လါယနူၤအါရံၤ(၂၄)သီ,၂၀၂၅နံၣ်
ကီၫ်ကၠီၣ်တဲၣ်ပူၤ မုၣ်ခွါကဒဲကဒဲတၫ်ဖျီသးခွဲးယာ် တၫ်ဘျၢအသးအမူအိၣ်ထီၣ်၀ံၤအလီၫ်ခံ လၢထံကီၫ် ဒီတဘ့ၣ်အပူၤ LGBTQ+ပှၤဒီတၫ်အဲၣ်တီတဖၣ် ဖဲလါယနူၤအါရံၤ(၂၃)သီအနံၤန့ၣ် ဒိးတ့ဒိးဖျီအသးလၢ ကီၫ်ရ့ၣ်၀ဲၤဒၢးတဖၣ်ဒီးလၢပှၤလဲၤပှ့ၤတၫ်အလီၫ်တဖၣ်အဂ့ၫ် တၫ်သ့ၣ်ညါဘၣ်လီၤ.
ကၠီၣ်တဲၣ်ပဒိၣ်တဖၣ်ဒီး Bangkok Pride ခဲၣ်ဖ့ကရၢ တီခိၣ်ရိၣ်မဲမၤ၀ဲ LGBTQ+တၫ်တ့တၫ်ဖျီန့ၣ် မၤ၀ဲဖဲ Siam Paragonပှၤလဲၤပှ့ၤတၫ်အလီၫ်၀ံၤ ပှၤဒီတၫ်အဲၣ်တီလၢအကယၤ ကဟဲတီၣ်ထီၣ်စရီအဂီၫ်မုၫ်လၫ်၀ဲ၀ံၤ တၫ်တ့တၫ်ဖျီလၢအဂၤတဖၣ်စ့ၫ်ကီး လၢကီၫ်ကၠီၣ်တဲၣ်ပူၤ ရဲၣ်ကျဲၤ၀ဲလၢကမၤ၀ဲအဃိ ဖဲတၫ်ဘျၢကဲထီၣ်ဖိးသဲစး အဆိကတၢၫ်တနံၤန့ၣ် ပှၤရဲၣ်ကျဲၤမူးတဖၣ် တယာ်၀ဲလၢ အစှၤကတၢၫ် ပှၤတီတၫ်အဲၣ်တီ(၁၀၀၀)ဘျဲၣ် ကဖျီအသးန့ၣ်လီၤ.
“တနံၤအံၤ တၢၫ်ကွဲၤအလွဲၫ်နီၫ်တယၫ်န့ၣ် လၢတၫ်ပာ်ကဖၢလၢသးပူၤ ယူၤ၀့ၤ၀ီၤ၀ဲလၢ ကီၫ်ကၠီၣ်တဲၣ်ပူၤ လံန့ၣ်လီၤ”အဂ့ၫ် ကိတိာ်ခိၣ်ကျၢၫ် Paetongtarn Shinawatra တဲလီၤ၀ဲလၢ X ပှၤတ၀ၢပှာ်ဘျးစဲပူၤန့ၣ်လီၤ.
ဘၣ်ထွဲကီၫ်ကၠီၣ်တဲၣ် မုာ်ခွါတစံးတၫ်ဒိးတ့ဒိးဖျီသး တၫ်ဘျၢ(ဃီၤဃၤ)န့ၣ် အပူၤကွံာ် လါယူၤအပူၤ လၢပၣ် လံၣ်မၣ်အပူၤ တၫ်နီၤဖးလီၤတၫ်ဖးဆၢတဲာ်၀ဲ၀ံၤ ထဲၣ်၀ၣ်ဒီးနံၣ်ပီမ့ၫ်၀ံၤန့ၣ် ကၠီၣ်တဲၣ်န့ၣ် လၢအ့ရှၢၣ် ကဲထီၣ် ထံကီၫ်(၃)ဘ့ၣ်တဘ့ၣ်လၢ ဟ့ၣ်မုာ်ခွါတစံးတၫ်ဒိးတ့ဒိးဖျီသးခွဲးယာ်၀ံၤ လၢအ့ရှၢၣ်မုၫ်ထီၣ်ကလံၤထံးန့ၣ် မ့ၫ်ထံကီၫ်အဆိကတၢၫ်တဘ့ၣ်လၢဒိးန့ၫ်မုာ်ခွါတစံးတၫ်ဖျီသးခွဲးယာ်အဂ့ၫ် တၫ်သ့ၣ်ညါဘၣ်လီၤ.
