လါဖ့ၤဘြၤအါရံၤ(၃)သီ,၂၀၂၅နံၣ်
ရၢၫ်ခၢၣ်-အ့ၣ်ယၣ်၀တံၣ်အဆၢ သုးကီၣ်ကးအပွဲးသုးကလၢၤ(၂)ဖျၢၣ် ရၢၫ်ခၢၣ်သုးမုၫ်ဒိၣ်(AA) ထီၣ်ဒုးမၤန့ၫ်၀ံၤအလီၫ်ခံ အ့ၣ်ယၣ်၀တံၣ်အဆၢ ရၢၫ်ခၢၣ်ရိမးဒီတကျိၤ သုးကီၣ်ကးဒုး၀ဲလၢကလံၤကျါအဃိ လီၫ်က၀ီၤဖိတဖၣ် ဘၣ်ဃ့ၫ်ပူၤဖျဲးအသးန့ၣ်လီၤ.
အ့ၣ်ယၣ်၀တံၣ်ကီၫ်ခီပူၤ သုးကီၣ်ကးအပွဲး (၃၆၉)ဒီး(၂၆၃) သုးကလၢၤတဖၣ် ဖဲလါယနူၤအါရံၤ(၂၁)သီဒီး(၂၆)သီအနံၤန့ၣ် AAထီၣ်ဒုးမၤန့ၫ်၀ဲ၀ံၤအလီၫ်ခံ သုးကီၣ်ကးန့ၣ် ဖဲလါယနူၤအါရံၤ(၂၈)သီနံၤတုၤလါဖ့ၤဘြူၤ အါရံၤ(၁)သီနံၤန့ၣ် ဒုးခး၀ဲအ့ၣ်ယၣ်၀တံၣ်အဆၢ ရၢၫ်ခၢၣ်ရိမးလၢကလံၤကျါန့ၣ်လီၤ.
လီၫ်က၀ီၤဖိတဂၤတဲ၀ဲလၢ”ခးလီၤတၫ်လၢကလံၤကျါတပယူာ်ဃီလီၤ.အ့ၣ်ယၣ်၀တံၣ်-ရၢၫ်ခၢၣ်ကီၫ်စဲၣ်အဆၢ ဒူသ၀ီပူၤသ၀ီဖိတဖၣ် ဃ့ၫ်ဟးထီၣ်ခဲလၢာ်လီၤ. ထံၣ်ဘၣ်လၢဟံၣ်ဃီမ့ၣ်အူအီၣ်လီၤ. တၫ်ဘၣ်ဒိဘၣ်ထံးဒီး တၫ်သံတၫ်ပှၫ်တခီတသ့ၣ်ညါဒံးဘၣ်အဂ့ၫ်”တဲ၀ဲလီၤ.
သုးကီၣ်ကးန့ၣ် လၢရၢၫ်ခၢၣ်ရိမးဒီတကျိၤ ဒုးခးလီၤ၀ဲလၢကလံၤကျါအသိး လၢအ့ၣ်ယၣ်၀တံၣ်ကီၫ်ခီပူၤ သၣ်ပီကီၫ်ဆၣ်ဒီးယ့ၣ်ကၠံၣ်ကီၫ်ဆၣ်တဖၣ်လၢဘျးစဲဒီးရၢၫ်ခၢၣ်စ့ၫ်ကီး မၤအါထီၣ်ကလံၤကျါ ဒုးယၤတဖၣ် န့ၣ်လီၤ.
ပှၤလၢအိၣ်ဘူးဒီးသုးကီၣ်ကးအသုးတဂၤတဲ၀ဲလၢ “သုးကီၣ်ကးဒုးခးလီၤတၫ်လၢ ကဘီယူၤဒုးသုးတဖၣ် လီၤ.သုးကလၢၤတဖၣ်AAထီၣ်ဒုးမၤန့ၫ်အဃိ သုးကီၣ်ကးတကပၤ ပာ်ဂံၫ်ပာ်ဘါကလံၤကျါဒီး ဒုးခးလီၤတၫ် လီၤ.ရၢၫ်ခၢၣ်အ့ၣ်ယၣ်၀တံၣ်အဆၢ ယ့ၣ်ကၠ့ၣ်,သၣ်ပီတကပၤ တၫ်ဟးဂုၤဟးဂီၤအိၣ်၀ဲအဂ့ၫ်” တဲ၀ဲလီၤ.
AAအတၫ်ထီၣ်ဒုးတဖၣ်အဃိ သုးကီၣ်ကးန့ၣ် လၢသၣ်ပီဒီးယ့ၣ်ကၠံၣ်ကီၫ်ဆၣ်အဆၢ ရၢၫ်ခၢၣ်ရိမးကစၫ်ဖီခိၣ် လူၤကွၫ်ဟုၣ်တၫ်ဒီးကဘီယူၤ MI 35တခိၣ်အဂ့ၫ် ပသံၣ်ကီၫ်ဆၣ် စဲးပြဲာ်သုးအတၫ်ကစီၣ်သုးလီၤဆီကရၢ တၫ်ဘိးဘၣ်ရၤလီၤအဖီခိၣ်တၫ်သ့ၣ်ညါဘၣ်လီၤ.
ရၢၫ်ခၢၫ်ရိမးကစၢၫ်ဒိတကျိၤ သုးကီၣ်ကးအသုးကလၢၤလၢအိၣ်တ့ၫ်တဖၣ် AAထီၣ်ဒုးဃီၤ၀ဲအသိး သုးကီၣ်ကးတကပၤစ့ၫ်ကီး ထီၣ်ဒုးဃီၤတၫ်လၢပကိတကပၤအဃိ ခံကပၤတၫ်ဒုးဆူၣ်၀ဲအဂ့ၫ် တၫ်သ့ၣ်ညါဘၣ်လီၤ.
Ref: DVB
