လါယနူၤအါရံၤ(၂၈)သီ,၂၀၂၅နံၣ်
ရၢၫ်ခၢၣ်ကီၫ်စဲၣ်ဒီးပကိကီၫ်ခီအဆၢလၢအမ့ၫ် တီၣ်ကိးကီၫ်ဆၣ်,သုးကီၣ်ကးအမိထံးအီၣ်သုးကလၢၤန့ၣ် ဖဲလါယနူၤအါရံၤ(၂၇)သီနံၤန့ၣ် ရၢၫ်ခၢၣ်သုးမုၫ်ဒိၣ်(AA)ထီၣ်ဒုးမၤန့ၫ်၀ဲအဂ့ၫ် ပာ်ဖျါ၀ဲလီၤ.
မိထံးအီၣ်သုးကလၢၤလၢအိၣ်ဖဲရၢၫ်ခၢၣ်ရိမးအဖီခိၣ်အံၤ တၫ်ကထီၣ်ဒုးန့ၫ်အီၤအဂီၫ် စးလၢလါယနူၤအါရံၤ (၂၁)သီနံၤ,ဂီၤအကတီၫ်န့ၣ် AAထီၣ်ဒုး၀ဲ၀ံၤ ယံာ်(၅)သီ, ဖဲလါယနူၤအါရံၤ(၂၆)သီ,ဂီၤန့ၣ် ထီၣ်ဒုးမၤန့ၫ်၀ဲအဂ့ၫ် AAတၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
တၫ်ထီၣ်ဒုးမၤန့ၫ်သုးကလၢၤတဘျီအံၤ တၫ်မၤန့ၫ်၀ဲသုးတၫ်ပီးတၫ်လီ, တၫ်စုက၀ဲၤတဖၣ်ဒီး သုးကီၣ်ကး အပှၤ သုးဖိလၢသံအစိၣ်တဖၣ်န့ၣ်လီၤ.
ရၢၫ်ခၢၣ်ရိမးကစၢၫ်ဖီခိၣ် သုးကီၣ်ကးအသုးကလၢၤလၢအိၣ်တ့ၫ်တဖၣ် ရၢၫ်ခၢၣ်သုးမုၫ်ဒိၣ်(AA) ထီၣ်ဒုးဃီၤ ၀ဲ၀ံၤ သုးကီၣ်ကးအသုးစ့ၫ်ကီး ထီၣ်ဒုးဃီၤစ့ၫ်ကီးတၫ်လၢပကိကီၫ်ခီတပၤအဃိ တၫ်ဒုးကဲထီၣ် ကိးမုၫ်နံၤဒဲး အဂ့ၫ် AAတဲ၀ဲလီၤ.
လၢရၢၫ်ခၢၣ်ကီၫ်စဲၣ်ဒီးအ့ၣ်ယၣ်၀တံၣ်ကီၫ်ခီအဆၢ ပွဲး(၂၆၃)သုးကလၢၤလၢAAထီၣ်ဒုးမၤန့ၫ်ဃာ်၀ဲန့ၣ် သုးကီၣ်ကးတကပၤ ကမၤန့ၫ်ကဒါက့ၤ၀ဲအဂီၫ် ခးစၢၤ၀ဲလၢကလံၤကျါ,ကျိဖးဒိၣ်တဖၣ်ဒီး ထီၣ်ဒုးဃီၤ၀ဲအိၣ်အဃိ တၫ်ဒုးဆူၣ်၀ဲအဂ့ၫ် တဲ၀ဲလီၤ.
ဒ်န့ၣ်အသိး ဖဲလါယနူၤအါရံၤ(၂၇)သီနံၤ လၢမကွ့ကီၫ်ခီ,ငဖဲကီၫ်ဆၣ်, အ့၀း-ပဒါသိလ့ၣ်ကျဲမုၫ်အဖီခိၣ်န့ၣ် သုးကီၣ်ကးဒီးAAတၫ်ဒုးကဲထီၣ်၀ဲန့ၣ်လီၤ.တကးဘၣ်လၢ၀့ၫ်စံးတွ့ၣ်အကပိာ်ကပၤစ့ၫ်ကီး သုးကီၣ်ကးဒီးAAတၫ်ခးလိာ်သးအိၣ်ထီၣ်ကိးမုၫ်နံၤဒဲးအဂ့ၫ် တဲ၀ဲလီၤ.
