သိလ့ၣ်လၢလဲၤပှ့ၤစဲးသိလၢမဲဆီးတဖၣ်အဃိ ရၤမတံဆူ မဲဆီးကျဲနုာ်လီၤ အပူၤကွံာ်ယံာ်ထဲ(၃)မံးနံး ဘၣ်ဆၣ်အခဲအံၤယံာ်လၢအနၣ်ရံၣ်

လါယနူၤအါရံၤ(၁၁)သီ,၂၀၂၅နံၣ်

ကညီကီၫ်စဲၣ်,၀့ၫ်ရၤမတံ ဆူ ကီၫ်ကၠီၣ်တဲၣ်,၀့ၫ်မဲဆီး တၫ်ကလဲၤအဂီၫ် သိလ့ၣ်ကျဲကတံာ်အဃိ ကၠီၣ်တဲၣ်-ပယီၤ ကီၫ်ဆၢတြဲၤလၢအမ့ၫ် တၫ်ရ့လိာ်မုာ်လိာ်တိၤ တၫ်ကခီဂာ်အီၤအဂီၫ် အပူၤကွံာ်ယံာ်ထဲ(၃)မံးနံးဧိၤလီၤဘၣ်ဆၣ် အခဲအံၤယံာ်လၢ(၃)နၣ်ရံၣ်ညါအဂ့ၫ် တၫ်သ့ၣ်ညါဘၣ်လၢလီၫ်က၀ီၤဖိတဖၣ်အိၣ်န့ၣ်လီၤ.

၀့ၫ်ရၤမတံန့ၣ် ကၠီၣ်တဲၣ်တကပၤ ဒီၣ်တဲာ်ကွံာ်စဲးသိဒီးလီမ့ၣ်အူအဃိ ဒ်တၫ်ဂ့ၫ်လၢပိာ်ထွဲထီၣ်အခံအသိး, ပှၤရၤမတံလီၫ်က၀ီၤဖိတဖၣ် လဲၤဆူ၀့ၫ်မဲဆီးဒီးလဲၤပှ့ၤစဲသိဒီးဟဲက့ၤဆါကဒါက့ၤ၀ဲအဃိ လၢတၫ်ခီတဲာ်ကီၫ်ဆၢတြဲၤတၫ်လီၫ်တဖၣ်အပူၤ စးထီၣ်ဖဲလါဖ့ၤဘြူၤအါရံၤ(၅)သီနံၤအလီၫ်ခံ သိလ့ၣ်ကျဲကတံာ်ဘၣ်ကဲထီၣ်၀ဲအဂ့ၫ် တဲ၀ဲလီၤ.

တၫ်န့ၣ်အဃိ စးထီၣ်ဖဲလါဖ့ၤဘြူၤအါရံၤ(၁၀)သီနံၤ,ဂီၤအကတီၫ်န့ၣ် လၢရၤမတံဒီးတၫ်ကလဲၤဆူ၀့ၫ်မဲဆီး ခီဖျိလၢ သိလ့ၣ်တဖၣ်န့ၣ် တသီန့ၣ်တၫ်ကဟ့ၣ်ခွဲးထဲ(၁)ဘျီအဂီၫ် လီၫ်က၀ီၤပှၤဘၣ်မူဘၣ်ဒါတဖၣ် ပာ်ပနီၣ်န့ၫ်၀ဲအဂ့ၫ် တၫ်သ့ၣ်ညါဘၣ်လီၤ.

“သိလ့ၣ်ကတံာ်တၫ်ခိၣ်သ့ၣ်န့ၣ် မ့ၫ်စဲးသိတၫ်ဂ့ၫ်ကီလီၤ.၀့ၫ်ရၤမတံပူၤ စဲသိကျးတဖၣ် တၫ်ကးတံာ်ကွံာ်အဃိ လဲၤပှ့ၤ ၀ဲဆူမဲဆီးလီၤ.တနီၤပှ့ၤ၀ဲအါအါအါဂီၫ်ဂီၫ်၀ံၤ ဟဲက့ၤဆါကဒါက့ၤ၀ဲလၢအံၤတပၤ လၢအပှ့ၤကလံၤဒိၣ်န့ၣ်လီၤ.ခီထီၣ် ခီလီၤကီၫ်ဆၢတြဲၤအိၣ်ထီၣ်(၃)ဘျီ,(၄)ဘျီအဃိ သိလ့ၣ်ကျဲကတံာ်လီၤ.

