လါယနူၤအါရံၤ(၂၂)သီ,၂၀၂၅နံၣ်
ကၠီၣ်တဲၣ်-ပယီၤကီၫ်ဆၢ အိၣ်လဲတၫ်လီအီၣ်ကျိာ်စ့တၫ်ဖံးတၫ်မၤ(ကၠါဖၠး) လဲၤတရံးသးတၫ်လီၫ်တဖၣ် လၢအမ့ၫ် ရွှ့ၣ်ကိးကိာ်ဒီး KK Parkဟီၣ်က၀ီၤတဖၣ် အလီမ့ၣ်အူဒီးအ့ၣ်ထၢၣ်နဲးတၫ်ဆဲးကျိးတဖၣ် တမ့ၫ်လၢဒိးန့ၫ်၀ဲ လၢကီၫ်ပယီၤအိၣ်ဘၣ်ဒီးဟံးန့ၫ်၀ဲလၢကီၫ်ကၠီၣ်တဲၣ်အိၣ်တဆီအဂ့ၫ် တၫ်ကစီၣ်သန့လၢသုးကီၣ်ကးပၢတဖၣ် ပာ်ဖျါ၀ဲလီၤ.
တၫ်သူၣ်ထီၣ်ဒီးကျိာ်စ့အါတက့ၫ်လၢတၫ်ဘျၢလီၤတဖၣ်စ့ၫ်ကီး မ့ၫ်ကီၫ်ချၢတၫ်ကရၢကရိတဖၣ် ဟဲနုာ်လီၤဘျၢလီၤ၀ဲ၀ံၤ ပှၤလၢမၤအိၣ်လဲတၫ်လီအီၣ်ကျိာ်စ့တဖၣ်ဒီးအိၣ်လဲတၫ်လိၣ်ခိၣ်လိၣ်ကွဲတဖၣ်န့ၣ် မ့ၫ်ပှၤတဖၣ်လၢ စးထီၣ်ဖဲ၂၀၁၅နံၣ်အပူၤဃၣ်ဃၣ် မၤတ့ၫ်၀ဲလၢကီၫ်ဖံးလံးပံး,ကီၫ်ခၣ်ဘီဒံယါတဖၣ်အပူၤ၀ံၤ ဖဲ၂၀၁၉နံၣ်အ လီၫ်ခံမးဒီးဟဲနုာ်လီၤမၤ၀ဲလၢကီၫ်ပယီၤပူၤအဂ့ၫ် သုးကီၣ်ကးတဲ၀ဲလီၤ.
ဒ်သိးဒီးတၫ်မၤ၀ဲအိၣ်လဲတၫ်လံၣ်အီၣ်လီအီၣ်တဖၣ်ဒီးအိၣ်လဲတၫ်လိၣ်ခိၣ်လိၣ်ကွဲတဖၣ်ကန့ၫ်အဂီၫ် ကဒိးန့ၫ် ဘၣ်လီမ့ၣ်အူဒီးအၣ်ထၢၣ်နဲးတၫ်ဆဲးကျိးအဂီၫ်,တၫ်ဖံးတၫ်မၤတဖိးသဲစးအဂီၫ် တၫ်စုက၀ဲၤတဖၣ်ဒီး တၫ်သူၣ် ထီၣ်တဖၣ်အဂီၫ် ပှၤလၢမၤတၫ်ဖံးတၫ်မၤတဖၣ်န့ၣ် ဘၣ်ဟံးန့ၫ်အခီၣ်တဃာ်လၢကီၫ်အဂၤ၀ံၤဒီးသူ၀ဲအဂ့ၫ် ပာ်ဖျါ၀ဲလီၤ.
ပှၤလၢမၤတၫ်ဖံးတၫ်မၤ၀ဲန့ၣ်တဖၣ်န့ၣ် ဘၣ်ခီဂာ်၀ဲ ထံကီၫ်လၢအိၣ်ဘူးတဖၣ်တဆီ၀ံၤ ဟဲနုာ်လီၤ၀ဲဆူ ကီၫ်ပယီၤပူၤ လၢတဖိးသဲစးအကျဲ၀ံၤ အိၣ်လဲတၫ်လိာ်ခိၣ်လိာ်ကွဲကလီၤမၫ်ကွံာ်အဂီၫ် လိၣ်လၢထံကီၫ်အိၣ်ဘူးတဖၣ် ကပာ်ဖှိၣ်မၤသကိးဘၣ်တၫ်န့ၣ်လီၤ.
ကီၫ်ချၢထံဖိကီၫ်ဖိလၢဟဲနုာ်လီၤတဖိးသဲစးဒီးမၤအီၣ်လဲတၫ်လိာ်ခိၣ်လိာ်ကွဲတဖၣ် တၫ်ဃုဖီၣ်သမံသမိး၀ဲ အပူၤ ကီၫ်ဆၢဟီၣ်က၀ီၤတဖၣ်ဒ်အမ့ၫ် လီးကဲၣ်,မူၣ်ဆဲၣ်,တၣ်ခၠံၣ်လ့း,၀့ၫ်ရၤမတံပာ်ဃုာ် ကီၫ်ဆၢတၫ်လီၫ် အဂၤတဖၣ်အပူၤ ပှၤလၢဟဲနုာ်လီၤတဖိးသဲစးတဖၣ် တၫ်ဆှၢကဒါက့ၤအီၤဆူအထံအကီၫ်၀ံၤ ဖဲ၂၀၂၃နံၣ်, လါအီးကထိဘၢၣ်(၅)သီနံၤ တုၤ ၂၀၂၅နံၣ် လါယနူၤအါရံၤ(၁၃)သီနံၤ ပှၤခဲလၢာ်ပာ်ဖှိၣ်(၅၅,၇၁၁)ဂၤ တၫ်က့ၤဆှၢ၀ဲန့ၫ်ဒီးလၢကတီၫ်အံၤသမံသမိးဃုထံၣ်သ့ၣ်ညါ၀ဲအိၣ်တပယူာ်ဃီအဂ့ၫ် တၫ်သ့ၣ်ညါဘၣ်လီၤ.
