လါယနူၤအါရံၤ(၂၇)သီ,၂၀၂၄နံၣ်
၀့ၫ်တကူၣ်ကီၫ်ခီ,ကီၫ်ဆၣ်တနီၤအပူၤဒီးပကိကီၫ်ခီ,တီအူကီၫ်ဆၣ်,တလၢၤကီၫ်စဲၣ်,မီၫ်လမၠဲၣ်ကီၫ်ဆၣ်တဖၣ်အပူၤ ပိာ်မုၣ်သးနံၣ်ပှဲၤတလၢ လၢတၫ်ဘၣ်ကဲသုးအဂီၫ်ဒၣ်လဲၣ် သုးကီၣ်ကးအပၢပြးကရၢဖိတဖၣ် လူၤထၢစရီ ဒီး ပိာ်မုၣ်တဖၣ် ဘၣ်ယိၣ်၀ဲလၢကဘၣ်ကဲသုးအဃိ တၫ်ဘၣ်ယိၣ်တဖၣ် ဒိၣ်ထီၣ်၀ဲအဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.
၀့ၫ်တကူၣ်ကီၫ်ခီ,သၣ်က့ၣ်တး,တၣ်မွ့ၣ်,သၣ်လ့ၣ်,မၠီးအီးကလၣ်,ပကိကီၫ်ခီ,တီအူကီၫ်ဆၣ်ပူၤ ဒူသ၀ီတနီၤဒီး တလၢၤကီၫ်စဲၣ်,မီၣ်လမၠဲၣ်ကီၫ်ဆၣ်တဖၣ်အပူၤ ပိာ်မုၣ်သးနံၣ်ပှဲၤလၢကဘၣ်ကဲသုးတဖၣ်တကးဘၣ် သးနံၣ် ပှဲၤတလၢတဖၣ်စ့ၫ်ကီး သုးကီၣ်ကး လူၤထၢစရီန့ၣ်လီၤ.
“လၢက၀ီၤဒ့၀ဲၤဒၢးန့ၣ် တၫ်ဟဲကးလီၤ တၫ်ကဘၣ်ကဲသုး တၫ်ပာ်ပနီၣ်သးနံၣ် လံာ်တဖၣ်လီၤ. ဖဲမဟါဟဲထၢ စရီလီၤ.၂၀၂၅နံၣ် လါအ့ဖြ့ၣ်န့ၣ် ကပှဲၤထီၣ် ၂၈နံၣ်အဃိ ဆိမိၣ်လၢတပာ်လၢၤဘၣ်. ဂ့ၫ်လိာ်တန့ၫ်ဘၣ်ဒီး ဘၣ် ဟ့ၣ်လီၤ၀ဲအဂ့ၫ်”ပိာ်မုၣ်သးနံၣ်တလၢ လၢဘၣ်ဟ့ၣ်လီၤအမံၤစရီ လၢအိၣ်ဖဲသၣ်က့ၣ်တးကီၫ်ဆၣ်, က၀ီၤဒ့နီၫ် ဂံၫ်(၁၀)ပူၤတဂၤတဲ၀ဲလီၤ.
ဒ်န့ၣ်အသိး ပိာ်မုၣ်လၢအိၣ်ဖဲတီအူကီၫ်ဆၣ်ပူၤတဂၤစ့ၫ်ကီး”အခဲအံၤလၢပအိၣ်သ၀ီစ့ၫ်ကီး ဟဲထၢစရီလီၤ.ပိာ် မုၣ်လၢသးနံၣ်အိၣ်(၂၀)နံၣ်ဘျဲၣ်တဖၣ်ခဲလၢာ် ဘၣ်ဟ့ၣ်အမံၤစရီလီၤ.လၢက၀ီၤဒ့ပူၤတဂၤန့ၣ် အိၣ်လၢကၠီၣ် တဲၣ်လီၤ.တဲန့ၫ်ဟံၣ်ဖိဃီဖိတဖၣ်လၢကဘၣ်ကဲန့ၫ်၀ဲလၢအလီၫ်အဂ့ၫ်,အခဲအံၤလၢပဟံၣ်န့ၣ် ပဒ့ဖိစ့ၫ်ကီးဃ့ၫ် လံ.ပိာ်မုၣ်တဖၣ်ကဘၣ်ဟ့ၣ်အမံၤစရီအဃိ ပကဘၣ်လဲၤဃ့ၫ်ဖဲလဲၣ်တသ့ၣ်ညါလၢၤဘၣ်.လၢဟံၣ်န့ၣ် မိၫ်ပၫ်သးပှၫ်တဖၣ်စ့ၫ်ကီးအိၣ်၀ဲအဂ့ၫ်”တဲ၀ဲလီၤ.
