လါဖ့ၤဘြူၤအါရံၤ(၁၀)သီ,၂၀၂၅နံၣ်
လၢကၣ်စၣ်ဟီၣ်က၀ီၤ ယံာ်(၁)နံၣ်ဘျဲၣ် ဘၣ်တၫ်ဖီၣ်ဃာ်၀ံၤအလီၫ်ခံ ပှၤကၠီၣ်တဲၣ်ဖိ(၅)ဂၤ လၢဟဲက့ၤပူၤဖျဲးထီၣ် တဖၣ် ဟဲက့ၤတုၤဃီၤဆူ ၀့ၫ်ဘီကီာ်လံန့ၣ်လီၤ.ပှၤကီၫ်ကၠီၣ်တဲၣ်ဖိ(၅)ဂၤအံၤ ခီဖျိလၢတၫ်ဆီတလဲ ပှၤလၢဘၣ် တၫ်ဖီၣ်တဖၣ် တၫ်ရဲၣ်တၫ်ကျဲၤအဖီခိၣ် ဖဲအပူၤကွံာ်လါယနူၤအါရံၤ(၃၀)သီနံၤန့ၣ် ဘၣ်တၫ်ပျၫ်ကွံာ်၀ဲန့ၣ်လီၤ.
အ၀ဲသ့ၣ် အဟံၣ်ဖိဃီဖိတဖၣ်တကးဘၣ်,ကၠီၣ်တဲၣ်ထံဂုၤကီၫ်ဂၤကိတိာ် Maris Sangiampongsaဒီးဘၣ်ထွဲကီၫ်ကၠီၣ် တဲၣ် အံၣ်စရ့မီၫ်သီ Orna Sagivတဖၣ်စ့ၫ်ကီး လဲၤအိၣ်အ၀ဲသ့ၣ်လၢ ၀့ၫ်ဘီကီာ် သူး၀နဘူၣ်မိ ကဘီယူၤပျီ န့ၣ်လီၤ.
“ပဟဲက့ၤတုၤဘၣ်လၢပထံပကီၫ်အဃိ ပ၀ဲကိးဂၤဒဲးသူၣ်ခူသးခူ၀ံၤတၫ်အံၤအဂီၫ် ပ၀ဲကိးဂၤဒဲးပစံးဘျူးစံးဖှိၣ်ဘၣ် ဒိၣ်မးလီၤ”အဂ့ၫ် ပှၤဟဲက့ၤပူၤဖျဲးထီၣ်အကျါ သးနံၣ် ၃၆နံၣ်အိၣ် Pongsak တဲ၀ဲလီၤ.
ကီၫ်ကၠီၣ်တဲၣ်ထံဂုၤကီၫ်ဂၤကိတိာ်တခီ ကၠီၣ်တဲၣ်ပဒိၣ်တကပၤဒီးအတၫ်မုၫ်လၫ်တဖၣ် တမၤစၫ်လီၤ၀ဲနီတဘျီ ဘၣ်အဃိ တၫ်အစၢဟဲထီၣ်ဒ်သိးအံၤ၀ံၤ ပှၤဘၣ်တၫ်ဖီၣ်လၢအိၣ်တ့ၫ်တဖၣ်စ့ၫ်ကီး ကပူၤဖျဲးထီၣ်အဂီၫ် ကဂဲၤ လိာ်ကဒီး၀ဲအဂ့ၫ် တဲ၀ဲလီၤ.
တၫ်အံၤလၢကၣ်စၣ်တၫ်ဒုး စးထီၣ်လံၤလံၤအကတီၫ် ဒ်ပှၤခံဖုတဖုအသိး ကၠီၣ်တဲၣ်ဖိလၢ ဘၣ်တၫ်ဖီၣ်ဃာ်တဖၣ် တၫ်ပျၫ်ကွံာ်၀ဲန့ၣ်လီၤ.အပူၤကွံာ် ၂၀၂၃နံၣ် လါနိၣ်၀့ဘၢၣ် တၫ်ပတုာ်တၫ်ခးအဆၢကတီၫ် ခီဖျိ ကၣ်တၣ် ဒီးအံၣ်ရၣ် ထံကီၫ်တဖၣ်တၫ်မၤစၢၤအဖီခိၣ် ကၠီၣ်တဲၣ်ပဒိၣ်ဒီးဟါမးကရၢအဘၢၣ်စၢၤ ဒိးန့ၫ်တၫ်အၢၣ်လီၤတူၫ် လိာ်၀ံၤ,ပှၤကၠီၣ်တဲၣ် ထံဖိကီၫ်ဖိ(၂၃)ဂၤ ဟဲက့ၤဟးထီၣ်ဘၣ်န့ၣ်လီၤ.ဖဲ၂၀၂၃နံၣ်,လါအီးကထိဘၢၣ်(၇)သီနံၤ တၫ်ဒုးအပူၤ ဟါမးတဖၣ်န့ၣ် ဖီၣ်၀ဲပှၤကၠီၣ်တဲၣ်ဖိ(၃၁)ဂၤလၢအိၣ်ဖဲအံၣ်စရ့ကလံၤထံးတကပၤ၀ံၤ က့ၤဖီၣ်၀ဲန့ၣ်လီၤ.
