လါယနူၤအါရံၤ(၁၈)သီ,၂၀၂၅နံၣ်
အ့ၣ်ယၣ်၀တံၣ်ကီၢ်ခီအပူၤ ရၢၢ်ခၢၣ်သုးမုၢ်ဒိၣ်(AA)ပၢဆှၢဃၥ်၀ဲ ဘီမံးသ၀ီ၀ံၤ သုးကီၣ်ကးအသုးတဖၣ် ဂုၤက့ၤအခံတုၤရွ့ၣ်သီၣ်ယၣ်ပီၣ်လဲၢ်နံၤတပၤအဂ့ၢ် တၢ်သ့ၣ်ညါဘၣ်လၢဂံၢ်ခီၣ်ထံးသုးဂ့ၢ်၀ီတၢ်ကစီၣ်တဖၣ်အအိၣ်န့ၣ်လီၤ.
တနံၤအံၤ လါယနူၤအါရံၤ(၁၈)သီအနံၤ, မုၢ်ထူၣ်(၂း၃၀)နၣ်ရံၣ်အဆၢကတီၢ်န့ၣ် ကဘီယူၤလၢအိၣ်ဖဲပသံၣ်တဖၣ် လဲၤယူၢ်ထီၣ်ဆူဘီမံးတပၤအသိး ဖဲမဟါအနံၤစ့ၢ်ကီး မၤ၀ဲကလံၤကျါတၢ်ဒုးတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“ကဘီယူၤတဖၣ် လဲၤထီၣ်၀ဲလီၤ. သုးကလၢၤလၢအိၣ်ဖဲဘီမံးတဖၣ်တခီ ဘူးထီၣ်လၢလီၤကလဲလံ.”အဂ့ၢ် ပှၤလၢအိၣ်ဘူးဒီး တၢ်ပၢၢ်ဆၢဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ဖဲအပူၤကွံၥ် လါယနူၤအါရံၤ(၁၆)သီအနံၤလံၤလံၤန့ၣ် တၢ်ဒုးတဖၣ်ဆူၣ်ထီၣ်၀ဲလၢ ဘီမံးအိၣ်သုးကီၣ်ကးသုးကလၢၤဒီး AAအဘၢၣ်စၢၤ၀ံၤ AAပၢဆှၢန့ၢ်၀ဲ ဘီမံးထးခီတပၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုး လဲၤတ့ၢ်လီၤမ့ၣ်ပိၢ်အါအါဂီၢ်ဂီၢ် ဆူဘီမံးသ၀ီဒီးမကၠံစ့ၣ်သ၀ီတဖၣ်၀ံၤ သုးကီၣ်ကးအသုးတဖၣ် ဂုၤက့ၤအခံတုၤဆူ ရွ့ၣ်သီၣ်ယၣ်ကီၢ်ဆၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ သုးကီၣ်ကးအပှၤသုးဖိလၢ ဟဲဂုၤက့ၤအခံဖဲဘီမံးတဖၣ် ဟဲက့ၤပၥ်ပတုၥ်သးဖဲ သပီးကၣ်လၢအိၣ်ဖဲ ဘီမံးဒီးရွ့ၣ်သီၣ်ယၣ်အဘၢၣ်စၢၤ၀ံၤ ဟဲက့ၤထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါယနူၤအါရံၤ(၁၀)သီအနံၤန့ၣ် သုးကီၣ်ကးမၤအါထီၣ် သုးအဂံၢ်အဘါဒီး သုးသိလ့ၣ်ထး(၁၀)ခိၣ်ဆူ ဘီမံးတပၤအဂ့ၢ် တၢ်သ့ၣ်ညါဘၣ်န့ၣ်လီၤ.
ရွ့ၣ်သီၣ်ယၣ်လၢ သုးကီၣ်ကးအသုးဂုၤက့ၤအခံအံၤ အိၣ်ယံၤဒီးမုၢ်နုၥ်ကလံၤထံးသုး၀ဲၤလီၢ်ခိၣ်သ့ၣ်(နတခ)အိၣ် ၀့ၢ်ပသံၣ်ထဲဒၣ် စှၤမံၤလၤလီၤဒီး သုးကီၣ်ကးအသုး မၤပှဲၤအါထီၣ်ဃၥ် အသုးဂံၢ်ဘါလၢ ခိ,ထံ ဒီးကလံၤသုးခဲလၢၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
