လါယနူၤအါရံၤ(၁၇)သီ,၂၀၂၅နံၣ်
Hamasကရၢန့ၣ် တုၤလၢအတၫ်ဆၢကတီၫ်အလီၫ်ခံကတၢၫ် ကဒိးန့ၫ်ဘၣ်တၫ်မၤကဆှၣ်လီၤတဖၣ်အဂီၫ် မၤ၀ဲအဂ့ၫ် အံၣ်စရ့ကိတိာ်ခိၣ်ကျၢၫ်တဲ၀ဲ၀ံၤ ကၣ်စၣ်တၫ်ပတုာ်တၫ်ခးတၫ်အၢၣ်လီၤ တၫ်ကပာ်ဂၢၫ်ပာ်ကျၢၤ အဂီၫ် သုးကွံာ်၀ဲမုၫ်နံၤမုၫ်သီန့ၣ်လီၤ.
တၫ်အၢၣ်လီၤလၢတၫ်အၢၣ်လီၤတ့ၫ်တဖၣ် ပှၤပူထီၣ်တၫ်ဖိတဖၣ်တကပၤ မ့ၫ်တတူၫ်လိာ်၀ဲဘၣ်န့ၣ် တၫ်အၢၣ် လီၤ၀ဲအံၤ တၫ်ကတူၫ်လိာ်၀ဲလၢဖိးသဲစးအဂီၫ် အံၣ်စရ့ပဒိၣ်တမ့ၫ်ကမၤတၫ်အိၣ်ဖှိၣ်ဘၣ်အဂ့ၫ် ကိတိာ်ခိၣ် ကျၢၫ် Benjamin Netanyahuတဲ၀ဲလီၤ.
Hamasတကပၤ ကဒိးန့ၫ်ဘၣ် တၫ်မၤကဆှၣ်လီၤတဖၣ်အဂီၫ် တုၤလၢတၫ်ဆၢကတီၫ်အလီၫ်ခံကတၢၫ် မၤ၀ဲအဂ့ၫ် ကိတိာ်ခိၣ်ကျၢၫ်၀ဲၤဒၢးအတၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ. မ့ၫ်တၫ်မနုၤတဖၣ်လဲၣ်ဒု တတဲ၀ဲလီၤတံၫ်ဘၣ်.ဖဲလါယနူၤအါရံၤ(၁၅)သီနံၤ,ဟါခီန့ၣ် တၫ်ပတုာ်တၫ်ခးတၫ်အၢၣ်လီၤလၢဒိးန့ၫ်၀ဲန့ၣ် အံၣ်စရ့ပဒိၣ်တကပၤ ကပာ်ဂၢၫ်ပာ်ကျၢၤ၀ဲလၢဖိးသဲစးအဂီၫ် မုၫ်လၫ်၀ဲလၢကမၤ၀ဲ ကိတိာ်တၫ်အိၣ်ဖှိၣ် ဘၣ်ဆၣ် တၫ်အိၣ်ဖှိၣ်၀ဲန့ၣ် ဘၣ်တၫ်သုးကွံာ်၀ဲန့ၣ်လီၤ.
လၢလါတဖၣ်အပူၤကျဲးစၢးတၢၣ်ပီၣ်သကိး၀ဲ၀ံၤ ဖဲမဟါနံၤဒိးန့ၫ်၀ဲ အပတီၫ်ပာ်ဃုာ်(၃)ကတီၫ် တၫ်ပတုာ် တၫ်ခးတၫ်အၢၣ်လီၤန့ၣ် ပာ်ဂျၢၫ်ပာ်ကျၢၤ၀ဲမ့န့ၫ်န့ၣ် ဖဲလါယနူၤအါရံၤ(၁၉)သီအနံၤန့ၣ် အသးသမူ ကစးထီၣ် အိၣ်၀ဲလီၤ.
တုၤလၢလါယနူၤအါရံၤ(၁၆)သီ,မဟါနံၤ အံၣ်စရ့သုးတကပၤ လဲၤခးလီၤကၣ်စၣ်ဟီၣ်က၀ီၤလၢ ကလံၤကျါ အဃိ ပှၤပၣ်လဲးစတဲဘၣ်သံတစှၤန့ၣ်(၇၀)ဂၤအဂ့ၫ် ပၣ်လဲးစတဲဆူၣ်ချ့ဘၣ်မူဘၣ်ဒါတဖၣ် တဲ၀ဲလီၤ.
အံၣ်စရ့ဒီးပၣ်လဲးစတဲ Hamasကရၢအဘၢၣ် လၢယံာ်(၆)နွံ တၫ်ပတုာ်တၫ်ခးတၫ်အၢၣ်လီၤန့ၣ် မ့ၫ်ဒ်သိး ကမၤ ပတုာ်ကွံာ်၀ဲ တၫ်ဒုးလၢယံာ်တ့ၫ်(၁၅ )လါအံၤအဂီၫ်န့ၣ်လီၤ. အံၣ်စရ့လၢဟါမးက့ၤဖီၣ်တဖၣ် တၫ်ကပျၫ်ကွံာ် အဂီၫ်ဒီးပှၤပၣ်လဲးစတဲဃိၣ်ဖိလၢအကယၤတဖၣ်တၫ်ကပျၫ်ကွံာ်အဂီၫ် တၫ်အၢၣ်လီၤအပူၤ ပာ်ဃုာ်၀ဲလီၤ. လၢတၫ်အၢၣ်လီၤအဆိကတၢၫ်တပတီၫ်န့ၣ် ကၣ်စၣ်ပူၤ လၢ(၄၂)သီ တၫ်ကဘၣ်ပတုာ်တၫ်ခး၀ံၤ ပှၤအံၣ်စရ့ဖိ လၢဘၣ်က့ၤဖီၣ်အီၤ(၃၃)ဂၤ Hamasကဘၣ်ပျၫ်ကွံာ်၀ဲန့ၣ်လီၤ.
