လါယနူၤအါရံၤ(၂၈)သီ,၂၀၂၅နံၣ်
၂၀၂၅နံၣ်, လါယနူၤအါရံၤ(၂၇)သီအနံၤန့ၣ် မဲၢ်လး ကညီဘၣ်ကီဘၣ်ခဲဒဲက၀ီၤပှၤဘၣ်မူဘၣ်ဒါတဖၣ် ဘိးဘၣ်ဒုးသ့ၣ်ညါလီၤ၀ဲလၢ စးထီၣ်ဖဲလါယနူၤအါရံၤ(၂၈)သီအနံၤဒီးဆူမဲၥ်ညါန့ၣ် IRCဆူၣ်ချ့တၢ်ဆီၣ်ထွဲမၤစၢၤလၢ ကကွၢ်ပှၤဆါ တၢ်ရဲၣ်တၢ်ကျဲၤတၢ်ဆီၣ်ထွဲတအိၣ်လၢၥ်ဘၣ်အဂ့ၢ်န့ၣ်လီၤ.
လံၥ်ဒုးသ့ၣ်ညါအပူၤ ပၥ်ဖျါဃၥ်၀ဲလၢ ပှၤဆူးပှၤဆါအအိၣ်ပၥ်လၢ တၢ်ဆါဟံၣ်သ့ၣ်တဖၣ် တၢ်ကပျဲဆံၣ်လီၤအီၤကိးဂၤဒဲးအဂ့ၢ်ဒီး ပှၤမိၢ်ဒၢတဖၣ်, ပှၤမိၢ်ဖိဆံးတဖၣ်, ပှၤဆါနးနးတဖၣ်, ဂ့ၢ်ဂီၤအူပှၤဆါတဖၣ်, တၢ်ဆါထီရီၥ်ပှၤဆါတဖၣ်, TB ပှၤဆါတဖၣ်ဒီး ဆံၣ်ဆၢသွံၣ်ဆၢသွံၣ်ထီၣ်ပှၤဆါတဖၣ် ဟဲထီၣ်၀ဲတၢ်ဆါဟံၣ်တန့ၢ်လၢၤဘၣ်အဂ့ၢ်န့ၣ်လီၤ.
ဘၣ်ထွဲဒီးတၢ်ပတုၥ်ကွံၥ် တၢ်ကွၢ်ထွဲဆူၣ်ချ့တၢ်ဆီၣ်ထွဲမၤစၢၤလၢ ကကွၢ်ပှၤဆါတၢ်ရဲၣ်တၢ်ကျဲၤအံၤန့ၣ် (International Rescue Committee-IRC)တခီ ဒုးသ့ၣ်ညါ အဖိသဲးစးဆူ မဲၢ်လးကညီဘၣ်ကီဘၣ်ခဲ ဒဲက၀ီၤအပှၤဘၣ်မူဘၣ်ဒါတဖၣ်အအိၣ်တအိၣ်ဒံးဘၣ်အဂ့ၢ် မဲၢ်လးကညီဘၣ်ကီဘၣ်ခဲ ဒဲက၀ီၤခိၣ်ခံ သရၣ်မုၣ် နီၢ်ဖီဒ့စၢ်စံးဘၣ် R2K န့ၣ်လီၤ.
အ၀ဲစံး၀ဲလၢ” မ့မ့ၢ်လၢ IRCလၢတၢ်ဖီခိၣ်တခီဒု ပကဒိးန့ၢ်ဘၣ်လံၥ်လၢ အကဲ၀ဲဒၣ်လၢ Legalလၢလံၥ်လၢလဲၢ်ဒု ပဒိးန့ၢ်ဘၣ်ဒံးဘၣ်. အအိၣ်ဒၣ်အဒုးသ့ၣ်ညါဆူ တၢ်ဆါဟံၣ်ဒီး တၢ်ဆါဟံၣ်မူဒါခိၣ်ဟဲဒုးသ့ၣ်ညါဆူ ဒဲက၀ီၤ”အဂ့ၢ်န့ၣ်လီၤ.
“IRCဆူၣ်ချ့တၢ်ဆီၣ်ထွဲမၤစၢၤလၢ ကကွၢ်ပှၤဆါတၢ်ရဲၣ်တၢ်ကျဲၤအံၤ အိၣ်ဟဲ၀ဲဒၣ်လၢ အမဲရကၤကီၢ်စၢဖှိၣ်ဒီး US-IRCအပှၤဘၣ်မူဘၣ်ဒါတဖၣ် တဲလီၤ၀ဲလၢ ဘၣ်ထွဲဒီးIRCဆူၣ်ချ့တၢ်ဆီၣ်ထွဲမၤစၢၤလၢ ကကွၢ်ပှၤဆါတၢ်ရဲၣ်တၢ်ကျဲၤတဖၣ် တၢ်ကဘၣ်ပတုၥ်ကွံၥ်အီၤလၢ ဒဲက၀ီၤ(၇)ဘ့ၣ်အပူၤအဂ့ၢ်ဒီး ဘၣ်ဆၣ် ဘၣ်အိၣ်ကတီၤပၥ်သးလၢ ကဘၣ်စးထီၣ်က့ၤတၢ်ရဲၣ်တၢ်ကျဲၤအံၤ၀ံၤ မ့မ့ၢ်လၢ မုၢ်နံၤမုၢ်သီလီၤတံၢ်လီၤဆဲးတခီ တတဲလီၤတံၢ်၀ဲဘၣ်အဂ့ၢ်” အ၀ဲနၢ်ဟူဘၣ်၀ဲတဆီအဂ့ၢ် သရၣ်မုၣ်နီၢ်ဖီဒ့စၢ် စံးအါထီၣ်၀ဲန့ၣ်လီၤ.
ဒီး တၢ်ဆါဟံၣ် OPD, IPD ကသံၣ်သရၣ်,သရၣ်မုၣ်တဖၣ်လၢ ကကွၢ်ပှၤဆါတဖၣ်စ့ၢ်ကီး တအိၣ်နီတဂၤလၢၤဘၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် မဲၢ်လးကညီဘၣ်ကီဘၣ်ခဲဒဲက၀ီၤပှၤဘၣ်မူဘၣ်ဒါတဖၣ် ဟ့ၣ်ပလီၢ်၀ဲ ပှၤဆါကသံၣ်ကသီလၢဒဲက၀ီၤပူၤတဖၣ်စ့ၢ်ကီးလၢ တၢ်တဘၣ်ဒုးထီၣ်ကသံၣ်ကသီအပှ့ၤကလံၤဘၣ်အဂ့ၢ်န့ၣ်လီၤ.
လၢန့ၣ်အမဲၥ်ညါ IRC တၢ်ဆါဟံၣ်အံၤ ကက့ၤအိးထီၣ်က့ၤအဂီၢ် တၢ်တသ့ၣ်ညါအီၤလီၤတံၢ်ဘၣ်အဂ့ၢ် စ့ၢ်ကီး ပၥ်ဖျါဃၥ်၀ဲန့ၣ်လီၤ.
Photo crd
တၢ်ဂီၤ-ခီဖျိတၢ်ပတုၥ်ကွံၥ် တၢ်ကွၢ်ထွဲIRCဆူၣ်ချ့တၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤအဃိ အူပၠၣ်ဘၣ်ကီဘၣ်ခဲဒဲက၀ီၤပူၤ ပှၤဆါတဖၣ်စံၣ်လီၤလၢတၢ်ဆါဟံၣ်ကတီၢ်
