လါယနူၤအါရံၤ(၁၆)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,ပသံၣ်ကီၫ်ဆၣ်,ကမျၢၫ်တနီၤလၢအိၣ်ဖဲခၠီသၣ်ပီၣ်လဲၣ်နံၤတဖၣ် ဘၣ်ယိၣ်၀ဲလၢတၫ်ဒုးကကဲထီၣ်အဃိ စးထီၣ်သုးလီၫ်သုးကျဲလံအဂ့ၫ် တၫ်သ့ၣ်ညါဘၣ်လၢ လီၫ်က၀ီၤကမျၢၫ်အိၣ်န့ၣ်လီၤ.
လၢထံကျဲ မကၠံစ့ၣ်သ၀ီလၢ အိၣ်စီၤစုၤယံာ်ဒီးခၠီသၣ်ပီၣ်လဲၣ်နံၤ ထဲဒၣ်(၃၀)မဲၣ်ဘျဲၣ်အံၤ ရၢၫ်ခၢၣ်သုးမုၫ်ဒိၣ် (AA)ဒီးသုးပာ်ဖှိၣ်တဖၣ် နုာ်လီၤဒုး၀ဲ၀ံၤအလီၫ်ခံ တၫ်ဘၣ်ယိၣ်တဖၣ်အဃိ သူၣ်က့သးပှၫ်ဒီးပှၤလၢကျိာ်စ့အိၣ် တဖၣ် သုးလီၫ်သုးကျဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“အခဲအံၤ ပှၤတၫ်အိၣ်တၫ်ယၢၤတဖၣ် စးထီၣ်သုးအသးလံန့ၣ်လီၤ.အ၀ဲသ့ၣ်တဖၣ် မ့ၫ်တသုးအသးနာ်သက့ တၫ်ဂ့ၫ်ကီတအိၣ်ဘၣ်.ဟးထီၣ်လၢသိလ့ၣ်ဃဲးကနာ်သ့န့ၣ်လီၤ.ပှၤမၤအီၣ်မုၫ်ဆ့ၣ်မုၫ်ဂီၤအါတက့ၫ်န့ၣ် စးထီၣ် သုးန့ၫ်၀ဲပှၤသူၣ်က့သးပှၫ်တဖၣ်အလီၫ်အကျဲလံအဂ့ၫ်”လီၫ်က၀ီၤပိာ်ခွါလၢတအဲၣ်ဒိးပာ်ဖျါအမံၤတဂၤတဲ၀ဲလီၤ.
ဖဲအပူၤကွံာ်စှၤသီအတီၢ်ပူၤ တၫ်ဒုးကဲထီၣ်ဖဲမကၠံစ့ၣ်သ၀ီန့ၣ် တၫ်နၫ်ဟူဘၣ်ကျိဖးဒိၣ်အကလုၫ်တဖၣ်အဃိ ပှၤလီၫ်က၀ီၤဖိတဖၣ် ဘၣ်ယိၣ်တၫ်ဒိၣ်ထီၣ်၀ဲလီၤ.
သုးကီၣ်ကးအသုးန့ၣ် လၢ၀့ၫ်ခၠီသၣ်,နီၫ်ဂံၫ်(၇)က၀ီၤဒ့,ဖျၢၣ်ထူၣ်ပျီဒီးစကါ၀ၣ်ကစၢၫ်ခိၣ် ကမၤ၀ဲတၫ်ခီၣ်ဆၢ ဒုးတၫ်အဂီၫ် တၫ်ကစီၣ်ဟးထီၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ဟိၣ်တဲဒီးကျးလၢအိၣ်ဖဲခၠီသၣ်ပီၣ်လဲၣ်နံၤတဖၣ် တၫ်သုတကးတံာ်အဂီၫ် သုးကီၣ်ကးဟ့ၣ်တၫ်ဆီၣ်သနံး တဲပျံၤတဲဖုးဃာ်၀ဲအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အိၣ်န့ၣ်လီၤ.
Ref: Ayeyarwaddy Times
