လါယနူၤအါရံၤ(၂၄)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်, ဒွဲၣ်လိကီၢ်ဆၣ်အပူၤ သုးကီၣ်ကးကတၢတံးသုးကလၢၤအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီး တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ရှဲပျီကွံၥ်န့ၢ်၀ဲဘၣ်ဆၣ် သုးကီၣ်ကးအသုးတဖၣ် ဂုၤက့ၤအခံက့ၤပၥ်ဖှိၣ်ထီၣ်အသး ဖဲ သုးခိးကီၢ်ဆၢ BGF ၁၀၁၃သုးရ့ၣ်သုးကလၢၤအပူၤ၀ံၤ ခီၣ်ဆၢဒုးက့ၤတၢ်အဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်မုၢ်တြီၢ် ပှၤဘၣ်မူဘၣ်ဒါအအိၣ်န့ၣ်လီၤ.
“ကတၢတံးသုးကလၢၤန့ၣ် ပပှၤဒၢးသုးပၥ်ဖှိၣ်န့ၣ် ထီၣ်ရှဲကွံၥ်၀ဲန့ၢ်လံမီၢ် ဘၣ်ဆၣ်သနၥ်က့န့ၣ် ပယီၤသုးကီၣ်ကးအသုးန့ၣ် က့ၤအိၣ်က့ၤလၢ BGF ၁၀၁၃သုးရ့ၣ်သုးကလၢၤအပူၤမီၢ် ခိးဒုးဒံးဒၣ်ဖဲန့ၣ်. အဃိန့ၣ် ကတၢတံးန့ၣ် ထီၣ်န့ၢ်ဒုတဲတသ့ဒံးဘၣ်နီၢ် အိၣ်ဒံးလၢ ၁၀၁၃သုးကလၢၤပူၤ ဒီးခိးဒုးဒံးဒၣ်အဃိ”အဂ့ၢ် ကီၢ်ရ့ၣ်မုၢ်တြီၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
BGF ၁၀၁၃သုးရ့ၣ်သုးကလၢၤအပူၤ သုးခိးကီၢ်ဆၢBGFအပှၤသုးးဖိတဖၣ်တခီ တချူးလၢတၢ်စးထီၣ်ဒုးကတၢတံးသုးကလၢၤဒံးဘၣ်အဆၢကတီၢ်န့ၣ် ထုးကွံၥ်အသးဒီးက့ၤအိၣ်၀ဲဒၣ် ဖဲသုးက့တၢဟီၣ်က၀ီၤတပၤ ဖးယံၤလံအဂ့ၢ် အ၀ဲစံးအါထီၣ်၀ဲန့ၣ်လီၤ.
တၢ်ထီၣ်ဒုးကတၢတံးသုးကလၢၤအဆၢကတီၢ် သုးကီၣ်ကးအသုးတပၤ ဟဲခးစၢၤ၀ဲဒၣ်လၢ ကဘီယူၤဒုးသုးတဖၣ်အသိး ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်စ့ၢ်ကီး ခးစၢၤ၀ဲဒၣ်လၢ ကျိဖးဒိၣ်တဖၣ်အဂ့ၢ် လီၢ်က၀ီၤတၢ်ကစီၣ်တဖၣ် ပၥ်ဖျါဃၥ်၀ဲန့ၣ်လီၤ.
ခီဖျိလၢတၢ်ဒုးတဖၣ် ကဲထီၣ်သးတပယူၥ်ဃီအဃိ လီၢ်က၀ီၤဖိလၢအိၣ်ဘူးဒီးဖဲန့ၣ်တဖၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါဒံၣ်စ့ဘၢၣ်အတီၢ်ပူၤလံၤလံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAဒီးသုးပၥ်ဖှိၣ်တဖၣ် ထီၣ်ဒုး၀ဲ သုးကီၣ်ကးအသုးကလၢၤတဖၣ်လၢအိၣ်ဖဲ ဖၣ်ပူၣ်-ကမးမိၢ်ကျဲမုၢ်အဖိခိၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ, ဖၣ်ပူၣ်-ကမးမိၢ်ကျဲမုၢ်အဖီခိၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီး တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲ သုးကီၣ်ကးသုးကလၢၤတဖၣ်ဒ်အမ့ၢ် ကဆီမဲသုးကလၢၤ, ကစၢၢ်သၢဖျၢၣ်သုးကလၢၤ, မးထီသုးကလၢၤ, ကူဆ့းသုးကလၢၤ ဒီးBGF ၁၀၁၃သုးရ့ၣ်သုးကလၢၤ(လၢဂုၤက့ၤအခံ)တဖၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤ, ကီၢ်ဆၣ်တဖၣ်ဒ်အမ့ၢ် ဒွဲၣ်လိ, ဘုသိၣ်ဒီး လူၤသီကီၢ်ဆၣ်တဖၣ်အပူၤ စးထီၣ်လၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤအဆၢကတီၢ်န့ၣ် သုးကီၣ်ကးအသုးကလၢၤအိၣ်၀ဲ အစှၤကတၢၢ်(၇၂)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