လၢမုာ်ခွါတစံးတၫ်ဖျီသးခွဲးယာ်အပူၤ အဆိကတၢၫ်တပတီၫ်န့ၣ် ထဲကၠီၣ်တဲၣ်ထံဖိကီၫ်ဖိတဖၣ် ဒိးန့ၫ်တၫ်ခွဲး တၫ်ယာ်၀ံၤ ထံဂုၤကီၫ်ဂၤတကပၤ ဟဲတီၣ်ထီၣ်စရီတန့ၫ်ဒံးဘၣ်ဒီးထံဂုၤကီၫ်ဂၤလၢဖျီသးဒီးကၠီၣ်တဲၣ်န့ၣ် ဖျီအသးလၢဖိးသဲစးသ့အဂ့ၫ် တၫ်သ့ၣ်ညါဘၣ်လီၤ.
“တနံၤအံၤလၢပဂီၫ်တကးဘၣ်,ဖိသၣ်တဖၣ်အဂီၫ် မ့ၫ်တၫ်လၢအရ့ဒိၣ်၀ဲလီၤ. အလီၫ်ခံကတၢၫ် ပဟံၣ်ဖိဃီဖိ အိၣ်ဘၣ်တပူၤဃီလံ”အဂ့ၫ် ကဖျီဘၣ်အသးဒ်သိးအံၤအဂီၫ် ပိာ်မုၣ်လၢဆီတလဲအဂ့ၫ်အဂီၤ Ariya “Jin” Milintanapa လၢအိၣ်ခိး၀ဲလၢအနံၣ်(၂၀)ဘျဲၣ်အပူၤ”တဂၤတဲ၀ဲလီၤ.
လၢအခဲအံၤ ဘၣ်ထွဲဒီးတၫ်ဒိးတ့ဒိးဖျီသးတၫ်ဘျၢအံၤန့ၣ် “ပိာ်မုၣ်”,”ပိာ်ခွါ, “၀ၤ”,”မါ”အလီၫ်န့ၣ် သူ၀ဲလၢ မုၣ်-ခွါ တၫ်ကတိၤတဖၣ်၀ံၤ တၫ်အိၣ်ဖျဲၣ်ဖိဒီးတၫ်ဒိးန့ၫ်တၫ်န့ၫ်သါခွဲးယာ်တဖၣ်စ့ၫ်ကီး ဟ့ၣ်ဃာ်၀ဲအဂ့ၫ် တၫ်သ့ၣ် ညါဘၣ်လီၤ.
“မုၫ်နံၤ၀ဲအံၤ ဘၣ်အိၣ်ခိးလၢတၫ်ဆၢကတီၫ်ဖးယံာ်ပူၤအဃိ သူၣ်ခုသးခုဒိၣ်မးလီၤ. အနံၣ်(၂၀)အတီၫ်ပူၤ တဂၤဒီးတဂၤအဲၣ်လိာ်သး၀ံၤ လၢပှၤတ၀ၢလၢတတူၫ်လိာ်တၫ်အံၤအကျါ ဘၣ်ဟးအိၣ်ခူသူၣ်န့ၣ်လီၤ. ဘၣ်ဆၣ်သနာ်က့ လၢကတီၫ်အံၤ ပာ်ကဖၢလၢသးန့ၫ်လံအဂ့ၫ်” ပိာ်မုၣ်ကးဒဲကဒဲ Rungtiwa Thangkanopastလၢဖျီတ့ၫ်အသးတဂၤတဲ၀ဲန့ၣ်လီၤ.
Ref: Bangkok Post
