လါယနူၤအါရံၤ(၂၁)သီ,၂၀၂၅နံၣ်
တၫ်ကက့ၤထီၣ်မၤန့ၫ်ကဒါက့ၤ ကီးတရံး-ရၤမတံအ့ရှၢကျဲအဂီၫ် သုးကီၣ်ကးအသထူၣ်သုးရ့ၣ်ဒီတရ့ၣ်န့ၣ် ကမၤပှဲၤဂံၫ်ဘါ ဖဲကြူၫ်တုဟီၣ်က၀ီၤ (၅၄၅)ဒီး(၅၄၆) သုးရ့ၣ်အိၣ်အဂ့ၫ် တၫ်သ့ၣ်ညါဘၣ်လၢ တၫ်ပၢၫ်ဆၢသုးအိၣ်န့ၣ်လီၤ.
လၢအ့ရှၢကျဲစ့ၫ်ကီး သုးကီၣ်ကးအသုးန့ၣ် သူ၀ဲသုးသိလ့ၣ်မ့ၫ်ဂ့ၤ,ကမျၢၫ်အသိလ့ၣ်မ့ၫ်ဂ့ၤ၀ံၤ မၤပှဲၤဂံၫ်ဘါ,စိာ်ဆှၢတၫ်စုက၀ဲၤဒီးတၫ်အီၣ်တၫ်အီအိၣ်၀ဲအဂ့ၫ် တဲ၀ဲလီၤ.
ဖဲလါယနူၤအါရံၤ(၁၈)သီအနံၤန့ၣ် သိလ့ၣ်(၆)ပၣ်(၂)ခိၣ်န့ၣ် တၫ်သ့ၣ်ညါဘၣ်လၢ ဟဲထီၣ်ဆူကီးတရံးတကပၤ ဖဲဂီၤ(၉း၅၀)နၣ်ရံၣ်အကတီၫ်၀ံၤ တခိၣ်န့ၣ်တီၣ်၀ဲသုးဖိ(၄၀)ဂၤဒီးအိၣ်တ့ၫ်တခိၣ်န့ၣ် ကးဘၢဃာ်၀ဲလီၤ.
ဖဲသုးကီၣ်ကးအသုးသိလ့ၣ် (၂)ခိၣ် ဟဲထီၣ်အကတီၫ် တၫ်ပၢၫ်ဆၢသုးတကပၤ ထုးဒီးမ့ၣ်ပိၫ်ဘၣ်ဆၣ် နီ၀ဲချ့ဒီးပူၤဖျဲး၀ဲအဂ့ၫ်တဲ၀ဲလီၤ.လၢဖၣ်အၣ် ကမျၢၫ်သိလ့ၣ်လၢ သုးကီၣ်ကးသူ၀ဲဒီးဟဲထီၣ်အိၣ်အါမးအဂ့ၫ် တဲ၀ဲလီၤ.
လၢအ့ရှၢကျဲ သုးကီၣ်ကးအသုးကျိၤလၢဟဲဒီးတၫ်ပၢၫ်ဆၢသုးပာ်ဖှိၣ်တဖၣ်အဘၢၫ်စၢၤ တၫ်ဒုးအိၣ်ထီၣ်မုၫ်နၤ မုၫ်ဆါတပယူာ်ဃီ၀ံၤ သုးကီၣ်ကးတကပၤ မၤပှဲၤအါထီၣ်ဂံၫ်ဘါအိၣ်၀ဲအဂ့ၫ် ဂ့ၫ်ခီၣ်ထံးတၫ်ကစီၣ် တဲ၀ဲလီၤ.
Ref: Salween Press
