လါဖ့ၤဘြူၤအါရံၤ(၁၈)သီ,၂၀၂၅နံၣ်
ကီၢ်ပယီၤပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်အတီၢ်ပူၤ ထံဖိကီၢ်ဖိကမျၢၢ်လၢက့ၢ်ဂီၤတလၢပှဲၤအစှၤကတၢၢ်(၁၁၇)ဂၤ ဘၣ်တၢ်မၤသံအီၤအဂ့ၢ် Human Rights Myanmarကရၢ ထုးထီၣ်ပၥ်ဖျါဃၥ်၀ဲဖဲ လါဖ့ၤဘြူၤအါရံၤ(၁၇)သီအနံၤန့ၣ်လီၤ.
ဖဲန့ၣ်အကျါ ပၥ်ဃုၥ်၀ဲ ပိၥ်မုၣ်ဒီးပိၥ်မုၣ်ဖိသၣ်(၂၁)ဂၤ၀ံၤ (၁၈)မျးကယၤလၢ ဘၣ်တၢ်မၤသံအီၤတဖၣ်မ့ၢ် သုးကရူၢ်ဒီးအပှၤမၤသကိးတၢ်တဖၣ်ဘၣ်ဆၣ်တၢ်ကဟံးန့ၢ်တၢ်ဂ့ၢ်တၢ်ကျိၤတဖၣ်လၢတၢ်သဘံၣ်သဘုၣ်ကဲထီၣ်သးအလီၢ်အဂီၢ် ကီခဲ၀ဲအဃိ ပှၤလၢဘၣ်တၢ်မၤသံအီၤတဖၣ်န့ၣ် ကအိၣ်အါန့ၢ်ဒံးအလီၢ်အဂ့ၢ် စံး၀ဲန့ၣ်လီၤ.
မ့ၢ်ဘၣ်ကွၢ်လၢ ကီၢ်ခီဒီးကီၢ်စဲၣ်အပတီၢ်တခီ စကဲကီၢ်ခီအပူၤ ဘၣ်တၢ်မၤသံအီၤ(၄၆)မျးကယၤဒီးအအါကတၢၢ်၀ံၤ လၢအလီၢ်ခံ မကွ့ကီၢ်ခီအပူၤ (၂၂)မျးကယၤဒီး တနီသရံးကီၢ်ခီအပူၤ (၇)မျးကယၤဘၣ်တၢ်မၤသံအီၤန့ၣ်လီၤ.
ကီၢ်ပယီၤပူၤ စးထီၣ်ဖဲ (၂၀၂၁)နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ကမျၢၢ်လၢက့ၢ်ဂီၤတလၢပှဲၤတဖၣ် ဘၣ်ကွၢ်ဆၢၣ်မဲၥ်ဘၣ်ဒီး သုးကီၣ်ကးအသုး မၤကမၣ်ပှၤဂ့ၢ်၀ီခွဲးယၥ်တဖၣ်ဒီး တၢ်ဆီၣ်သနံးတဖၣ်ဆူၣ်ဆူၣ်ကလၢၥ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်အတီၢ်ပူၤ ကမျၢၢ်က့ၢ်ဂီၤတလၢပှဲၤလၢ ဘၣ်တၢ်မၤသံအီၤအနီၣ်ဂံၢ်နီၣ်ဒွးအံၤ အထီၣ်အလီၢ်အိၣ်၀ဲဘၣ်ဆၣ် နီၣ်ဂံၢ်ဒိၣ်ထီၣ်၀ဲအဖၢမုၢ်လီၤအဂ့ၢ် Human Rights Myanmarကရၢ စံး၀ဲန့ၣ်လီၤ.
