လါဖ့ၤဘြူၤအါရံၤ(၇)သီ,၂၀၂၅နံၣ်
ကၠီၣ်တဲၣ်-ပယီၤကီၢ်ဆၢ ကညီသုးခိးကီၢ်ဆၢ(BGF)ဟီၣ်က၀ီၤတဖၣ်အပူၤ ပှၤကီၢ်ချၢဖိ(၂)ကထိဘျဲၣ်လၢ ဘၣ်တၢ်ကူလဲၢ်မၤကၤအီၤတဖၣ် တၢ်ဆဲးကျိးဆှၢက့ၤဆူ အကစၢ်ထံကီၢ်တဘ့ၣ်စုၥ်စုၥ်အဂ့ၢ် (BGF) ထုးထီၣ်ပၥ်ဖျါဃၥ်၀ဲဖဲ လါဖ့ၤဘြူၤအါရံၤ(၆)သီအနံၤန့ၣ်လီၤ.
BGF တခီ ကပၥ်ဖှိၣ်မၤသကိးတၢ်ဒီး သုးကီၣ်ကးဒီးထံဂုၤကီၢ်ဂၤတၢ်ကရၢကရိတဖၣ်၀ံၤ စးထီၣ်လၢ၂၀၂၃နံၣ်တုၤ၂၀၂၅နံၣ်,လါဖ့ၤဘြူၤအါရံၤ(၆)သီနံၤအတီၢ်ပူၤပှၤ(၂)ကထိဘျဲၣ်လၢဘၣ်တၢ်ကူလဲၢ်မၤအီၤတဖၣ် တၢ်ဆဲးကျိးဆှၢက့ၤဆူ ထံကီၢ်တဘ့ၣ်စုၥ်စုၥ်အဂ့ၢ်ဒီး တၢ်ကဒုးလီၤပှီၢ်ကွံၥ် ကွီၢ်မ့ၣ်တဖၣ်အဂ့ၢ်ကွဲးဖျါဃၥ်၀ဲန့ၣ်လီၤ.
တၢ်တတူၢ်လိၥ် တၢ်ကူလဲၢ်မၤကၤပှၤကညီ, တၢ်မၤကဘျံးကဘျၣ်, တၢ်မၤဆူၣ်မၤဆါ, တၢ်လံၣ်တၢ်လီတဖၣ်ဒီးတၢ်ဆါကသံၣ်မူၤဘှီၤတဖၣ်၀ံၤ ကမၤဖျါထီၣ်ဟံးန့ၢ်ဂ့ၢ်၀ီအဂ့ၢ် ပၥ်ဖျါဃၥ်၀ဲန့ၣ်လီၤ.
BGF တခီ တပၥ်ဖှိၣ်မၤသကိးတၢ်လၢ ထံဂုၤကီၢ်ဂၤတၢ်ဘျၢလီၤ တၢ်တိၥ်ကျၤဲတဖၣ်အပူၤတအိၣ်ဘၣ် ဒီး အိၣ်ဒၣ်ထဲလၢ ဒိးလဲလီၤဟီၣ်ခိၣ်လီၤအဂ့ၢ် စံး၀ဲန့ၣ်လီၤ. ပှၤဘျၢလီၤတၢ်တဖၣ်အကျါ တၢ်မၤကစၢ်တနီၤန့ၣ် မၤ၀ဲတၢ်လံၣ်အီၣ်လီအီၣ်တဖၣ်ဒီး တၢ်ကူလဲၢ်မၤကၤပှၤကညီတဖၣ်အဃိ ကပၥ်ဖှိၣ်မၤသကိးတၢ်ဒီး သုးကီၣ်ကးဒီးထံဂုၤကီၢ်ဂၤတၢ်ကရၢကရိတဖၣ်၀ံၤ ကဒုးလီၤပှီၢ်ကွံၥ်ကွီၢ်မ့ၣ်တဖၣ်အဂ့ၢ် ကွဲးဖျါဃၥ်၀ဲန့ၣ်လီၤ.
တကးဘၣ် ဖဲလါဖ့ၤဘြူၤအါရံၤ(၆)သီအနံၤန့ၣ် ပှၤကီၢ်ချၢဖိ(၆၁)ဂၤလၢ ဘၣ်တၢ်မၢန့ၢ်ဆူၣ်အီၤလၢ အိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤပူၤတဖၣ် (BGF) ဆီတလဲဟ့ၣ်လီၤဆူ ကၠီၣ်တဲၣ်သုးမုၢ်ဒိၣ်အစုပူၤအဂ့ၢ်န့ၣ်လီၤ.
ကညီတၢ်ဘၣ်ဘျူးဒံၣ်မိၣ်ကခြ့ၣ်စံၣ်သုးမုၢ်ဒိၣ်(DKBA)စ့ၢ်ကီး တတူၢ်လိၥ် တၢ်ကူၤလဲၢ်မၤကၤပှၤကညီဒီး တၢ်မၤဆူၣ်မၤဆါတဖၣ်အဃိ ကပၥ်ဖှိၣ်မၤသကိးတၢ်ဒီးထံဂုၤကီၢ်ဂၤ၀ံၤ ကဒုးလီၤပှီၢ်ကွံၥ်အဂ့ၢ် ထုးထီၣ်ပၥ်ဖျါဃၥ်၀ဲ ဖဲလါဖ့ၤဘြူၤအါရံၤ(၅)သီအနံၤန့ၣ်လီၤ.
၂၀၂၃နံၣ် ဘီမုၢ်စၢဖှိၣ်ကရၢ အလံၥ်ပၥ်ဖျါပူၤတခီ ကၠီၣ်တဲၣ်-ပယီၤကီၢ်ဆၢပၥ်ဃုၥ် အ့ရှၢမုၢ်ထီၣ်ကလံၤထံးဟီၣ်က၀ီၤ တၢ်လံၣ်တၢ်လီတၢ်ဖံးတၢ်မၤတဖၣ်အပူၤ ပှၤအကလီၢ်အါအါဂီၢ်ဂီၢ် ဟဲတုၤအိၣ်သ့အဂ့ၢ် ဒီး တၢ်ဖံးတၢ်မၤတဖၣ်အပူၤ စ့ဟဲနုၥ်လီၤ အမဲရကၤဒီၣ်လၣ် ဘံၣ်လံၣ်ယၣ်ဃၥ်ဃၥ်သ့အဂ့ၢ် ပၥ်ဖျါဃၥ်၀ဲန့ၣ်လီၤ.
