လါယနူၤအါရံၤ(၁၈)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၆), ကီၢ်ရ့ၣ်ဒူပျၥ်ယၥ်, ကီးတရံးကီၢ်ဆၣ် ရၤမတံး-ကီးတရံးအ့ရှၢကျဲမုၢ်အဖီခိၣ် အီၣ်စ့ၣ်ယၣ်သုးကျိၤတစိၤတလီၢ်သုးကလၢၤတဖျၢၣ်အံၤ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲအဂ့ၢ် ကလံၤထံးသုးဟီၣ်က၀ီၤ ပၥ်ဖျါဃၥ်၀ဲဖဲတနံၤအံၤ လါယနူၤအါရံၤ(၁၈)သီအနံၤန့ၣ်လီၤ.
ဖဲလါယနူၤအါရံၤ(၁၂)သီအနံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ အီၣ်စ့ၣ်ယၣ်သုးကျိၤ အတၢ်မဲၥ်ညါတစိၤတလီၢ်သုးကလၢၤတဖျၢၣ်လၢ အိၣ်ဖဲကီးတရံးကီၢ်ဆၣ်, တီနီၢ်ကစၢၢ်ခီၣ်ထံးအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ထီၣ်ဒုးမၤန့ၢ် အီၣ်စ့ၣ်ယၣ်သုးကျိၤအသုးကလၢၤတဖျၢၣ်အံၤအပူၤ တၢ်ပၢၢ်ဆၢသုးတဖၣ်လၢနုၥ်လီၤဒုး၀ဲတဖၣ်ဒ်အမ့ၢ် Cobraသုးကျိၤ, Venom သုးကျိၤ, PDF ဒီး ခ့ဘှ့သူသုးကျိၤတဖၣ် ပၥ်ဃုၥ်၀ဲန့ၣ်လီၤ.
စးထီၣ်လၢ လါယနူၤအါရံၤ(၁၁)သီတုၤ(၁၇)သီအနံၤ, (၇)သီအတီၢ်ပူၤ တၢ်ဒုးတဖၣ်ကဲထီၣ်တ့ၢ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၥ်မဲကမျၢၢ်တၢ်ဒီသဒၢသုးဒီးတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤ တၢ်ဒုးတဖၣ်အပူၤ သုးကီၣ်ကးအသုးဘၣ်သံ၀ဲ(၂၈)ဂၤဒီးဘၣ်ဒိ၀ဲ(၄၅)ဆူအဖီခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဒုးတဖၣ်အပူၤ တၢ်ပၢၢ်ဆၢသုးပၥ်ဖှိၣ်တဖၣ် မၤန့ၢ်၀ဲ စုက၀ဲၤအဆံး(၁၁)ခိၣ်, ကျိဖးဒိၣ်(၁)ခိၣ်, မ့ၣ်ပိၢ်, ကျိချံပှၥ်သၣ်အကလုၥ်ကလုၥ်ဒီး သုးတၢ်ပီးတၢ်လီၤတနီၤအဂ့ၢ် ပၥ်ဖျါဃၥ်၀ဲန့ၣ်လီၤ.
Photo: Saw Kaw
