လါယနူၤအါရံၤ(၁၇)သီ,၂၀၂၅နံၣ်
တနီသရံးကီၢ်ခီအပူၤ ခီဖျိတၢ်ဒုးတဖၣ်ဒီးကလံၤကျါတၢ်ဒုးတဖၣ်အဃိ ပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤသးအိၣ်ထီၣ်တုၤဃုကလးတခီဘျဲၣ်(၆၅,၈၀၀)အဂ့ၢ် တၢ်ဃုထံၣ်သ့ၣ်ညါကရၢသဘျ့တဖုလၢအမ့ၢ် FE5 Tanintharyi ထုးထီၣ်ပၥ်ဖျါဃၥ်၀ဲဖဲ လါယနူၤအါရံၤ(၁၅)သီအနံၤန့ၣ်လီၤ.
ဖဲအပူၤကွံၥ်လါဒံၣ်စ့ဘၢၣ်အတီၢ်ပူၤ တၢ်ဒုးကဲထီၣ်သးလၢတၢ်ပၢၢ်ဆၢသုးဒီးသုးကီၣ်ကးအသုးအဘၢၣ်စၢၤအိၣ်ထီၣ်(၃၀)ဘျဲၣ်၀ံၤ ခံခီခံကပၤတၢ်ဒုးတဖၣ်ဆူၣ်အဃိ ပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးတဖၣ်အိၣ်ထီၣ်၀ဲအဖၢမုၢ်ဒံးန့ၣ်လီၤ.
ဒ၀ဲၢ်ကီၢ်ရ့ၣ်အပူၤကီၢ်ဆၣ်တဖၣ်ဒ်အမ့ၢ်ဒ၀ဲၢ်,လီလိၣ်,ယ့ၣ်ဖၠူၣ်,သယဲးခၠီကီၢ်ဆၣ်ပူၤတခီပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးသးအိၣ်ထီၣ်တုၤခံကလးတခီဘျဲၣ်(၂၅,၉၀၀)န့ၣ်လီၤ.
လါဒံၣ်စ့ဘၢၣ်အတီၢ်ပူၤ တနီသရံးကီၢ်ခီအပူၤ လီၢ်က၀ီၤကမျၢၢ်(၇)ဂၤဘၣ်တၢ်မၤသံအီၤ၀ံၤ ဟံၣ်ဃီအဖျၢၣ်(၂၆၀)ဘျဲၣ် ဘၣ်တၢ်ဒွဲၣ်အူမၤဟးဂီၤကွံၥ်အီၤအဂ့ၢ် FE5Tanintharyi ပၥ်ဖျါဃၥ်၀ဲန့ၣ်လီၤ.
တကးဘၣ် တၢ်ဖီၣ်န့ၢ်ဆူၣ်ကမျၢၢ်တၢ်အိၣ်သးတဖၣ်စ့ၢ်ကီးအိၣ်ဒံး၀ဲအဖၢမုၢ်လီၤ၀ံၤ တလါအတီၢ်ပူၤ သုးကီၣ်ကးဖီၣ်န့ၢ်ဆူၣ်ဃၥ်၀ဲ ကမျၢၢ်(၃၄၀)ဘျဲၣ်အဂ့ၢ် စံး၀ဲန့ၣ်လီၤ.
ဘီမုၢ်စၢဖှိၣ်ကရၢဘၣ်ထွဲဘၣ်ကီဘၣ်ခဲ၀ဲၤဒၢးခိၣ်ကျၢၢ်(UNHCR) အ၂၀၂၅နံၣ်,လါယနူၤအါရံၤ(၆)သီအနံၤ အလံၥ်ပၥ်ဖျါအပူၤ ပၥ်ဖျါဃၥ်၀ဲလၢ ကီၢ်ပယီၤအပူၤ ပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးအိၣ်ထီၣ်တုၤ (၃)ကလီၢ်တခီဘျဲၣ်လံအဂ့ၢ်န့ၣ်လီၤ.
