လါယနူၤအါရံၤ(၂၃)သီ,၂၀၂၅နံၣ်
လၢမဲၣ်ကစံၣ်ကိၣ်ကီၫ်ဆၢအပူၤ ပှၤသုးလီၫ်သုးကျဲဂ့ၫ်၀ီ တၫ်ဟံးထီၣ်ဖီၣ်ထီၣ်ဘှါဆှဲကန့ၫ်အဂီၫ် ကသူသုးဂံၫ်ဘါ၀ံၤ ကဘိးဘၣ်ရၤလီၤ ဂ့ၫ်ဂီၫ်အူတၫ်အိၣ်သးအဂ့ၫ် အမဲရကၤကီၫ်ခိၣ် ထရၢးတဲ၀ဲလီၤ.
(၄၇)ဂၤတဂၤ ကမဲရကၤကီၫ်ခိၣ်ထရၢးန့ၣ် ကီၫ်ခိၣ်ပၢပြးတၫ်ကလုၫ်တဖၣ် ဆဲးလီၤ၀ဲစုမုၫ်ကျၢၫ်တပယူာ်ဃီ၀ံၤ ပညိၣ်၀ဲလၢကမၤလီၤစှၤ ပှၤဟဲနုာ်လီၤအိၣ်ဆိးအနီၫ်ဂံၫ်နီၫ်ဒွးန့ၣ်လီၤ.
“အဆိကတၢၫ် တၫ်လၢကမၤ၀ဲန့ၣ် လၢအမဲရကၤကလံၤထံးကီၫ်ဆၢအပူၤ ကဘိးဘၣ်ရၤလီၤ၀ဲ ဂ့ၫ်ဂီၫ်အူ တၫ်အိၣ်သးလီၤ. ကမၤပတုာ်ကွံာ်၀ဲ တၫ်ဟဲနုာ်လီၤဆူထံကီၫ်ပူၤလၢတဖိးသဲစးတဖၣ်တဘျီဃီ၀ံၤ ပှၤဟဲနုာ် လီၤခူသူၣ်လၢအကကွဲၫ်တဖၣ် ကက့ၤဆှၢ၀ဲဆူအထံအကီၫ်အိၣ်အဂ့ၫ်”ထရၢးတဲ၀ဲလီၤ.
အမဲရကၤကီၫ်ခိၣ်ဒီနၢၣ်ထရၢး(Donald Trump)န့ၣ် ကီၫ်ခိၣ်တၫ်ကလုၫ်တဖၣ် ကဆဲးလီၤစုမုၫ်ကျၢၫ် ဘိးဘၣ်ပာ်ဖျါ၀ဲ၀ံၤ ဘၣ်ထွဲဒီးတၫ်ခီထံခီကီၫ်ဒီးတၫ်ကဲထီၣ်ထံဖိကီၫ်ဖိခွဲးယာ်တၫ်ဂ့ၫ်တဖၣ် ကသမံသမိးကဒါက့ၤ၀ဲအဂ့ၫ် တဲ၀ဲလီၤ.
တၫ်ကထီဒါ တၫ်ဟဲနုာ်လီၤအိၣ်ဆိးတဖိးသဲစး လၢပထံပကီၫ်ပူၤအဂီၫ် ကပျၢ်လီၤသုးဖိတဖၣ် လၢကလံၤထံးကီၫ်ဆၢတၫ်လီၫ်တဖၣ် အပူၤန့ၣ်လီၤ.
အတၫ်ဖးတၫ်အၢၣ်လီၤလၢ ကမၤဖျိးကွံာ် တၫ်နုာ်လီၤအိၣ်ဆိးလၢတဖိးသဲစးတဖၣ်အဃိ ထရၢးလၢပှၤဘၣ်သူၣ်ဘၣ်သးအီၤအါအံၤ လၢအမဲရကၤအပူၤ ဘၣ်ထွဲဒီးတၫ်ကဲထီၣ်ထံဖိကီၫ်ဖိခွဲးယာ်သနူစ့ၫ်ကီး ကမၤပတုာ်ကွံာ်၀ဲအဂီၫ် ပညိၣ်၀ဲန့ၣ်လီၤ.
အပူၤကွံာ် ပှၤကိးဂၤဒဲးလၢအိၣ်ဖျဲၣ်ထီၣ် ဖဲအမဲရကၤကီၫ်ပူၤန့ၣ် န့ၫ်ခွဲးလၢကကဲထီၣ်ဘၣ် အမဲရကၤထံဖိကီၫ်ဖိ အိၣ်၀ဲဘၣ်ဆၣ် ထရၢးန့ၣ် ရဲၣ်ကျဲၤ၀ဲလၢကမၤပတုာ်ကွံာ်သနူအံၤန့ၣ်လီၤ.
လီၫ်ခၢၣ်သးပဒိၣ်တကပၤ ပှၤလၢဟဲနုာ်လီၤဆူအမဲရကၤကီၫ်ပူၤလၢတဖိးသဲစးတဖၣ် အိၣ်ဖျဲၣ်ထီၣ်အဖိအလံၤန့ၣ် တၫ်ဒုးကဲထီၣ်အီၤ အမဲရကၤထံဖိကီၫ်ဖိခွဲးယာ်သနူန့ၣ် တမ့ၫ်ကပာ်ပနီၣ်န့ၫ်၀ဲဘၣ်အဂ့ၫ် ဟံၣ်၀ါတၫ်ဘိးဘၣ်ရၤလီၤတၫ်ကစီၣ် ပှၤဘၣ်မူဘၣ်ဒါ အၣ်နၣ်ကဲၣ်လံၣ် တဲဘၣ်ပှၤဟံးန့ၫ်တၫ်ကစီၣ်ဖိတဖၣ်လီၤ.
ပဒိၣ်ကရၢန့ၣ် ဒ်အမဲာ်ညါတဘျီ ထရၢးကဲကီၫ်ခိၣ်အဆၢကတီၫ် သူတ့ၫ်၀ဲ “အိၣ်ကဒီးဒၣ်လၢ မဲၣ်ကစံၣ်ကိၣ် န့ၣ်”အသိး ကက့ၤသူကဒါက့ၤ၀ဲ တၫ်ဘျၢသနူအံၤလီၤအဂ့ၫ် ကဲၣ်လံၣ် တဲ၀ဲလီၤ.
တၫ်ဘျၢ၀ဲန့ၣ်အဖီခိၣ် လၢမဲၣ်ကစံၣ်ကိၣ်ကီၫ်ဆၢတဆီ တၫ်ကဟဲနုာ်လီၤဆူကီၫ်အမဲရကၤအဂီၫ် ပှၤပတံထီၣ်တၫ်ဖိ အလံာ်ပတံတဖၣ် တချူးတၫ်ဆၢတဲာ်၀ဲအဆၢကတီၫ် တၫ်တဟ့ၣ်တၫ်ပျဲလၢကနုာ်လီၤဆူ ထံကီၫ်ပူၤဘၣ်ဒီး ကဘၣ်အိၣ်ဒၣ်လၢမဲၣ်ကစံၣ်ကိၣ်ကီၫ်ဆၢန့ၣ်လီၤ.
