လါယနူၤအါရံၤ(၁၇)သီ,၂၀၂၅နံၣ်
ကၠါဖၠးဒီးတၢ်ကူလဲၢ်မၤကၤပှၤကညီတၢ်ဂ့ၢ်ကီတဖၣ် ကဲထီၣ်သးအၢအၢသီသီလၢကၠီၣ်တဲၣ်-ပယီၤကီၢ်ဆၢအဆၢကတီၢ် ကၠီၣ်တဲၣ်စီၤပၤသုးမုၢ်ဒိၣ် ကရၢလီၤဆီတီခိၣ်ရိၥ်မဲ၀ံၤ မၤအါထီၣ်ဃၥ် ဘံၣ်ဘၢသုးအဂံၢ်အဘါ ဖဲကၠီၣ်တဲၣ်-ပယီၤကီၢ်ဆၢအိၣ်တၢ်လီၢ်(၅)တီၤအပူၤန့ၣ်လီၤ.
စးထီၣ်လၢလါယနူၤအါရံၤ(၁၆)သီအနံၤန့ၣ် ကၠီၣ်တဲၣ်စီၤပၤသုးမုၢ်ဒိၣ် ကရၢလီၤဆီဒီးလီၢ်က၀ီၤပှၤဘၣ်မူဘၣ်ဒါတဖၣ် ဟးဆှၣ်သမံသမိးတၢ် ဖဲကၠီၣ်တဲၣ်-ပယီၤကီၢ်ဆၢ တးကီၢ်ရ့ၣ်အပူၤ တၢ်လီၢ်တဖၣ်ဒ်အမ့ၢ် မဲးဆီး,ထးဆီၣ်ယါ, ဖိးဖရး, အိဖၠၣ်ဒီးမဲၢ်ရမးတၢ်လီၢ်တဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ကတြီဆၢ တဖိးသဲစးတၢ်နုၥ်လီၤတဖၣ်, တၢ်ကူလဲၢ်မၤကၤပှၤကညီ, တဖိးသဲစး ခီကီၢ်ပှၤမၤတၢ်ဖိ နုၥ်လီၤမၤတၢ်တဖၣ်, တၢ်စိၥ်ဆှၢကသံၣ်မူၤဘှီးဒီးတၢ်ဘံၣ်တၢ်ဘၢတၢ်အိၣ်သးတဖၣ်လၢကဲထီၣ်သးလၢ ကီၢ်ဆၢဒီတကျိၤအပူၤအဂီၢ် ကၠီၣ်တဲၣ်သုးမုၢ်ဒိၣ်,ပၢၤကီၢ်သုးဒီးလီၢ်က၀ီၤပှၤဘၣ်မူဘၣ်ဒါတဖၣ် ကပၥ်ဖှိၣ်မၤသကိးတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါယနူၤအါရံၤအတီၢ်ပူၤ တရူးခွါဂဲၤဒိ ၀ၣ်စ့ တၢ်ဂ့ၢ်ကဲထီၣ်သးပၥ်ဃုၥ် တၢ်ပညိၣ်ကူလဲၢ်မၤကၤ တရူးပှၤဟးကသုၣ်ကသီဖိတဖၣ်၀ံၤအလီၢ်ခံ ဟီၣ်ခိၣ်ဒီဘ့ၣ်ထံၣ်သ့ၣ်ညါအဆၢကတီၢ် ကၠီၣ်တဲၣ်ပဒိၣ်ဒီးပှၤဘၣ်မူဘၣ်ဒါတဖၣ် ကဘှါရှဲတၢ်ဂ့ၢ်ကီတဖၣ်အဂီၢ် ဂုၥ်ကျဲးစၢး၀ဲန့ၣ်လီၤ.
လါယနူၤအါရံၤ(၁၅)သီအနံၤစ့ၢ်ကီးကညီသုးခိၣ်ကီၢ်ဆၢBGF,ကညီတၢ်ဘၣ်ဘျူးဒံၣ်မိၣ်ခြ့ၣ်စံၣ်သုးမုၢ်ဒိၣ်(DKBA)ဒီးတရူးပှၤမၤပနံၥ်တၤကၤဖိတဖၣ် ထံၣ်လိၥ်သးလၢဂ့ၢ်ဂီၤအူတၢ်အိၣ်သးအဖီခိၣ်၀ံၤ ထံၣ်လိၥ်တၢၣ်ပီၣ်တဲသကိးသး ဘၣ်ထွဲဒီး လီၢ်က၀ီၤပူၤတၢ်ကူလဲၢ်မၤကၤပှၤကညီဒီးကၠါဖၠးတၢ်ဖံးတၢ်မၤတၢ်ဂ့ၢ်တဖၣ်, တၢ်မၢဆူၣ်မၢဆိးတဖၣ်ဒီးတၢ်သုးစုဆူၣ်ခီၣ်တကးတၢ်မၤဆူၣ်မၤဆါတဖၣ်, ဖိသၣ်လၢသးနံၣ်အိၣ်(၁၈)နံၣ်တဖၣ် တၢ်မၢန့ၢ်ဆူၣ်အီၤဒ် ပှၤမၤတၢ်ဖိ ဂ့ၢ်၀ီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Siamrath
