လါဖ့ၤဘြူၤအါရံၤ(၁၀)သီ,၂၀၂၅နံၣ်
တရူးထံဖိကီၢ်ဖိလၢ အဖံးမၤတၢ်လၢ ကၠီၣ်တဲၣ်-ပယီၤကီၢ်ဆၢ, ဃိၣ်သၢဖျၢၣ်၀့ၢ်ပူၤ,အိၣ်လဲတၢ်လံၣ်တၢ်လီ(ကၠါဖၠး)တၢ်ဖံးတၢ်မၤတဖၣ်, ကၣ်စံၣ်နိၣ်တၢ်လိၣ်ခိၣ်လိၣ်ကွဲတဖၣ်ဒီး တၢ်အီၣ်ကျးအပူၤတဖၣ်တၢ်ကပၥ်ဖ့ၤဘြူၤအါရံၤလါလၢၥ်ဒ်အစဲးခံကတၢၢ်ဒီးတၢ်ကဟးထီၣ်ဘၣ်အဂီၢ်ကညီတၢ်ဘၣ်ဘျူးဒံၣ်မိၣ်ကခြ့ၣ်စံၣ်သုးမုၢ်ဒိၣ်(DKBA),နီၣ်ဂံၢ်(၂) သုးတၢ်တိၥ်ကူၣ်ကျဲၤ ထုးထီၣ်ပၥ်ဖျါဃၥ်၀ဲဖဲ မဟါအနံၤန့ၣ်လီၤ.
ပှၤဖံးမၤကၠါဖၠးတၢ်ဖံးတၢ်မၤတဖၣ် ဒ်သိးအိၣ်သူၣ်လီၤအသးလၢ ဃိၣ်သၢဖျၢၣ်၀့ၢ်ပူၤသုတန့ၢ်အဂီၢ် ထုးထီၣ်ပၥ်ဖျါ၀ဲအသိး ပှၤတရူးထံဖီကီၢ်ဖိတဖၣ် တၢ်ဟဲနုၥ်လီၤသုတအဂီၢ်ဒီး တၢ်လူၤပိၥ်မၤထွဲမ့ၢ်တအိၣ်ဘၣ်န့ၣ် တၢ်ကဟံးန့ၢ်ဂ့ၢ်၀ီအဂ့ၢ် (DKBA)လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤန့ၣ်ဒ်သိးကတြီဆၢကၠါဖၠးတၢ်ဖံးတၢ်မၤအဂီၢ်ကၠီၣ်တဲၣ်တပၤဒီၣ်တဲၣ်ကွံၥ်လီမ့ၣ်အူဒီးမ့ၣ်အူအဆၣ်တဖၣ်အဃိ ဃိၣ်သၢဖျၢၣ်၀့ၢ်ပူၤအိၣ်ကမျၢၢ်တဖၣ် အမုၥ်ကျိၤ၀ဲၤကွၢ်တၢ်ဘၣ်ဒိဘၣ်ထံးကလီၤစှၤအဂီၢ် တၢ်ကမၤဖျါက့ၤဒ်သိး ကၠီၣ်တဲၣ်အတၢ်နၥ်န့လီၤသးကအိၣ်အဂီၢ်ဒီးကဒိးန့ၢ်က့ၤ လီမ့ၣ်အူဒီးစဲးဖီကဟၣ်သူသိတဖၣ် အဆိအချ့အဂီၢ် ကမၤ၀ဲအဂ့ၢ် DKBA စံး၀ဲန့ၣ်လီၤ.
ခီဖျိတၢ်ကဒုးလီၤပှီၢ်ကွံၥ် ကၠါဖၠးတၢ်ဖံးတၢ်မၤအဂီၢ် စးထီၣ်ဖဲလါဖ့ၤဘြူၤအါရံၤ(၅)သီအနံၤန့ၣ် ကၠီၣ်တဲၣ်ပဒိၣ် ဒီၣ်တဲၥ်ကွံၥ် လီမ့ၣ်အူဒီးမ့ၣ်အူအဆၣ်တဖၣ်အဃိ ကမျၢၢ်လၢအိၣ်ဖဲ တၣ်ခၠံၣ်လ့း, ရၤမတံ, ဃိၣ်သၢဖျၢၣ်လီၢ်က၀ီၤပူၤတဖၣ် ကဘၣ်လဲၤရဲၣ်လီၤအသး ပှ့ၤရ့ၣ်နီၣ်သိတဖၣ်အသိး တၢ်ဘၣ်ပှ့ၤအီၤလၢ ပနံၥ်သူတၢ်ဆါတၢ်ပှ့ၤအဃိ အပှ့ၤကလံၤဒိၣ်တလၢခၢးဒီး တၢ်လိၣ်ဘၣ်အဖီခိၣ် တၢ်ပှ့ၤ၀ဲတန့ၢ်ဘၣ်တဖၣ် ကဲထီၣ်၀ဲန့ၣ်လီၤ.
