လါဖ့ၤဘြူၤအါရံၤ(၁၉)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁), ကီၢ်ရ့ၣ်ဒူသထူၣ်, ဖၣ်အၣ်ကီၢ်ဆၣ်အပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးပညိၣ်ဒုးကမျၢၢ်လၢကလံၤကျါဒီးခးလီၤကျိဖးဒိၣ်တဖၣ်အဃိ လီၢ်က၀ီၤကမျၢၢ်ပှၤနီၣ်ဂံၢ်(၇)ကထိဘျဲၣ် ဘၣ်ဃ့ၢ်ပူၤဖျဲးအသိး လိၣ်ဘၣ်ဂ့ၢ်ဂီၤအူတၢ်မၤစၢၤတဖၣ်အဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ဒူသထူၣ်ပှၤဘၣ်မူဘၣ်ဒါအအိၣ်န့ၣ်လီၤ.
လါဖ့ၤဘြူၤအါရံၤ(၁၅)သီအနံၤ, သုးကီၣ်ကးအကဘီယူၤ ဟဲတ့ၢ်လီၤမ့ၣ်ပိၢ်တဖၣ် ဆူဖၣ်အၣ်ကီၢ်ဆၣ်, ၀ဲပၠၣ်ကရူၢ်, ဖါပီၢ်သ၀ီအကပိၥ်ကပၤလၢ(၆)ဘျီဃၣ်ဃၣ်အဃိဒူသ၀ီ(၁၁)ဖျၢၣ်လၢအဘူးဒီးဖဲန့ၣ်အပူၤဟံၣ်ခိၣ်ခဲလၢၥ်ပၥ်ဖှိၣ် (၁၂၃၀)ဖျၢၣ် လီၢ်က၀ီၤကမျၢၢ်ပှၤနီၣ်ဂံၢ်(၇၀၅၃)ဂၤ ဘၣ်ယိၣ်ဘၣ်ဘှီတၢ်အဃိ ဘၣ်ဃ့ၣ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
ကမျၢၢ်လၢဃ့ၢ်ပူၤဖျဲးသးတဖၣ်ဘၣ်လဲၤဃ့ၢ်အိၣ်ကဒုလၢပှၤလၢအ၀ဲသ့ၣ်သ့ၣ်ညါအီၤဒူသ၀ီတဖၣ်အအိၣ်ဒီး လိၣ်ဘၣ်တၢ်အီၣ်တၢ်အီၣ်ဒီးဆူၣ်ချ့တၢ်မၤစၢၤတဖၣ်အဂ့ၢ် ကီၢ်ရ့ၣ်ဒူသထူၣ်ပှၤကတိၤတၢ်ပၢ ပဒိၣ်စီၤအ့နၢၤ စံး၀ဲန့ၣ်လီၤ.
“ကမျၢၢ်လၢဃ့ၢ်ပူၤဖျဲးသးတဖၣ်အံၤ လိၣ်ဘၣ်တၢ်အီၣ်တၢ်အီဒီးဆူၣ်ချ့တၢ်မၤစၢၤတဖၣ်လီၤ. အ၀ဲသ့ၣ်န့ၣ် တလဲၤဃ့ၢ်အိၣ်ကဒုလၢပှၢ်ပူၤဘၣ်. လဲၤအိၣ်ကဒု၀ဲလၢ ပှၤလၢအသ့ၣ်ညါအီၤတဖၣ်အိၣ်သ၀ီတဖၣ်ပူၤ ဒီးတၢ်လီၢ်လၢအယံၤဒီးအ၀ဲသ့ၣ်အိၣ်ဆိးအလီၢ်”အဂ့ၢ်န့ၣ်လီၤ.
သုးကီၣ်ကးအသုး ပညိၣ်ဒုးလီၢ်က၀ီၤကမျၢၢ်တဖၣ်လၢကလံၤကျါဒီးခးလီၤကျိဖးဒိၣ်တဖၣ်အံၤ ခီဖျိတၢ်ထီၣ်ဒုးမၤန့ၢ် မဲးပြ့ခံသုးကလၢၤ၀ံၤအလီၢ်ခံ တၢ်ပိၥ်ထွဲအခံတၢ်ကဲထီၣ်သးအဂ့ၢ်လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
ဒ်န့ၣ်အသိး တကတီၢ်ဃီဖဲ လါဖ့ၤဘြူၤအါရံၤ(၁၅)သီအနံၤ, သုးကီၣ်ကးအသုး ခးလီၤကျိဖးဒိၣ်(၂)ဖျၢၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ၀ဲပၠၣ်ကရူၢ်,ဖါပီၢ်သ၀ီအကပၤ၀ံၤ ဘၣ်ဟးဂီၤကွံၥ်၀ဲ သ၀ီဖိမီၣ်တီၣ်တုၥ်(၁)ခိၣ်န့ၣ်လီၤ.
တကးဘၣ် ဖဲလါဖ့ၤဘြူၤအါရံၤ(၁၄)သီအနံၤစ့ၢ်ကီး သုးကီၣ်ကးအသုးနီၣ်ဂံၢ်(၈) ဒုးယၤရဲၣ်ကျဲၤ၀ဲၤလီၢ်ခိၣ်သ့ၣ်အစုတီၤဖီလၥ် (ခမရ-၄၀၈)လၢအိၣ်ကမးမိၢ်သုးကလၢၤ ခးလီၤကျိဖးဒိၣ်(၃)အဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲဖၣ်အၣ်ကီၢ်ဆၣ်, ၀ဲပၠၣ်ကရူၢ်, ဖါပိၢ်သ၀ီအပူၤ၀ံၤ ဘၣ်ဟးဂီၤကွံၥ်၀ဲ ကမျၢၢ်အိၣ်ဟံၣ်(၃)ဖျၢၣ်ဒီး စဲးထူစံာ်ဖးဒိၣ်တခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
