လါယနူၤအါရံၤ(၄)သီ,၂၀၂၅နံၣ်
ဖဲအပူၤကွံၥ် ၂၀၂၄နံၣ်(၁)နံၣ်အတီၢ်ပူၤ ကီၢ်ကရ့ၣ်နံၣ်ဟီၣ်က၀ီၤတဖၣ်အပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးတဖၣ် မၤကမၣ်ပှၤဂ့ၢ်၀ီခွဲးယၥ်တဖၣ်အဃိ လီၢ်က၀ီၤကမျၢၢ် ဘၣ်သံ၀ဲ(၁၀၆)ဂၤ၀ံၤ ဘၣ်ဒိ၀ဲ(၂၃၆)ဂၤအဂ့ၢ် ကရ့ၣ်နံၣ်ပှၤဂ့ၢ်၀ီခွဲးယၥ်ကရူၢ်(KnHRG) ပၥ်ဖျါဃၥ်၀ဲ ဖဲလါယနူၤအါရံၤ(၃)သီအနံၤန့ၣ်လီၤ.
လၢလံၥ်ပၥ်ဖျါအပူၤ ပၥ်ဖျါဃၥ်၀ဲလၢ လီၢ်က၀ီၤကမျၢၢ်တဖၣ် ဘၣ်တၢ်ပညိၣ်ဒုးအီၤ ကလံၤကျါတၢ်ဒုးတဖၣ်, တၢ်ခးအီၤလၢကျိဖးဒိၣ်တဖၣ်ပၥ်ဃုၥ် ခီဖျိတၢ်ဒိးလီၤမ့ၣ်ပိၢ်တဖၣ်အဃိ ဘၣ်သံဘၣ်ပှၢ်ဒီးဘၣ်ဒိဘၣ်ထံး၀ဲအဂ့ၢ်န့ၣ်လီၤ.
တကးဘၣ် ခီဖျိလၢတၢ်ဒုးတၢ်ယၤတဖၣ်အဃိ ကီၢ်ကရ့ၣ်နံၣ်အပူၤ ထံလီၢ်ကီၢ်ပူၤပှၤလီၢ်အိၣ်ကမှံဖိ အိၣ်ထီၣ်တုၤ(၂၁၀,၀၀၀)၀ံၤ ဟဲအါဒိၣ်န့ၢ်ဒံး အပူၤကွံၥ်၂၀၂၃နံၣ်အဂ့ၢ် စံး၀ဲန့ၣ်လီၤ.
ခီဖျိတၢ်ဒုးတၢ်ယၤတဖၣ်အဃိ ပိၥ်မုၣ်ဒီးဖိသၣ်တဖၣ် ဘၣ်ကွၢ်ဆၢၣ်မဲၥ်ဘၣ် တၢ်ကီတၢ်ခဲအနးကတၢၢ်အသိး ဘၣ်ကွၢ်ဆၢၣ်မဲၥ်ဘၣ် စ့ၢ်ကီးနီၢ်သးတၢ်ကီတၢ်ခဲတဖၣ်အဂ့ၢ် စံး၀ဲန့ၣ်လီၤ. တကးဘၣ် ခီဖျိတၢ်ဒီၣ်တဲၣ်ဃၥ် စ့မၤဘူၣ်လၢတၢ်ဆီၣ်ထွဲမၤစၢၤ ပှၤလီၢ်အိၣ်ကမှံဖိတဖၣ်အဃိ တၢ်ဆီၣ်ထွဲမၤစၢၤန့ၢ်ဒၣ်ထဲဒၣ်လၢ တၢ်အဒူၣ်အဆၢအတကွီၢ်ပူၤလီၤအဂ့ၢ် စံး၀ဲန့ၣ်လီၤ.
လၢတၢ်န့ၣ်အဃိ ဟီၣ်ခိၣ်ဘီမုၢ်တဖၣ် ကဆီၣ်ထွဲမၤစၢၤဘၣ်ကီၢ်ပယီၤဂ့ၢ်၀ီအဂီၢ်ဒီး ဒ်န့ၣ်အသိး တၢ်ကဟံးန့ၢ်ဂ့ၢ်၀ီလၢ သုးကီၣ်ကးမၤကမၣ် သုးကွီၢ်မ့ၣ်တဖၣ်အဖီခိၣ်အဂ့ၢ်စ့ၢ်ကီးဃ့ထီၣ်ဃၥ်၀ဲန့ၣ်လီၤ.
လၢန့ၣ်အမဲၥ်ညါ တၢ်ကပတုၥ်ကွံၥ် တၢ်ဆါလီၤစုက၀ဲၤတဖၣ်ဒီး ကဘီယူၤသိတဖၣ်ဆူ သုးကီၣ်ကးအဂီၢ်စ့ၢ်ကီး ဃ့ထီၣ်ဃၥ်၀ဲန့ၣ်လီၤ.
