လါယနူၤအါရံၤ(၁၇)သီအနံၤ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၁), ဒူသထူၣ်ကီၢ်ရ့ၣ်, ဘံလ့ကီၢ်ဆၣ်, ဃီဖျိပျဲၢ်ကရူၢ်အပူၤ ဖဲမဟါအနံၤ, ဟါ(၄း၅၀)နၣ်ရံၣ်အဆၢကတီၢ်သုးကီၣ်ကးအသုးလဲၤတ့ၢ်လီၤSuicide Drone ခံဘျီတဘျီလၢထံဆံၣ်ဘီကၠိအဃိ ဘၣ်ဟးဂီၤကွံၥ်၀ဲ ကၠိအခိၣ်ဒုးဒီးပဲတြီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်တယၣ်အီၤအဖီခိၣ် သုးကီၣ်ကးအသုး Suicide Droneခံဘၣ်လၢ အိၣ်ဖဲကမးမိၢ်အံၤ ဟဲလီၤတဲၥ်၀ဲဒၣ်ဖဲ ထံဆံၣ်ဘီကၠိခိၣ်တဘ့ၣ်ဒီး ထံဆံၣ်ဘီသ၀ီဃၢၤတဘ့ၣ်အဂ့ၢ် ကီၢ်ရ့ၣ်ဒူသထူၣ်ပှၤကတိၤတၢ်ပၢ ပဒိၣ်အ့နၢၤ စံးဘၣ် R2K န့ၣ်လီၤ.
အ၀ဲစံး၀ဲလၢ” Suicide Droneအံၤ လဲၤလီၤတဲၥ်လၢ ကၠိခိၣ်ဒီးကၠိဒုးဟးဂီၤကွံၥ်အသိး ဘၣ်ဟးဂီၤကွံၥ်စ့ၢ်ကီး ကၠိပဲတြီၢ်တဖၣ်”အဂ့ၢ် န့ၣ်လီၤ.
ခီဖျိလၢ သုးကီၣ်ကးအသုးလဲၤတ့ၢ်လီၤ Suicide Drone ခံဘ့ၣ်အဃိ ဒူသ၀ီဖိတဖၣ်ဘၣ်အိၣ်ဒီးတၢ်ပျံၤတၢ်ဖုးအသိး ကၠိဖိတဖၣ်စ့ၢ်ကီး ထီၣ်ကၠိတဘူၣ်လၢၤဘၣ်အဃိ ဘၣ်ကးတံၥ်ဃၥ်ကၠိအဂ့ၢ် တၢ်သ့ၣ်ညါဘၣ်န့ၣ်လီၤ.
ဒူသ၀ီကမျၢၢ်ဖိတဖၣ် ဘၣ်အိၣ်၀ဲဒၣ်လၢ တၢ်ပျံၤတၢ်ဖုးဒီး ဘၣ်အိၣ်ကနးတၢ်အိၣ်သးတဖၣ်၀ံၤ လဲၤအိၣ်လၢသ၀ီခိၣ်ဃၢၤအသိး လဲၤအိၣ်၀ဲလၢအစံၥ်ဒဲကျီးဒဲးတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်(၂၀၂၄)နံၣ် လါအ့ဖြ့ၣ်(၂၈) သီအခါန့ၣ်စ့ၢ်ကီး သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအကဘီယူၤလဲၤတ့ၢ်လီၤဒံးမ့ၣ်ပိၢ်လၢထံဆံၣ်ဘီသ၀ီပူၤအဃိ ဘၣ်ဟးဂီၤကွံၥ် ကၠိတၢ်သူထီၣ်တဖၣ်ဒီး ကမျၢၢ်ဟံၣ်ဃီတဖၣ်န့ၣ်လီၤ.
