လါဖ့ၤဘြူၤအါရံၤ(၁၁)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, သုးက့(၇)ဘ့ၣ်, ကီၢ်ရ့ၣ်(၇)ဘ့ၣ်အပူၤ စးထီၣ်လၢ၂၀၂၅နံၣ်, လါယနူၤအါရံၤ(၁)သီတုၤ(၃၁)သီအနံၤ (၁)လါအတီၢ်ပူၤ တၢ်ဒုးကဲထီၣ်တ့ၢ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A),ကညီဒီကလုၥ်ဂၢၤသးကရၢ(K.N.D.O)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤခဲလၢၥ်ပၥ်ဖှိၣ်(၄၄)ဘျီ၀ံၤသုးကီၢ်ကးအသုးဘၣ်သံ၀ဲ(၁၆၁)ဂၤဒီးဘၣ်ဒိ၀ဲ(၁၆၆)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
(၁)လါအတီၢ်ပူၤ တၢ်ဒုးကဲထီၣ်တ့ၢ်၀ဲ(၄၄)ဘျီအသိး သုးကီၣ်ကးတပၤ မၤ၀ဲကလံၤကျါတၢ်ဒုး(၄၁)ဘျီတကးဘၣ် မၤ၀ဲဒြိတၢ်ဒုးတဖၣ်, ခးလီၤကျိဖးဒိၣ်တဖၣ်, ဒွဲၣ်အူလီၢ်က၀ီၤကမျၢၢ်ဟံၣ်ဃီတဖၣ်ပၥ်ဃုၥ် မၤကမၣ်ပှၤဂ့ၢ်၀ီခွဲးယၥ်တဖၣ်အိၣ်ထီၣ်၀ဲကိးမုၢ်နံၤန့ၣ်လီၤ.
(၁)လါအတီၢ်ပူၤ ခီဖျိသုးကီၣ်ကးမၤကမၣ်ပှၤဂ့ၢ်၀ီခွဲးယၥ်အကလုၥ်ကလုၥ်အပူၤ လီၢ်က၀ီၤကမျၢၢ်လၢတၢ်ကမၣ်တအိၣ် ဘၣ်သံ၀ဲ(၁၅)ဂၤ, ဘၣ်ဒိ၀ဲ(၄၂)ဂၤ၀ံၤ တၢ်သိၣ်လိကၠိဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ပၥ်ဃုၥ် ကမျၢၢ်ဟံၣ်ဃီတၢ်သူၣ်ထီၣ်ခဲလၢၥ်ပၥ်ဖှိၣ် ဘၣ်ဟးဂီၤကွံၥ်၀ဲ(၄၆)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ တၢ်ဒုးကဲထီၣ်တ့ၢ်လၢ (K.N.L.A), (K.N.D.O)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်ဒီး သုးကီၣ်ကးအသုးအဘၢၣ်စၢၤ၀ံၤအလီၢ်ခံ သုးကီၣ်ကးအပှၤသုးဖိလၢ ဟဲပၥ်လီၤစုက၀ဲၤခဲလၢၥ်အိၣ်၀ဲ (၄၆)ဂၤဒီး ဖဲကီၢ်ရ့ၣ်ဒူသထူၣ်ဟီၣ်က၀ီၤပူၤ(၁)ဂၤ, မုၢ်တြီၢ်ကီၢ်ရ့ၣ်ပူၤ(၁၇)ဂၤ, ဒူပျၥ်ယၥ်ကီၢ်ရ့ၣ်ပူၤ(၁၈)ဂၤဒီး ဖၣ်အၣ်ကီၢ်ရ့ၣ်ပူၤ(၁၀)ဂၤအိၣ်၀ဲအဂ့ၢ် တၢ်သ့ၣ်ညါဘၣ်လၢ R2Kတၢ်မၤနီၣ်စရီတဖၣ်အဖီခိၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ်၂၀၂၅နံၣ်, လါယနူၤအါရံၤ(၂၂)သီအနံၤစ့ၢ်ကီး KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကး ကတၢတံးသုးကလၢၤလၢအိၣ်ဖဲ ကီၢ်ရ့ၣ်မုၢ်တြီၢ်ဟီၣ်က၀ီၤပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ အပူၤကွံၥ်(၂၀၂၄)နံၣ် ဒီ(၁)နံၣ်အပူၤ ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ တၢ်ဒုးဖးဒိၣ်, တၢ်ဒုးအဆံးကဲထီၣ်တ့ၢ်၀ဲခဲလၢၥ်ပၥ်ဖှိၣ်(၃၂၂၉)ဘျီအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲဖဲ လါယနူၤအါရံၤ(၂၄)သီအနံၤန့ၣ်လီၤ.
တၢ်နီၣ်ဂံၢ်နီၣ်ဒွးစရီလၢ တၢ်ပၥ်ဖျါတ့ၢ်လၢထးတဖၣ်အံၤ မ့ၢ်ဒၣ် R2Kတၢ်မၤနီၣ်စရီတဖၣ်အဖီခိၣ် တၢ်ပၥ်ဖျါထီၣ်၀ဲလီၤ. မ့မ့ၢ်ဟီၣ်ခိၣ်မဲၥ်ဖံးခိၣ်တခီ ကအါန့ၢ်ဒံးတၢ်ပၥ်ဖျါထီၣ်လၢထးတဖၣ်အဂ့ၢ်န့ၣ်လီၤ.
