လါဖ့ၤဘြူၤအါရံၤ(၁၀)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ဘံလ့ကီၢ်ဆၣ်ဟီၣ်က၀ီၤအပူၤ တၢ်ဒုးကဲထီၣ်သးတအိၣ်ဘၣ်ဒီး သုးကီၣ်ကး Jet Fighter လဲၤဒုးတၢ်လၢကလံၤကျါအဃိ ဘၣ်ဟးဂီၤကွံၥ်၀ဲ သီခါဖၠၣ်တၢ်သူၣ်ထီၣ်တဖၣ်ဒီးကမျၢၢ်အိၣ်ဟံၣ်ဃီတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
၂၀၂၅နံၣ်, လါဖ့ၤဘြူၤအါရံၤ(၉)သီအနံၤ, မုၢ်ထူၣ်(၁၂)နၣ်ရံၣ်အဆၢကတီၢ် သုးကီၣ်ကး Jet Fighter ဟဲတ့ၢ်လီၤပီၣ်(၅၀၀)အိၣ်မ့ၣ်ပိၢ် ဆူခ့ၣ်အဲၣ်ယူၣ်-ဘံလ့ကီၢ်ဆၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲမ့စီကရူၢ်, ထံဆံၣ်ဘီသ၀ီ သီခါဖၠၣ်ကရၢၢ်ပူၤန့ၣ်လီၤ.
တၢ်လဲၤတ့ၢ်လီၤ မ့ၣ်ပိၢ်အပူၤ ဘၣ်ဟးဂီၤကွံၥ်၀ဲ ထံဆံၣ်ဘီသ၀ီ ဃိၣ်ဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်အသိး ဟးဂီၤကွံၥ်၀ဲစ့ၢ်ကီး ကမျၢၢ်အိၣ်ဟံၣ်ဃီတၢ်သူၣ်ထီၣ်ခဲလၢၥ် (၁၇)ဖျၢၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ဖဲအပူၤကွံၥ် လါဖ့ၤဘြူၤအါရံၤ(၇)သီအနံၤ, မုၢ်ထူၣ်(၂)နၣ်ရံၣ်ဒီး(၃)နၣ်ရံၣ်ဘျဲၣ်အဘၢၣ်စၢၤ တၢ်ဒုးကဲထီၣ်သးတအိၣ်ဘၣ်ဒီး သုးကီၣ်ကး Jet Fighterလဲၤတ့ၢ်လီၤမ့ၣ်ပိၢ်(၁၀)ဖျၢၣ်ဆူ ဘံလ့ကီၢ်ဆၣ်, ရွ့ၣ်လီအ့ကရူၢ်အပူၤန့ၣ်လီၤ.
သုးကီၣ်ကးအသုး လဲၤတ့ၢ်လီၤမ့ၣ်ပိၢ်အပူၤ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ဘံလ့ကီၢ်ဆၣ်, ရွ့ၣ်လီအ့ကရူၢ်, နးကၠံသ၀ီရှါစူးပဲအကပၤ (၃)ဖျၢၣ်ဒီး အစူခၠီကရူၢ်, ခၠီသ၀ီချၢၣ်(၇)ဖျၢၣ်၀ံၤ နးကၠံသ၀ီရှါစူးပဲ သ၀ီဖိအဟံၣ်(၂)ဖျၢၣ်ဘၣ်ဟးဂီၤကွံၥ်၀ဲအသိး တၢ်သိၣ်လိကၠိတဖျၢၣ်စ့ၢ်ကီး ဘၣ်ဟးဂီၤကွံၥ်၀ဲ အဂ့ၢ် တၢ်သ့ၣ်ညါဘၣ်န့ၣ်လီၤ.
