သုးဖိ(၃)ဂၤလၢ သုးကီၣ်ကးဖီၣ်န့ၫ်ဆူၣ်ဒုးကဲသုး ဟဲပာ်လီၤတၫ်စုက၀ဲၤ

လါဖ့ၤဘြူၤအါရံၤ(၁၈)သီ,၂၀၂၅နံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ,ကီၫ်သူလ့ၤတၫ်ပၢဟီၣ်က၀ီၤ,ချၢၣ်လွံၫ်ထူၣ်ကီၫ်ရ့ၣ်,လၢၫ်ဒိၣ်ကီၫ်ဆၣ်,ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA),သုးရ့ၣ်(၉)အအိၣ် ဖဲလါဖ့ၤဘြူၤအါရံၤ(၁၇)သီနံၤန့ၣ် သုးကီၣ်ကးအသုး (ခမရ-၅၈၄)သုးရ့ၣ် သုးဖိမၠးမ့သူၣ်(၂၁)နံၣ်,သုးဖိ၀့မ့ကိၣ် သးနံၣ်(၂၄)နံၣ်,သုးဖိမိသီးယၣ် သးနံၣ်(၂၀) (၃)ဂၤအံၤန့ၣ် ဟဲပာ်လီၤတၫ်စုက၀ဲၤလီၤ.

အ၀ဲသ့ၣ်(၃)ဂၤအံၤန့ၣ် သုးကီၣ်ကးအသုးဖီၣ်န့ၫ်ဆူၣ်အီၤဒီး ဘၣ်တၫ်မၢကဲန့ၫ်ဆူၣ်သုး၀ံၤ ဖဲဟဲပာ်လီၤတၫ်စုက၀ဲၤအက တီၫ် ဟဲစိာ်ဃုာ်ဒီးကျိ MA-3 ၂ခိၣ်,ကျိဆၣ်ဒၢ(၁၁)ခါ,ကျိချံ(၇၇၆)ဖျၢၣ်ဒီးစုကွံာ်မ့ၣ်ပိၫ်(၁)ဖျၢၣ်န့ၣ်လီၤ.

သုးကီၣ်ကးအသုးဖိ(၃)ဂၤလၢဟဲပာ်လီၤတၫ်စုက၀ဲၤအံၤ လၢၫ်ဒိၣ်ကီၫ်ဆၣ်ပှၤဘၣ်မူဘၣ်ဒါဒီးသုးရ့ၣ်(၉) ပှၤဘၣ်မူဘၣ်ဒါတဖၣ် ဟ့ၣ်မၤလၤကပီၤအီၤ နီၫ်တဂၤ (၁၀)ကလီၫ်ကၠး စုာ်စုာ်န့ၣ်လီၤ.

သုးဖိလၢဘၣ်တၫ်ဖီၣ်န့ၫ်ဆူၣ်ဒီးမၢကဲန့ၫ်ဆူၣ်သုးတဖၣ် လၢကျဲတဘိဂ့ၤတဘိဂ့ၤ ကဟဲပာ်လီၤဘၣ်တၫ်စုက၀ဲၤလၢ တၫ်ပၢၫ်ဆၢသုးဒီးကမျၢၫ်တၫ်ဒီသဒၢသုးတဖၣ်အိၣ်အဂီၫ် တၫ်ပၢၫ်ဆၢဂံၫ်ဘါကရၢတကပၤ ဆီၣ်တခူထီၣ်ဃာ်၀ဲလီၤ.