လါဖ့ၤဘြူၤအါရံၤ(၇)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤ(၄)သီအနံၤန့ၣ် သုးဟံးန့ၢ်ဆူၣ်ထံကီၢ်ကီၢ်စိတၢ်ကမီၤ သုးကီၣ်ကး(ခမရ-၅၈၄)သုးရ့ၣ် အပှၤသုးဖိ(၄)ဂၤ ဟဲပၥ်လီၤစုက၀ဲၤဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်, (K.N.L.A) သုးရ့ၣ်(၉)အအိၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ် ပၥ်ဖျါဃၥ်၀ဲ ဖဲလါဖ့ၤဘြူၤအါရံၤ(၅)သီအနံၤန့ၣ်လီၤ.
သုးကီၣ်ကး(ခမရ-၅၈၄)သုးရ့ၣ် အပှၤသုးဖိ(၄)ဂၤလၢဟဲပၥ်လီၤစုက၀ဲၤအံၤ ဘၣ်တၢ်ထၢန့ၢ်ဆူၣ်သုးအဃိ ကဲထီၣ်သုးဖိန့ၣ်လီၤ. တကးဘၣ် ဖဲလၢဟဲပၥ်လီၤစုက၀ဲၤအဆၢကတီၢ် ဟဲစိၥ်ဃုၥ်စုက၀ဲၤတဖၣ်ဒ်အမ့ၢ် MA-4 လီၣ်ခၠၣ် (၁)ခိၣ်, MA-1 (၂)ခိၣ်, ကျိဆၣ်(၇၅)ဖျၢၣ်ဒီးကျိဆၣ်ဒၢ (၃)ဘ့ၣ်အဂ့ၢ် စံး၀ဲန့ၣ်လီၤ.
ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါတဖၣ်ဒီး သုးရ့ၣ်(၉)ပှၤဘၣ်မူဘၣ်ဒါတဖၣ် ဟ့ၣ်လၤကပီၤ ပှၤလၢဟဲပၥ်လီၤစုက၀ဲၤ(၄)ဂၤအံၤလၢ စ့ပယီၤ(၁၀)ကလီၢ် (၁)ဂၤစုၥ်စုၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ်၂၀၂၅နံၣ်,လါယနူၤအါရံၤ(၆)သီအနံၤန့ၣ်စ့ၢ်ကီးသုးကီၣ်ကးအစုတီၤဖီလၥ်(ခလရ-၂၈၈)အပှၤသုးဖိ(၂)ဂၤဟဲဟ့ၣ်လီၤသးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အအိၣ်ဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ပှၤသုးဖိလၢ သုဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ထၢန့ၢ်ဆူၣ်သုးဒီး ကဲထီၣ်သုးတဖၣ် ကဟဲပၥ်လီၤစုက၀ဲၤဆူ ကလုၥ်ဒူၣ်တၢ်ပၢၢ်ဆၢကရၢလၢ အဘူးဒီးအီၤတဖၣ်ဒီး ကမျၢၢ်တၢ်ဒီသဒၢသုးတဖၣ်အအိၣ်အဂ့ၢ်စ့ၢ်ကီး ခ့ၣ်အဲၣ်ယူၣ် ဆီၣ်တခူထီၣ်ဃၥ်၀ဲန့ၣ်လီၤ.
