လါယနူၤအါရံၤ(၂၂)သီ,၂၀၂၅နံၣ်
၂၀၂၅နံၣ်, လါယနူၤအါရံၤ(၂၀)သီအနံၤန့ၣ် ဖဲၣ်ဒရၢၢ်ဒံၣ်မိၣ်ကခြ့ၣ်စံၣ်ဂံၢ်ဘါကရူၢ်တဖၣ် ဘိးဘၣ်ရၤလီၤ၀ဲလၢ သုးကီၣ်ကးအစုတီၤဖီလၥ် သုးခိးကီၢ်ဆၢ, ဂၢၤကီၢ်သုးဒီးသိၣ်မှံကရၢတဖၣ် တပၥ်ဃုၥ်မၤသကိးတၢ်လၢ ဆဲၣ်ဘၣ်ကွီၢ်မ့ၣ်တၢ်ဖံးတၢ်မၤတဖၣ်အပူၤ လိၤလိၤဘၣ်ဆၣ် မၤစၢၤ၀ဲလၢ တၢ်ဘံၣ်တၢ်ဘၢဒီးတၢ်တိစၢၤမၤစၢၤတပၤ လိၤလိၤအဂ့ၢ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအစုတီၤဖီလၥ် တၢ်ကရၢကရိတဖၣ် ပၥ်ဃုၥ်လၢ ဆဲၣ်ဘၣ်ကွီၢ်မ့ၣ်တၢ်ဖံးတၢ်မၤတဖၣ်အပူၤအဂ့ၢ်န့ၣ် ကီၢ်ပယီၤဖဲၣ်ဒရၢၢ်ဒံၣ်မိၣ်ကခြ့ၣ်စံၣ်ဂံၢ်ဘါကရူၢ်တဖၣ်ဒ်အမ့ၢ် ကညီဒီကလုၥ်စၢဖှိၣ်ကရၢ(KNU),ကရ့ၣ်နံၣ်တၢ်လဲၤထီၣ်လဲၤထီပၣ်တံၣ်(KNPP),ဒီကလုၥ်ဃူးဖိးပဒိၣ်(NUG),ခၠီဒီကလုၥ်သုးမုၢ်ဒိၣ်(CNF), ကီၢ်ပယီၤဒီဘ့ၣ်ကၠိဖိဒံၣ်မိၣ်ကရံးတံးသုးမုၢ်ဒိၣ်(ABSDF), တလၢၤကီၢ်သီပၣ်တံၣ်-တၢ်ထီဒါသုးမီၤစိရိၤ(NMSP –AD), ကီၢ်ပယီၤပိၥ်မုၣ်ကရၢခိၣ်ကျၢၢ်(WLB) တဖၣ် ဘိးဘၣ်ရၤလီၤ၀ဲန့ၣ်လီၤ.
ကီၢ်ပယီၤပူၤ အပူၤကွံၥ်(၄)နံၣ်အတီၢ်ပူၤ ထံလီၢ်ကီၢ်ပူၤတၢ်ဒုးတၢ်ယၤတဖၣ်ကဲထီၣ်သးအဖီခိၣ် ခီဖျိထံကီၢ်ခီဂၥ် ကွီၢ်မ့ၣ်တၢ်ဖံးတၢ်မၤတဖၣ် အတၢ်ဟံးန့ၢ်တၢ်ဘၣ်ဘျူးအပူၤ တၢ်ကူလဲၢ်မၤကၤပှၤကညီ, တၢ်မၤတရီတပါတဖၣ်, တၢ်မၤဆူၣ်မၤဆါတဖၣ်, တၢ်မၤသံပှၤကညီတဖၣ်, တၢ်မၢဆူၣ်ဒ်ပှၤမၤတၢ်ဖိအသိးဒီး ဆဲၣ်ဘၣ်တၢ်လံၣ်တၢ်လီတဖၣ် ဟဲအါထီၣ်ဖျိဖျိဖျါဖျါအဂ့ၢ် ဖဲၣ်ဒရၢၢ်ဒံၣ်မိၣ်ကခြ့ၣ်စံၣ်ဂံၢ်ဘါကရူၢ်တဖၣ် စံး၀ဲန့ၣ်လီၤ.
လံၥ်ပၥ်ဖျါအပူၤ ပၥ်ဖျါဃၥ်၀ဲစ့ၢ်ကီးလၢ သုးပဒိၣ်အစိၤစိၤတဖၣ် ခီဖျိကွၢ်ကပၤ သဲစးတၢ်ဒိၣ်စိအဂီၢ်ဒီး တၢ်ဖျိဖျိဖျါဖျါတအိၣ်, တၢ်တူၢ်မူတူၢ်ဒါတအိၣ်ဒီး အီၣ်ကဘျံးကဘျၣ်တဖၣ်အဃိ ကီၢ်ပယီၤပူၤ တၢ်ထုးထီၣ်ကသံၣ်မူၤဘှီးဒီးတၢ်ဆါတၢ်ပှ့ၤတဖၣ်ပၥ်ဃုၥ် တဖိးသဲစးတၢ်မၤကမၣ်တဖၣ် တၢ်မၤတ့ၢ်အီၤလၢ ဆံယၤဖှိၣ်လံၤလံၤလံအဂ့ၢ်န့ၣ်လီၤ.
ဒ်သိး တၢ်ကဒုးလီၤပှီၢ်ကွံၥ် ကီၢ်ဆၢခီဂၥ် ဆဲၣ်ဘၣ်ကွီၢ်မ့ၣ်ဒီးကွီၢ်မ့ၣ်အဂုၤအဂၤတဖၣ် ကန့ၢ်အဂီၢ် ထံကီၢ်အိၣ်ဘူးလိၥ်သးတဖၣ်ဒ်အမ့ၢ် ကၠီၣ်တဲၣ်, တရူး, အ့ဒံယါ, ဘ့ကလါဒ့း, လၣ်အိၣ်ထံကီၢ်တဖၣ် ကပၥ်ဖှိၣ်မၤသကိးတၢ်လၢ တၢ်ဆဲးကျိးဒီးတၢ်ဟ့ၣ်ခီဟ့ၣ်နီၤတၢ်ကစီၣ်တၢ်ဂ့ၢ်တၢ်ကျိၤတဖၣ်အဂီၢ် ကီၢ်ပယီၤဖဲၣ်ဒရၢၢ်ဒံၣ်မိၣ်ကခြ့ၣ်စံၣ်ဂံၢ်ဘါကရူၢ်တဖၣ် ဃ့ထီၣ်ဃၥ်၀ဲန့ၣ်လီၤ.
