ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ကီၢ်ဆၣ်ကၠဲးထိၣ်ဒီးဘံလ့ကီၢ်ဆၣ်အပူၤ လါဖ့ၤဘြူၤအါရံၤ(၁)သီအနံၤန့ၣ် ခီဖျိသုးကီၣ်ကးအသုး ခးလီၤကျိဖးဒိၣ်ဒီးဒြိတဖၣ်အဃိ လီၢ်က၀ီၤကမျၢၢ်လၢတၢ်ကမၣ်တအိၣ် ဘၣ်သံ၀ဲ(၁)ဂၤဒီး ဘၣ်ဒိ၀ဲ(၉)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅နံၣ်,လါယနူၤအါရံၤ(၁)သီနံၤ တၫ်လဲၤဒုးသုးကီၣ်ကးအသုးကလၢၤ (ခမရ-၃)အံၤလၢ စဲးပြဲာ်တၫ်ဒုးအဃိ ဖဲ (၁၀) နၣ်ရံၣ်အဆၢကတီၫ်န့ၣ် သုးကီၣ်ကး နီၫ်ဂံၫ်(၄၄)ခီၣ်ချ့သုးရ့ၣ် အစုတီၤဖီလာ် (ခလရ-၈) ခးလီၤကျိ ဖးဒိၣ် (၁၅)ဖျၢၣ်ဃၣ်ဃၣ်ဒီး (ခမရ-၃)ခးလီၤ၀ဲ(၁၃)ဖျၢၣ်ဃၣ်ဃၣ်အဃိ လဲၤလီၤတဲာ်ပိၫ်ဖးထီၣ်၀ဲ ဖဲခ့ၣ်အဲၣ် ယူၣ်တၫ်ပၢဟီၣ်က၀ီၤ, ကၠဲးထိၣ်ကီၣ်ဆၣ် မဲလၣ်သ၀ီကရူၫ်ဒီးခၠီပၠးကရူၢ်ပူၤအသိး လဲၤလီၤတဲၥ်စ့ၢ်ကီးလၢ ဘံလ့ကီၫ်ဆၣ်,ကၠါကွ့သ၀ီကရူၫ်ဒီးကစဲကရူၢ်ပူၤ အဂ့ၢ်တၢ်သ့ၣ်ညါဘၣ်လၢ ကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
တၢ်န့ၣ်အဃိ တည့ကိသ၀ီဖိလၢအမ့ၢ် ဒီၣ်သါနူး,သးနံၣ်(၆၂)နံၣ် ကျိဖးဒိၣ်အချံလီၤတဲာ်ပိၫ်ဖးဘၣ်သံ၀ဲအသိး အူတုးလုး, သးနံၣ် (၅၃)နံၣ်ဒီးဒီၣ်စၣ်ဒၣ်မိ,သးနံၣ်(၄၂)နံၣ် ဘၣ်ဒိဘၣ်ထံး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ကမျၢၢ်ဟံၣ်ဃီတဖၣ် ကျိဖးဒိၣ်အချံဘၣ်ဒီးဟးဂီၤ၀ဲ တကးဘၣ် ကၠါကွ့သ၀ီဖိ အူပ့ၣ် အကျီၫ်ဘၣ်သံ(၁)ဒု,ဘၣ်ဒိ(၁)ဒု,ထိးဘၣ်သံ(၅)ဒုအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅နံၣ်,လါယနူၤအါရံၤ(၁)သီနံၤ (၇း၃၄) နၣ်ရံၣ်အကတီၫ် သုးကီၣ်ကးအသုးနီၫ်ဂံၫ်(၃၁၀) ကျိဖးဒိၣ်သုး ခးလီၤနါစိၤကျိဖးဒိၣ်အချံ(၁)ဖျၢၣ်အဃိ လီၤတဲာ်ပိၫ်ဖးထီၣ်၀ဲ ဖဲကၠဲးထိၣ်ကီၫ်ဆၣ်,ခရွဲသ၀ီကရူၫ်,လ့ၣ်မ့ၣ်အူကျဲ တၫ်မၤလၢၫ်အကပၤ ရီဘၢၣ်ကျီးအဃိ ရီဘၢၣ်ပှၤမၤတၫ်ဖိ(၂)ဂၤ ကျိဖးဒိၣ်အချံဘၣ်အီၤဒီးဘၣ်ဒိ၀ဲန့ၣ်လီၤ.
တနံၤဃီဖဲ(၁၁း၃၀)နၣ်ရံၣ်အကတီၫ် သုးကီၣ်ကးအသုးနီၫ်ဂံၫ်(၄၄) ခီၣ်ချ့သုးရ့ၣ်အစုတီၤဖီလာ် (ခမရ-၂၀၇) တ့ၫ်လီၤဒြိမ့ၣ်ပိၫ် ဖဲကၠဲးထိၣ်ကီၫ်ဆၣ်,ခရွဲသ၀ီကရူၫ်,သိခွးသ၀ီပူၤ ကျဲမုၫ်ကပၤအဃိ ကမျၢၫ်ဟံၣ်ဃီဟးဂီၤ (၁)ဖျၢၣ် ဒီး ကမျၢၢ်ဖိ ဘၣ်ဒိ၀ဲ(၄)ဂၤန့ၣ်လီၤ.
လၢန့ၣ်အမဲၥ်ညါ မၤကဒီးဖဲ(၅)နၣ်ရံၣ်အကတီၫ် သုးကီၣ်ကးအသုး၀ဲန့ၣ် တ့ၫ်လီၤကဒီးမ့ၣ်ပိၫ်လၢဒြိ ဖဲသ၀ီအံၤအပူၤအဃိ သ၀ီဖိ အီၣ်စ့ၣ်အူ,သးနံၣ်(၂၃)နံၣ်,အခိၣ်သၣ်ဃံဘၣ်ဒိဘၣ်ထံးလီၤ.
စးထီၣ်ဖဲအပူၤကွံၥ်လါယနူၤအါရံၤထီၣ်န့ၣ် ဒူသထူၣ်ကီၢ်ရ့ၣ်ဟီၣ်က၀ီၤအပူၤ သုးကီၣ်ကးအသုးတဖၣ် ပညိၣ်ဒုးကမျၢၢ်လၢ ကလံၤကျါတၢ်ဒုးမ့ၢ်ဂ့ၤ, ဒြိတၢ်ဒုးမ့ၢ်ဂ့ၤဒီးခးလီၤကျိဖးဒိၣ်တဖၣ်အဃိ ကမျၢၢ်သံဘၣ်ဒိဘၣ်ထံးတကးဒံးဘၣ်အမဲၥ်ညါဟံၣ်ဟီတၢ်သူၣ်ထီၣ်,တၢ်ဖံးအီၣ်မၤအီၣ်လီၢ်ကျီးပူၤတၢ်မုၢ်တၢ်ဘိဃုၥ်ဒီးဆၣ်ဖိကီၢ်ဖိသ့ၣ်တဖၣ်သံဘၣ်ဒိဘၣ်ထံးဟးဂီၤကဲထီၣ်သး ခဲအံၤခဲအံၤအဂ့ၢ်န့ၣ် တၢ်သ့ၣ်ညါဘၣ်န့ၣ်လီၤ.
