လါယနူၤအါရံၤ(၂၄)သီ,၂၀၂၅နံၣ်
ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ် ပၥ်ဖျါဃၥ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၆), ကီၢ်ရ့ၣ်ဒူပျၥ်ယၥ်, ကီးတရံးကီၢ်ဆၣ်အပူၤ ဖဲလါယနူၤအါရံၤ(၂၂)သီအနံၤ, ဂီၤ(၇း၃၀)နၣ်ရံၣ်အဆၢကတီၢ် သုးကီၣ်ကး Yak-130 Jet Fighter ဟဲတ့ၢ်လီၤမ့ၣ်ပိၢ်ဆူ ၀့ၢ်ကၠဲးဒိၣ်အဃိ လီၢ်က၀ီၤကမျၢၢ်ဘၣ်သံ၀ဲ(၁)ဂၤဒီး ဘၣ်ဟးဂီၤကွံၥ်၀ဲ တၢ်မၤပံၥ်မ့ၣ်အူ၀ဲၤဒၢးဒီးဟံၣ်ဃီတနီၤအဂ့ၢ်န့ၣ်လီၤ.
သုးကီၣ်ကးအသုး လဲၤတ့ၢ်လီၤမ့ၣ်ပိၢ်ဆူ ၀့ၢ်ကၠဲးဒိၣ်အပူၤ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲတၢ်မၤပံၥ်မ့ၣ်အူ၀ဲၤဒၢးအကပၤ ရီဘၢၣ်ကျီး၀ံၤ ၀့ၢ်ကၠဲးဒိၣ်ကမျၢၢ်ဖိ ဘၣ်သံ၀ဲ(၁)ဂၤဒီး ဘၣ်ဟးဂီၤကွံၥ်၀ဲ တၢ်မၤပံၥ်မ့ၣ်အူ၀ဲၤဒၢးဒီး ကမျၢၢ်ဟံၣ်တနီၤအဂ့ၢ် ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး လါယနူၤအါရံၤ(၁၁)သီအနံၤ, ဂီၤ(၁း၄၀)နၣ်ရံၣ်အဆၢကတီၢ်စ့ၢ်ကီး တၢ်ဒုးကဲထီၣ်၀ဲတအိၣ်ဘၣ်ဒီး သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ဟဲတ့ၢ်လီၤကဒီးမ့ၣ်ပိၢ် ဖဲကီၢ်ရ့ၣ်ဒူပျၥ်ယၥ်, နိၣ်တကီကီၢ်ဆၣ်, ယီးကဒၣ်သ၀ီပူၤအဃိ ဘၣ်ဟးဂီၤကွံၥ်၀ဲ ယီးကဒၣ်သ၀ီတၢ်သိၣ်လိကၠိ (၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဆှၢဟီၣ်က၀ီၤတဖၣ်အပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးတဖၣ် မၤ၀ဲကလံၤကျါတၢ်ဒုးတဖၣ်မ့ၢ်ဂ့ၤ, ခးလီၤကျိဖးဒိၣ်တဖၣ်ဒီးဒြိတၢ်ဒုးတဖၣ်၀ံၤ မၤကမၤ၀ဲပှၤဂ့ၢ်၀ီခွဲးယၥ်တဖၣ် အိၣ်ထီၣ်၀ဲကိးမုၢ်နံၤလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
