လါဖ့ၤဘြူၤအါရံၤ(၃)သီ,၂၀၂၅နံၣ်
သုးကီၣ်ကးအပှၤသုးဖိလၢ ဟဲက့ၤဂုၥ်အခံလၢ ရွ့ၣ်သီၣ်ယၣ်တဖၣ် တၢ်ဆှၢအီၣ်ဆူ တၢ်ဒုးကဲထီၣ်အလီၢ် ကွး-ကသဲခၠီတပၤ၀ံၤ သုးရ့ၣ်ခိၣ်ဒီးသုးရ့ၣ်ခိၣ်ခံ ဃ့ၢ်ပဒ့ၣ်အသးအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကး အပှၤသုးဖိလၢအိၣ်ဖဲရွ့ၣ်သီၣ်ယၣ်(ခလရ-၁၁)တဖၣ် ဃ့ၣ်ဖျိးကွံၥ်သးအိၣ်အါထီၣ်အဃိ ကိးက့ၤ၀ဲ၀ံၤ တၢ်ဆှၢအီၤဆူ တၢ်ဒုးကဲထီၣ်သးအလီၢ် ကွး-ငသဲခၠီတဖၣ်အပူၤ အပှၤသုးဘၣ်သံ၀ဲ(၆၀)ဂၤဃၥ်ဃၥ်ဒီး ဘၣ်ခီၣ်ဆၢဒုးက့ၤအီၤလၢ အဂံၢ်အဘါ(၂၀)ဃၥ်ဃၥ်အဃိ အသုးရ့ၣ်ခိၣ်ဒီးသုးရ့ၣ်ခိၣ်ခံတဖၣ် ဃ့ၢ်ပဒ့ၣ်သးအဂ့ၢ် တၢ်သ့ၣ်ညါဘၣ်န့ၣ်လီၤ.
သုးရ့ၣ်ခိၣ်ဒီးသုးရ့ၣ်ခိၣ်ခံ ဃ့ၢ်ပဒ့ၣ်သး၀ံၤအလီၢ်ခံ သုးကီၣ်ကးဖီၣ်ဃံး အဟံၣ်ဖိဃီဖိတဖၣ်အဃိ ဘၣ်ဟဲက့ၤတီခိၣ်ရိၣ်မဲနဲၣ်လီၤတၢ်လၢ တၢ်လီၢ်ခံသုးရ့ၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
“၀ါယါခၠီ ခလရ ၁၁ အသးဟးဂီၤလံ. အပှၤတအိၣ်ဘၣ်. ၀ါယါခၠီဒီးကစ့တီ တၢ်မ့ၢ်ဒုးအီၤန့ၣ် ခလရ ၃၀၈စ့ၢ်ကီး အပှၤအဂံၢ်အဘါတအိၣ်ဘၣ်ဆၣ် ကဘၣ်ခီၣ်ဆၢဒုးက့ၤတၢ်လီၤအဂ့ၢ်” သၣ်ပီလီၢ်က၀ီၤဖိတဂၤ စံး၀ဲန့ၣ်လီၤ.
သုးကီၣ်ကးဘၣ်ယိၣ်တၢ်လၢ တၢ်ကဒုးအသုးကလၢၤတဖၣ်လၢအိၣ်ဖဲ သၣ်ပီကီၢ်ဆၣ်ပူၤအဃိ သူ၀ဲအသုးအဂံၢ်အဘါတနီၤ၀ံၤ ဆီလီၤဃၥ်တၢ်ဘံၣ်တၢ်ဘၢ ဖဲသၣ်ပီ-ယ့ၣ်နးသၣ်ကျဲမုၢ်အဖီခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ဖဲကၠဲးသိၣ်ကွ့ ကျဲဂၥ်တဲၥ်တၢ်သမံးသမိးတြဲၤအလီၢ်စ့ၢ်ကီး ဂၢၤဃၥ်၀ဲ၀ံၤ ခူၣ်ပၥ်တၢ်ပူၤတဖၣ်ဒီး ကတဲၥ်ကတီၤဃၥ်၀ဲ တၢ်ခီၣ်ဆၢဒုးတၢ်အဂီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
လီၢ်က၀ီၤကမျၢၢ်ဖိလၢ အိၣ်ဖဲသၣ်ပီကီၢ်ဆၣ်ပူၤတဖၣ် ဘၣ်ယိၣ်တၢ်လၢ တၢ်ဒုးကကဲထီၣ်သးအဃိ အဲၣ်ဒိးသုးလီၢ်သုးကျဲဃ့ၢ်ပူၤဖျဲးသးဘၣ်ဆၣ် ခီဖျိကီၢ်ဆၣ်၀ဲၤဒၢး ပၥ်လီၤဃၥ်တၢ်ကလုၢ်လၢ တၢ်မ့ၢ်ဃ့ၢ်ပူၤဖျဲးသးန့ၣ် တၢ်ကကးတံၥ်ကွံၥ် ဟံၣ်တဖၣ်အဃိ တၢ်ကဃ့ၢ်ပူၤဖျဲးသးအဂီၢ် ကီခဲ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Ayeyarwaddy Times
