လါဖ့ၤဘြူၤအါရံၤ(၁၈)သီ,၂၀၂၅နံၣ်
သးစၫ်လၢလဲၤမၤတၫ်လၢထံဂုၤကီၫ်ဂၤဒီးဟဲက့ၤဆူကီၣ်ပယီၤတစိၫ်တလီၫ် လၢအသးနံၣ်ပှဲၤလၢကဘၣ်ကဲသုးတဖၣ် ကဟးထီၣ်ကဒါက့ၤဆူကီၫ်ချၢန့ၣ် တၫ်ကမၤဃံးထီၣ်ဘၣ်အဂီၫ် သုးကီၣ်ကးပှၤမၤတၫ်ဖိကိတိာ်၀ဲၤကျိၤ နဲၣ်လီၤဃာ်၀ဲအဂ့ၫ် ဖဲလါဖ့ၤဘြူၤအါရံၤ(၁၇)သီအနံၤန့ၣ် ကီၫ်ချၢတၫ်ဃုဖံးဃုမၤ အ့ၣ်ကၠ့ၣ်စံၣ်တဖၣ်တဲ၀ဲလီၤ.
ပှၤဟဲက့ၤလၢ တၫ်ဟးထီၣ်မၤတၫ်လၢတၫ်ချၢအခွဲး လံာ်ခီကီၫ် PJ(Passport for Job)ဒီးတၫ်လဲၤဟး လံာ်ခီကီၫ် PV (Passport for Visit)ခံခါလၢာ် လၢသးနံၣ်အိၣ် ၁၈နံၣ် တုၤ ၃၅နံၣ်အဘၢၣ်စၢၤပိာ်ခွါတဖၣ် တၫ်မၤဃံးထီၣ်၀ဲအဂ့ၫ် တဲ၀ဲလီၤ.
သုးကီၣ်ကး အပှၤမၤတၫ်ဖိကိတိာ်၀ဲၤကျိၤန့ၣ် တမ့ၫ်ထုးထီၣ်လံာ်လၢဖိးသဲစးဘၣ်အမဲာ်ညါ မ့ၫ်ဒၣ်နဲၣ်လီၤ၀ဲလၢ ထးခိၣ်တၫ်ကလုၫ်အဂ့ၫ် ၀့ၫ်တကူၣ်ကီၫ်ချၢတၫ်ဃုဖံးဃုမၤ အ့ၣ်ကၠ့ၣ်စံၣ် ပှၤဘၣ်မူဘၣ်ဒါတဂၤတဲ၀ဲလီၤ.
“ပှၤအိၣ်ဟဲက့ၤနုာ်လီၤဆူ ထံဂုၤကီၫ်ဂၤတဖၣ်န့ၣ် ထံကီၫ်အံၤန့ၣ် မ့ၫ်ဒ်သုးကီၣ်ကး ပာ်ပနီၣ်န့ၫ်ဃာ်၀ဲ တၫ်ဘျၢအသီ အသိးအဂ့ၫ် နဲၣ်လီၤဃာ်၀ဲလီၤ.၀ဲၤဒၢးလံာ်ဒုတဟဲတုၤဒံးဘၣ်.တဲ၀ဲလၢထးခိၣ်တၫ်ကလုၫ်လီၤ.တၫ်န့ၣ်အဃိ ပှၤတၫ်ရဲၣ် တၫ်ကျဲၤအိၣ်လၢကဟးထီၣ်ကဒါက့ၤတဖၣ် မ့ၫ်တဟဲက့ၤဘၣ်န့ၣ် အဂ့ၤကတၢၫ်လီၤ.”
ကီၫ်ပူၤပိာ်ခွါလၢ သးနံၣ်ပှဲၤလၢကဘၣ်ကဲသုးတဖၣ်စ့ၫ်ကီး ကဒိးန့ၫ်တၫ်ဟးထီၣ်မၤတၫ်လၢတၫ်ချၢအခွဲးအဂီၫ် ကီၫ်ချၢ တၫ်ဃုဖံးဃုမၤတၫ်နဲၣ်ကျဲတၫ်မၤလိစ့ၫ်ကီး တၫ်ဟ့ၣ်ခွဲးလၢကထီၣ်၀ဲလၢၤဘၣ်အဂ့ၫ် တဲ၀ဲလီၤ.
သုးကီၣ်ကးန့ၣ် ဖဲလါယနူၤအါရံၤ ၂၃သီနံၤန့ၣ် ပာ်လီၤ၀ဲကမျၢၫ်တၫ်ဘၣ်ကဲသုးတၫ်ဘျၢအကျိၤအကျဲတဖၣ်၀ံၤအလီၫ်ခံ မၤဃံးထီၣ် သးစၫ်တၫ်ဟးထီၣ်မၤတၫ်လၢတၫ်ချၢအဂ့ၫ် ကီၫ်ချၢတၫ်ဃုဖံးဃုမၤ အ့ၣ်ကၠ့ၣ်စံၣ်တဖၣ်တဲ၀ဲလီၤ.
သုးကီၣ်ကးပာ်လီၤဃာ် ကမျၢၫ်တၫ်ဘၣ်ကဲသုး တၫ်ဘျၢအကျိၤအကျဲ အဆၢဒိၣ်-၅၁ အပူၤ ပှၤလၢဒိးန့ၫ်ဘၣ် တၫ်ဘၣ် ကဲသုးလံာ်တၫ်ကလုၫ်တဖၣ်န့ၣ် တၫ်ဘၣ်ကဲသုးလီၫ်ခၢၣ်သးကရၢအတၫ်ဟ့ၣ်ခွဲးမ့ၫ်တအိၣ်ဘၣ်န့ၣ် ဟးထီၣ်ဆူ ထံ ဂုၤကီၫ်ဂၤတန့ၫ်ဘၣ်အဂ့ၫ် ပာ်ဖျါဃာ်၀ဲလီၤ.
ဒ်န့ၣ်အသိး အဆၢဒိၣ်-၅၀ အပူၤစ့ၫ်ကီး ပှၤလၢဖျိကသံၣ်တၫ်သမံသမိးတဖၣ်န့ၣ် တၫ်ကဒုးပူၤအီၤအဂီၫ်, တၫ်ကမၤစှၤ လီၤန့ၫ်အီၤ တၫ်ဘၣ်ကဲသုးတၫ်ဆၢကတီၫ်အဂီၫ် မ့ၫ်ဃ့ထီၣ်၀ဲန့ၣ် တချူးဒိးန့ၫ်ခွဲးလၢလီၫ်ခၢၣ်သးကရၢအိၣ်ဒံးဘၣ်န့ၣ် ဟးထီၣ်ဆူကီၫ်ချၢထံကီၫ်တန့ၫ်ဘၣ်အဂ့ၫ် ကွဲးဖျါဃာ်၀ဲလီၤ.
Ref: RFA