တၫ်ခီဂာ် ရၤမတံဒီးမဲဆီးကီၫ်ဆၢတြဲၤအပှ့ၤကလံၤန့ၣ် လၢကီၫ်ပယီၤတကပၤထၢ၀ဲ သိလ့ၣ်(၁)ခိၣ်,၅၀၀၀ကၠးဒီးပှၤနီၫ် တဂၤ ၅၀၀ကၠး၀ံၤ လၢကၠီၣ်တဲၣ်တကပၤ ပှၤကညီဒီးသိလ့ၣ်ပာ်ဃုာ်ခံခါလၢာ် ထၢ၀ဲ ၁၀၀ဘးအဂ့ၫ် တၫ်သ့ၣ်ညါဘၣ်လီၤ.

ကညီကီၫ်စဲၣ်,ရၤမတံဒီးရွှ့ၣ်ကိးကိာ်ဟီၣ်က၀ီၤပူၤ ကၠါဖျးတၫ်ဖံးတၫ်မၤတဖၣ် တၫ်ကဒုးလီၤပှီၫ်ကွံာ်အဂီၫ် ကၠီၣ်တဲာ်ပဒိၣ် ပတုာ်ကွံာ်တၫ်ဟ့ၣ်နီၤလီၤ လီမ့ၣ်အူ,စဲးသိဒီးအ့ၣ်ထၢၣ်နဲးတဖၣ်အဃိ ထံဖိကီၫ်ဖိကမျၢၫ်လၢတဘၣ်ထွဲ ဒီးကၠါဖျးတၫ်ဖံးတၫ်မၤတဖၣ် တၫ်ကီတၫ်ခဲဘၣ်အိၣ်ထီၣ်၀ံၤ သိလ့ၣ်ကျဲကတံာ်အသးစ့ၫ်ကီး မ့ၫ်တၫ်ဂ့ၫ်လၢဘၣ်ထွဲတခါအဂ့ၫ် တဲ၀ဲလီၤ.

“သိလ့ၣ်ကျဲကတံာ်အဃိ ပှၤလၢကလဲၤထီၣ်တၫ်ဆါဟံၣ်ဆူမဲဆီးလၢဂ့ၫ်ဂီၫ်အူတဖၣ် ထံၣ်ဘၣ်တၫ်ကီတခဲအသိး, ကၠိဖိ တဖၣ်စ့ၫ်ကီး ဘၣ်လဲၤထီၣ်ကၠိလၢတၫ်ဆၢကတီၫ်အဃိ တၫ်ကီတၫ်ခဲအိၣ်၀ဲလီၤ. သိလ့ၣ်တခိၣ်စုာ်စုာ် လၢပှ့ၤဆါသိတဖၣ် လဲၤ၀ဲတနံၤန့ၣ်(၆)ဘျီညါလီၤ.၀ံၤက့ၤဆါ၀ဲလၢအပှ့ၤကလံၤဖးဒိၣ်လီၤ. ဖဲပှၤအါဂၤထံဘၣ်တၫ်ကီတၫ်ခဲအကတီၫ် စိၤဟးဂီၤပှၤကဲဒိၣ်တဖၣ် မၤအီၣ်အဆၣ်ဧါအဂ့ၫ်”ပှၤ၀့ၫ်ရၤမတံဖိတဂၤတဲ၀ဲလီၤ.

ကီၫ်ကၠီၣ်တဲၣ်တကပၤ ကပတုာ်ကွံာ် တၫ်တီၣ်ဆှၢသိဆူ ကီၫ်ပယီၤကီၫ်ဆၢ၀့ၫ်တဖၣ်လၢအမ့ၫ် ရၤမတံ,ဃိၣ်သၢဖျၢၣ် ဒီးတၣ်ခၠံၣ်လ့း၀့ၫ်တဖၣ် လၢ(၆)လါအတီၫ်ပူၤအဂ့ၫ် ကၠီၣ်တဲၣ်တၫ်ဒီသဒၢကိတိာ်ခိၣ်ကျၢၫ် ဖူၣ်သၣ်၀ဲခၠးယခၠဲၣ်န့ၣ် ဖဲအပူၤကွံာ်လါဖ့ၤဘြူၤအါရံၤ(၇)သီအနံၤန့ၣ် တဲဘၣ်၀ဲကၠီၣ်တဲၣ်တၫ်ကစီၣ်သန့တဖၣ်၀ံၤအလီၫ်ခံ လၢကတီၫ်အံၤ ၀့ၫ်ရၤမတံအပူၤ စဲးသိတၫ်ကီတၫ်ခဲအိၣ်ထီၣ်၀ဲန့ၣ်လီၤ.

Ref:VOM