သုးကီၣ်ကးအကမျၢၫ်တၫ်ဘၣ်ကဲသုးတၫ်ဘျၢအဖီခိၣ် ပှၤပတီၫ်မုၫ် ပိာ်ခွါသးနံၣ် ၁၈နံၣ် တုၤ ၃၅နံၣ်အတီၫ်ပူၤ ဒီးပိာ်မုၣ် သးနံၣ် ၁၈နံၣ် တုၤ ၂၇နံၣ်အတီၫ်ပူၤ၀ံၤ မ့မ့ၫ်ဒ်သိးဒီးကသံၣ်သရၣ်,အ့ၣ်ကၠ့နံယၢၣ် ပှၤကူၣ်သ့တဖၣ် တခီ ပိာ်ခွါ သးနံၣ် ၁၈နံၣ်တုၤ ၄၅နံၣ် အတီၫ်ပူၤ,ပိာ်မုၣ် ၁၈နံၣ်တုၤ ၃၅နံၣ် အတီၫ်ပူၤအဂ့ၫ် သုးကီၣ်ကး ပာ်ပ နီၣ်ဃာ် တၫ်ဘၣ်ကဲသုးအနံၣ်အလါန့ၣ်လီၤ.ပိာ်မုၣ်တဖၣ် တၫ်မၢကဲသုးအါထီၣ်ကဒီး(၂)နံၣ်သ့၀ံၤ တၫ်မ့ၫ်ပာ်ပ နီၣ်ဂ့ၫ်ဂီၫ်အူတၫ်ဆၢကတီၫ်လံန့ၣ်ဒီးတၫ်မၤအါထီၣ် တုၤလၢ(၅)နံၣ်သ့အဂ့ၫ် သုးကီၣ်ကးတဲဃာ်၀ဲလီၤ.
တၫ်န့ၣ်အဃိ ပှၤလၢသးနံၣ်ပှဲၤလၢကဘၣ်ကဲသုးတဖၣ် သုးကီၣ်ကးမၤဃံးထီၣ် တၫ်ဟးထီၣ်ဆူထံချၢကီၫ်ချၢ ၀ံၤ ပှၤအမံၤအိၣ်လၢတၫ်ဘၣ်ကဲသုးစရီပူၤတဖၣ်,ပှၤလၢတၫ်ဟဲထၢအမံၤစရီတဖၣ် ကဟးထီၣ်ကီၫ်ချၢအဂီၫ် ထံၣ်ဘၣ်တၫ်ကီတၫ်ခဲ၀ံၤ ဘၣ်အိၣ်မူလၢတၫ်ဘၣ်ကိၫ်ဘၣ်ဂီၤပူၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“လၢကဘီယူၤသန့န့ၣ် ပှၤလၢစိာ်ဃာ်လံာ်ခီကီၫ်အသီ,ဒီးပှၤလီၫ်လံၤလၢ တဟးထီၣ်ဆူကီၫ်ချၢနီတဘျီတဖၣ် စ့ၫ်ကီး တၫ်ပျၫ်က့ၤ၀ဲလီၤ.တၫ်မ့ၫ်ဟ့ၣ်စ့လၢအဆံတဖၣ်ဒၣ်လဲၣ် တဟ့ၣ်ဟးထီၣ်၀ဲဘၣ်. ဘၣ်ကိၫ်လၢဟံၣ် ဖိ ဒိၣ်မုၣ်တဂၤအဂီၫ်လီၤ.အသးနံၣ်အိၣ်(၁၉)နံၣ်လီၤ.ဘၣ်ဒုးထီၣ်အီၤကၠိလီၤဒီးဘၣ်ယိၣ်ထဲပှၤကဖီၣ်ထၢနုာ်အီၤလၢသုးကျါလီၤအဂ့ၫ်”ပိာ်မုၣ်လၢအိၣ်ဖဲမၠီးအီးကလၣ်ပးကီၫ်ဆၣ်ပူၤတဂၤတဲ၀ဲလီၤ.
အပူၤကွံာ် ၂၀၂၄နံၣ် လါအ့ဖြ့ၣ်(၈)သီနံၤန့ၣ် သုးကီၣ်ကးစးထီၣ်အိးထီၣ်၀ဲ ကမျၢၫ်တၫ်ဘၣ်ကဲသုး တၫ်မၤလိ (၁)၀ီတ၀ီ၀ံၤ တုၤလၢကနံၤအံၤ အိၣ်လံ(၉)၀ီတ၀ီလံဒီး ပိာ်မုၣ်တၫ်ဘၣ်ကဲသုးတပာ်ဃုာ်ဒံးဘၣ်အဂ့ၫ် တၫ် သ့ၣ်ညါဘၣ်လီၤ.
Ref: Mizzima
