လါယနူၤအါရံၤ(၂၁)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်ဟီၣ်က၀ီၤ,ကၠဲးထိၣ်ဒီးဘံလ့ကီၢ်ဆၣ်အပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ခးလီၤကျိဖးဒိၣ်ဒီးဒြိတဖၣ်အဃိ လီၢ်က၀ီၤကမျၢၢ်တဖၣ်တၢ်ဘၣ်ဒိဘၣ်ထံးဒီးအစုလီၤခီၣ်ခိၣ်တၢ်ဟးဂုၤဟးဂီၤတဖၣ် အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ဒူသထူၣ်ပှၤဘၣ်မူဘၣ်ဒါအအိၣ်န့ၣ်လီၤ.
လါယနူၤအါရံၤ(၁၉)သီအနံၤ,မုၢ်ထူၣ်(၁း၄၇)နၣ်ရံၣ်အဆၢကတီၢ်န့ၣ်သုးကီၣ်ကးအသုး(အမတ-၃၁၀)မျိၥ်သုး ခးလီၤကျိဖးဒိၣ်အဃိလဲၤလီၤတဲၥ်ပိၥ်ဖးထီၣ်၀ဲဒၣ်ဖဲခယွဲကရူၢ်ပူၤမ့ၣ်အူတၢၣ်အကပၤဒီးကျဲမ့ၣ်အူတၢၣ်အပျံၤဟးဂီၤကွံၥ်ဒီး မ့ၣ်အူအီၣ်ကျီးဒီးတၢ်အထူၣ်တဖၣ်တဆီ ပှၢ်မ့ၣ်အူအိၣ်ကဲထီၣ်၀ဲန့ၣ်လီၤ.
တနံၤဃီဖဲ ဟါ(၃း၁၅)နၣ်ရံၣ်အဆၢကတီၢ် ဟဲတ့ၢ်လီၤဒြိမ့ၣ်ပိၢ်တဖျၢၣ်အဃိ လီၤတဲၥ်ပိၢ်ဖးထီၣ် ဖဲအီၣ်န၀့ကိအကပၤအသိး တကတီဃီဖဲ ဟါ(၃း၃၀)နၣ်ရံၣ်အဆၢကတီၢ် ဟဲတ့ၢ်လီၤကဒီးဒြိမ့ၣ်ပိၢ်တဖျၢၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ စ့းကွ့သ၀ီပူၤ ကိၣ်မိမ့ တၢ်ဆါတၢ်ပှ့ၤကျးဒီး မ့ၣ်အူအီၣ်ဟးဂီၤကွံၥ်၀ဲ တၢ်ဆါတၢ်ပှ့ၤကျးဒီဖျၢၣ်အဂ့ၢ် စံး၀ဲန့ၣ်လီၤ.
လါယနူၤအါရံၤ(၁၈)သီအနံၤ, မုၢ်ထူၣ်(၁း၅၀)နၣ်ရံၣ်အဆၢကတီၢ် သုးကီၣ်ကးအသုးအဂံၢ်အဘါအိၣ်(၃၀)ဘျဲၣ် လၢစိၣ်ဃုၥ်ဒီးဒြိတဖၣ်လၢ အိၣ်ဖဲငပၠီတီဒီးတဂ့ၤခၠီဖၠါအဘၢၣ်စၢၤ အ့ရှၢကျဲမုၢ်အဖီခိၣ်, မီၣ်တုးကိတဖၣ် ခးလီၤကဒီးဒြိမ့ၣ်ပိၢ်အဃိ လဲၤလီၤတဲၥ်ပိၢ်ဖး၀ဲဖဲ ကရ၀့ဆ့းသ၀ီကျဲအနုၥ်ဒီးအ့ရှကျဲအနၢၤ အူရွ့ၣ်မီၣ်ဟံၣ်အမဲၥ်ညါအဃိ ဘၣ်ဟးဂီၤကွံၥ်၀ဲ ဟံၣ်ဒီးတၢ်ဆါတၢ်ပှ့ၤကျးတဖၣ်၀ံၤ အူရွ့ၣ်မီၣ်စ့ၢ်ကီးဘၣ်ဒိ၀ဲန့ၣ်လီၤ.
လၢန့ၣ်အမဲၥ်ညါ လါယနူၤအါရံၤ(၁၇)သီအနံၤ, ဟါ(၈)နၣ်ရံၣ်အဆၢကတီၢ် သုးကီၣ်ကးကဘီယူၤဒုးသုးလဲၤ တ့ၢ်လီၤမ့ၣ်ပိၢ်(၂)ဖျၢၣ်ဆူ ကီၢ်ရ့ၣ်ဒူသထူၣ်, ဘံလ့ကီၢ်ဆၣ်, မဲးပြ့ခံကရူၢ်, ကစၢၢ်ဖိသ၀ီပူၤအဃိ သ၀ီဖိလၢအမ့ၢ် အူထိမၠ့းအဟံၣ်ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
