လါဖ့ၤဘြူၤအါရံၤ(၃)သီ,၂၀၂၅နံၣ်
အမဲရကၤန့ၣ် ခဲနဒၣ်,မဲးကစံးကိၣ်ဒီးတရူးထံကီၫ်တဖၣ် အတၫ်သွီနုာ်ပနံာ်တဖၣ်အဖီခိၣ် ဘၣ်ထွဲဒီး အတၫ်ထၢတၫ်ခိတၫ်သွဲတၫ်ဂ့ၫ်န့ၣ် ထံကီၫ်လၢဘၣ်ထွဲတဖၣ် ရဲၣ်ကျဲၤ၀ဲလၢကခီၣ်ဆၢကဒါက့ၤ၀ဲအဂီၫ်န့ၣ်လီၤ.
ပှၤဟဲနုာ်လီၤဆူ အမဲရကၤကီၫ်ပူၤလၢတဖိးသဲစးအကျဲဒီးတၫ်မူၤတၫ်ဘှီးတဖၣ်နုာ်လီၤအဖီခိၣ် တဲ၀ဲလၢ တြီဆၢ၀ဲတန့ၫ်ဘၣ်အဃိ ပနံၣ်လၢ ခဲနဒၣ်ဒီးမဲးကစံးကိၣ် သွီနုာ်၀ဲတဖၣ်န့ၣ် တၫ်ကထၢ၀ဲ ၂၅မျးကယၤ ဒီးမ့မ့ၫ်တရူးပနံာ်တဖၣ်တခီတၫ်ကထၢ၀ဲအမျးကယၤ (၁၀)အဂ့ၫ် ဒီနၢၣ်ထရၢးထုးထီၣ်တၫ်ကလုၫ်န့ၣ်လီၤ.
ခဲနဒၣ်,မဲးကစံးကိၣ်ဒီးတရူးထံကီၫ်တဖၣ်န့ၣ် အပူၤကွံာ်နံၣ်အပူၤ တီၣ်သွီနုာ်ပနံၣ်ဆူအမဲရကၤကီၫ်ပူၤ အိၣ်၀ဲ(၄၀)မျးကယၤညါန့ၣ်လီၤ.ကီၫ်ခဲနဒၣ်ကိတိာ်ခိၣ်ကျၢၫ် လၢတဲဃာ်၀ဲလၢ ထရၢးမ့ၫ်မၤဃံးထီၣ်တၫ်ခိတၫ်သွဲန့ၣ် ကခီၣ်ဆၢ၀ဲအဂ့ၫ်ဒီးဘၣ်ထွဲဒီးတၫ်ဂ့ၫ်အံၤအဖီခိၣ် ကထုးထီၣ်ဘိးဘၣ်ရၤလီၤ၀ဲအိၣ်န့ၣ်လီၤ.
မဲးကစံးကိၣ် မုာ်ကျိၤ၀ဲၤကွာ်ကိတိာ်ခိၣ်ကျၢၫ်တခီ ဘၣ်ထွဲဒီးအမဲရကၤ မၤဃံးထီၣ်တၫ်ခိတၫ်သွဲအဖီခိၣ် လၢကတီၫ်အံၤတတဲဖျါထီၣ်၀ဲနီတမံၤဒံးဘၣ်ဆၣ် ကခီၣ်ဆၢကဒ်က့ၤ၀ဲခီဖျိလၢ တၫ်ထၢကဒါက့ၤ တၫ်ခိတၫ်သွဲအိၣ်၀ဲအဂ့ၫ် ပဒိၣ်ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
မ့မ့ၫ်တရူးတခီ ဘၣ်ထွဲဒီးအမဲရကၤအတၫ်မၤအံၤအဖီခိၣ် ကတၢၣ်၀ဲဆူ ထံဂုၤကီၫ်ဂၤတၫ်ကူၣ်လဲၫ်မၤကၤကရၢအိၣ် လၢတၫ်ကဘှါဆှဲန့ၫ်၀ဲအဂီၫ်အဂ့ၫ် ဘိးဘၣ်ရၤလီၤ၀ဲဒီးတၫ်အံၤမ့ၫ်တၫ်မၤကမၣ် ထံဂုၤကီၫ်ဂၤ တၫ်ကူၣ်လဲၫ်မၤကၤကရၢ အတၫ်ဘျၢတဖၣ်အဂ့ၫ် တရူးစံးအၢဃာ်၀ဲလီၤ.
တၫ်ထၢတၫ်ခိတၫ်သွဲဒ်သိးအံၤန့ၣ် ထီဒါ၀ဲဆူၣ်ဆူၣ်ကိၤကိၤအဂ့ၫ်ဒီး တရူးထံကီၫ်နီၫ်ကစၫ်တၫ်ခွဲးတၫ် ယာ်ဒီးတၫ်ဘၣ်ဘျူးတဖၣ် ကဒီသဒၢန့ၫ်၀ဲအဂီၫ် ကမၤ၀ဲတၫ်ခီၣ်ဆၢတၫ်ရဲၣ်တၫ်ကျဲၤတဖၣ်အဂ့ၫ် တရူးထံဂုၤကီၫ်ဂၤကိတိာ်၀ဲၤကျိၤ ဘိးဘၣ်ရၤလီၤ၀ဲလီၤ.