၂၀၂၁နံၣ်အတီၢ်ပူၤ ကမျၢၢ်က့ၢ်ဂီၤတလၢပှဲၤအစှၤကတၢၢ်(၁၂)ဂၤ ဘၣ်တၢ်မၤသံအီၤ၀ံၤ, ၂၀၂၂နံၣ်အတီၢ်ပူၤ အဂၤ(၄၀), ၂၀၂၃နံၣ်အတီၢ်ပူၤ အဂၤ(၃၄)ဒီး ၂၀၂၄နံၣ်အတီၢ်ပူၤ အဂၤ(၃၀)ဂၤ ဘၣ်တၢ်မၤသံအီၤန့ၣ်လီၤ.
၂၀၂၅နံၣ်အတီၢ်ပူၤ တၢ်မၤနီၣ်ထၢဖှိၣ်ဃၥ်၀ဲ တၢ်မၤသံကမျၢၢ်က့ၢ်ဂီၤတလၢပှဲၤတၢ်မူၤတၢ်ရၤတခါ၀ံၤ တၢ်အံၤမ့ၢ် သုးကီၣ်ကးအသုး မၤပျီၣ်မၤဂီၤလၢ ကမျၢၢ်က့ၢ်ဂီတလၢပှဲၤတဖၣ်အဖီခိၣ် ဖျိဖျါ၀ဲအဂ့ၢ် စံး၀ဲန့ၣ်လီၤ.
ကမျၢၢ်လၢက့ၢ်ဂီၤတလၢပှဲၤတဖၣ် တၢ်ပညိၣ်မၤသံအီၤ, တၢ်မၤဆူၣ်မၤဆါအီၤ ဒီး တၢ်ပၥ်ကပၤတဖၣ်အံၤ မ့ၢ် မၤကမၣ်ဟီၣ်ခိၣ်ဒီဖျၢၣ်ပှၤဂ့ၢ်၀ီခွဲးယၥ်သဲးစးတၢ်ဘျၢတဖၣ်၀ံၤ ကွီၢ်မ့ၣ်တဖၣ်အံၤ မ့ၢ်တၢ်မၤကမၣ် ကလုၥ်စဲၤသွဲၣ်ကွီၢ်မ့ၣ်, သုးကွီၢ်မ့ၣ်ပၥ်ဃုၥ် ဟီၣ်ခိၣ်ဒီဖျၢၣ်ပှၤဂ့ၢ်၀ီခွဲးယၥ်သဲးစးတၢ်ဘျၢအဂ့ၢ် စံး၀ဲန့ၣ်လီၤ.
လၢတၢ်န့ၣ်အဃိ ဟီၣ်ခိၣ်ဘီမုၢ်ထံကီၢ်တဖၣ် ကဟံးန့ၢ်ဂ့ၢ်၀ီတဲၥ်တဲၥ်ဖျူဖျူလၢ ကီၢ်ပယီၤသုးမုၢ်ဒိၣ်အဖီခိၣ်ဒီး ဒ်သိး ပှၤလၢဘၣ်တၢ်မၤကမၣ်အီၤတဖၣ် ကဒိးန့ၢ်ဘၣ် တၢ်ဒီသဒၢဒီးတၢ်တြီတၢ်တြၢ်အဂီၢ် ဃ့ထီၣ်ဃၥ်၀ဲလၢ လံၥ်ပၥ်ဖျါအပူၤန့ၣ်လီၤ.
လၢန့ၣ်အမဲၥ်ညါ ဘီမုၢ်စၢဖှိၣ်ကရၢဘၣ်ထွဲကီၢ်ပယီၤပှၤဂ့ၢ်၀ီခွဲးယၥ် ခၢၣ်စးလီၤဆီတခီစ့ၢ်ကီး ဘၣ်ထွဲဒီးကမျၢၢ်လၢက့ၢ်ဂီၤတလၢပှဲၤတဖၣ်တၢ်အိၣ်သးအဖီခိၣ် ကမၤ၀ဲလံၥ်ပၥ်ဖျါလီၤဆီအဂီၢ် ဃ့ထီၣ်ဃၥ်၀ဲန့ၣ်လီၤ.
Ref: DVB
