အံၣ်စရ့ စံး၀ဲလၢ ဟါမးမၤဟးဂီၤတၢ်ပတုၥ်တၢ်ခး တၢ်အၢၣ်လီၤအဃိ တြီ၀ဲလၢ ပှၤဘၣ်ကီဘၣ်ခဲတဖၣ် ကက့ၤအိၣ်ဆိးလၢအလီၢ်အကျဲအဂီၢ်

လါယနူၤအါရံၤ(၂၇)သီ,၂၀၂၅နံၣ်

အံၣ်စရ့ဒီးဟါမးအဘၢၣ်စၢၤ တၢ်ပတုၥ်တၢ်ခးတၢ်အၢၣ်လီၤအဖီခိၣ် ဟါမးပျၢ်ကဒါက့ၤ အံၣ်စရ့ပိၥ်မုၣ်သုး(၄)ဂၤ၀ံၤ အံၣ်စရ့စ့ၢ်ကီး ပျၢ်ကဒါက့ၤ၀ဲ ပှၤပၣ်လဲးစတဲဖိ (၂၀၀)ဂၤန့ၣ်လီၤ.

ဖဲအပူၤကွံၥ် မုၢ်ဒဲးအနံၤလၢ တၢ်စးထီၣ် တၢ်ပတုၥ်တၢ်ခး တၢတပတီၢ် ဃုနွံအတီၢ်ပူၤန့ၣ် ဟါမးကဘၣ်ပျၢ်ကဒါက့ၤ ပှၤအံၣ်စရ့ဖိလၢအဖီၣ်ဃၥ်၀ဲ(၃၃)ဂၤအဂ့ၢ် အၢၣ်လီၤဃၥ်၀ဲန့ၣ်လီၤ.

ကတီၢ်ခဲအံၤ တၢ်ပျၢ်န့ၢ်က့ၤ ပိၥ်မုၣ်သုး(၄)ဂၤဘၣ်ဆၣ် တၢ်တပျၢ်န့ၢ်က့ၤ ကမျၢၢ်အၣ်ဘဲၣ်ရံၣ်ဟဲးဒံးဘၣ်အဃိ တၢ်အံၤမ့ၢ် တၢ်မၤဟးဂီၤ တၢ်အၢၣ်လီၤအဂ့ၢ် အံၣ်စရ့ပဲၥ်အၢပဲၥ်သီဃၥ်၀ဲန့ၣ်လီၤ.

ဟါမးတခီ စံး၀ဲလၢ ကပျၢ်ကဒါက့ၤ အ၀ဲလၢမူဒံးအသိး ခါလၢကဟဲအနွံအတီၢ်ပူၤန့ၣ်လီၤ. တၢ်အၢၣ်လီၤအဖီခိၣ် ဟါမးတဖၣ် ကဘၣ်ပျၢ်ကဒါက့ၤ ကမျၢၢ်တဖၣ်လၢအဆိန့ၣ်လီၤ.

အံၣ်စရတခီ စံး၀ဲလၢ တချူးလၢတၢ်ပျၢ်ကဒါက့ၤ အၣ်ဘဲၣ်ရံၣ်ဟဲးအဆၢကတီၢ်ဒံးဘၣ်န့ၣ် တၢ်တပျဲ ပှၤဘၣ်ကီဘၣ်ခဲဖိတဖၣ် ကက့ၤအိၣ်ဆိးလၢ ကၣ်စၣ်ကလံၤစိးတပၤဒံးဘၣ်အဂ့ၢ်န့ၣ်လီၤ. ဖဲမုၢ်ဘူၣ်အနံၤ, ဟါအဆကတီၢ်န့ၣ် ပှၤပၣ်လဲးစတဲဖိတဖၣ် အိၣ်ရိဖှိၣ်အသးဖဲ အဲၣ်ရၣ်ရိၣ်ကျဲဒီကျိၤအဆၢကတီၢ် တၢ်ခးလိၥ်သးတဖၣ် ကဲထီၣ်၀ဲအဂ့ၢ် စံး၀ဲန့ၣ်လီၤ.

တၢ်ထံၣ်န့ၢ် ပှၤအဒၢစ့ၣ်အါအါဂီၢ်ဂီၢ်လၢ အမၤပျံၤမၤဖုး အံၣ်စရ့သုးဖိ၀ံၤအလီၢ်ခံ လီၢ်က၀ီၤတၢ်ဘံၣ်တၢ်ဘၢအဂီၢ် တၢ်ခးပိၢ်ကျိတဖၣ်အိၣ်၀ဲအဂ့ၢ် အံၣ်စရ့သုးမုၢ်ဒိၣ်စံး၀ဲန့ၣ်လီၤ. မ့မ့ၢ်လၢ ကၣ်စၣ်ဆူၣ်ချ့ကိတိၥ်၀ဲၤကျိၤတခီ ခီဖျိတၢ်ကဲထီၣ်သးအဖီခိၣ် ပှၤဘၣ်သံ၀ဲ(၁)ဂၤ ဒီးဘၣ်ဒိဘၣ်ထံးတနီၤအဂ့ၢ် စံး၀ဲန့ၣ်လီၤ.

အံၣ်စရ့ဒီးဟါမးအဘၢၣ်စၢၤ တၢ်ပတုၥ်တၢ်ခးတၢ်အၢၣ်လီၤ စးထီၣ်၀ံၤအလီၢ်ခံ ကၣ်စၣ်တၢ်ချၢၣ်သးလီၢ်က၀ီၤအပူၤ တၢ်ဒုးဒိၣ်ဒိၣ်မုၢ်မုၢ်ကဲထီၣ်သးတအိၣ်လၢၤဘၣ်အဂ့ၢ် တၢ်ကစီၣ်သန့တဖၣ် ပၥ်ဖျါဃၥ်၀ဲန့ၣ်လီၤ.

Ref:BBC