိလ့ၣ်ပတုၥ်လီၢ်၀ံၤ က့ၤကိးအီၤလၢသိလ့ၣ် မၤဆူၣ်မၤဆါဃ့န့ၢ်ဆူၣ်ကျိၥ်စ့ကဲထီၣ်၀ဲအဂ့ၢ် လီၢ်က၀ီၤဖိစံး၀ဲန့ၣ်လီၤ.

“လၢစီၣ်ဘွါကၠံသိလ့ၣ်ပတုၥ်လီၢ် ပှၤသၢဂၤန့ၣ် ကလဲၤပှ့ၤတၢ်န့ၣ်လီၤ. ဖဲအစံၣ်လီၤလၢသိလ့ၣ်ဘၢးတဘျီဃီန့ၣ် တၢ်ဖီၣ်အီၤလီၤ. ထဲဒၣ်သိလ့ၣ်တခိၣ်လီၤ. အ၀ဲသ့ၣ်မၤပျံၤမၤဖူးအီၤလၢ ဒီန့ၣ်လီၤ. က့ၤနုၥ်လီၤလၢ မ့ၣ်ကလၣ်ဒိၣ်ကဘီယူၤသန့အကပၤ တြဲၤတခါအပူၤန့ၣ်လီၤ. က့ၤတုၤလၢတၢ်ကိဘျီ ဃ့၀ဲစ့(၇)ကလီၢ်လီၤ. တၢ်တဲက့ၤလၢ တၢ်ဟ့ၣ်တကဲဘၣ်အဃိ မၤဆူၣ်မၤဆါ၀ဲန့ၣ်လီၤ. တၢ်လဲၤတဲသကိးအီၤလၢ တၢ်ကဟ့ၣ်(၅)ကလီၢ်ဘျီ ပျဲ၀ဲလီၤ. ပှၤခိးတြဲၤတဂၤ စ့ၢ်ကီးဃ့၀ဲ (၁)ကလီၢ်အဃိ အဟံၣ်ဖိဃီဖိ ဘၣ်ဟ့ၣ်လီၤ၀ဲဒ်န့ၣ်လီၤ.”

ပှၤဖိသၣ်တဖၣ်ပၥ်ဃုၥ် ပှၤသးပှၢ်တဖၣ်ဒီးပှၤသးစၢ်အါအါဂီၢ်ဂီၢ် လီၤမၢ်အဂ့ၢ်န့ၣ် တၢ်ထံၣ်ဘၣ်လၢ ပှၤတ၀ၢပှၥ်ဘျးစဲလံၥ်ကဘျံပၤတဖၣ်အဖီခိၣ်၀ံၤ တနီၤတခီ တၢ်ဆဲးကျိးလီၤမ့ၢ်၀ံၤ ယံၤစှၤသီအတီၢ်ပူၤန့ၣ် တၢ်ထံၣ်က့ၤ၀ဲအဂ့ၢ် ကွဲးဖျါဃၥ်၀ဲန့ၣ်လီၤ.

ပှၤလၢဘၣ်တၢ်ဖီၣ် အဟံၣ်ဖိဃီဖိတဖၣ်တခီ ဘၣ်ယိၣ်လၢတၢ်ဘံၣ်တၢ်ဘၢအဃိ ဂ့ၤလိၥ်၀ဲ ကစံးဆၢတၢ်လၢ မံၣ်ဒံၣ်ယၣ်တဖၣ်အအိၣ်ဘၣ်ဆၣ် ခီဖျိတၢ်ဟ့ၣ်အီၤကျိၥ်စ့အဃိ တၢ်ပျၢ်က့ၤအီၤအဂ့ၢ် တၢ်သ့ၣ်ညါဘၣ်န့ၣ်လီၤ.

ဖဲအပူၤကွံၥ် လါဖ့ၤဘြူၤအါရံၤတၢတနွံအတီၢ်ပူၤစ့ၢ်ကီး ပှၤသးစၢ်လၢသးနံၣ်အိၣ်(၂၀)နံၣ်တဂၤ ဘၣ်တၢ်ဖီၣ်အီၤ ဖဲမၠီးအိးကလၣ်ပး၀ံၤ ခီဖျိတၢ်ဟ့ၣ်အီၤကျိၥ်စ့အဃိ တၢ်ပျၢ်က့ၤအီၤန့ၣ်လီၤ.

ကီၢ်ပယီၤပူၤ ခီဖျိတၢ်ပၥ်ဂၢၢ်ပၥ်ကျၢၢ် ကမျၢၢ်တၢ်ထၢဆူၣ်သုးသဲစးတၢ်ဘျၢ၀ံၤ(၁)နံၣ်အလီၢ်ခံ ပှၤသးစၢ်ခဲလၢၥ်(၂၃,၀၀၀)ဘျဲၣ် ဘၣ်တၢ်ဖီၣ်အီၤန့ၣ်လီၤ.

ပှၤသးစၢ်လၢဘၣ်တၢ်ဖီၣ်အနီၣ်ဂံၢ်နီၣ်ဒွးစရီ တၢ်ဂ့ၢ်တၢ်ကျိၤလၢ တၢ်ပၥ်ဖျါတ့ၢ်လၢထးတဖၣ်အံၤ လၢတၢ်ဒိးန့ၢ်ဘၣ်အဖိးသဲစးအဖီၣ် တၢ်ထၢဖှိၣ်ဃၥ်အီၤလီၤဒီး မ့မ့ၢ်လၢ ဟီၣ်ခိၣ်မဲၥ်ဖံးခိၣ်တခီ ကအိၣ်အါန့ၢ်ဒံးအလီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.

Ref: DVB