လါယနူၤအါရံၤ(၁၆)သီ,၂၀၂၅နံၣ်
ကီၫ်ကရ့ၣ်နံၣ်,ဒံမီဆိၣ်ကီၫ်ဆၣ်အမုၫ်ထီၣ်ဟီၣ်က၀ီၤအပူၤ ဖဲမဟါနံၤ မုၫ်ဆါ(၁)နၣ်ရံၣ်ဃၣ်ဃၣ်အကတီၫ် ကလံၤကျါတၫ်ဒုးခးလီၤတၫ်အဃိ ကမျၢၫ်ဘၣ်သံ(၃)ဂၤဒီးဘၣ်ဒိဘၣ်ထံး(၄)ဂၤအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး(လီၫ်ခၢၣ်သး) တၫ်ကစီၣ်ဒီးတၫ်ဘိးဘၣ်ရၤလီၤ ပှၤဘၣ်မူဘၣ်ဒါ တၫ်အဲၣ်ဆိ တဲ၀ဲလီၤ.
ဖဲမဟါနံၤလၢလီၤဘၣ်(၇၃)၀ီတ၀ီ ကယါကီၫ်စဲၣ်မုၫ်နံၤ တၫ်ကလဲၤထီၣ်အဂီၫ် ဖဲသုးရိၣ်မဲခိၣ်ကျၢၫ်ခံ စိ၀့ ဟဲတုၤဖဲ ၀့ၫ်လွဲၫ်ကီၫ်အကတီၫ် ခးလီၤ၀ဲဒ်သိးအံၤန့ၣ်လီၤ.
ကလံၤကျါတၫ်ဒုးခးလီၤတၫ်အဃိ ပိာ်မုၣ်(၂)ဂၤဒီးပိာ်ခွါ(၁)ဂၤ ဘၣ်သံ၀ံၤ,(၄)ဂၤန့ၣ် ဘၣ်ဒိးကူစါညါဘျါအသး လၢတၫ်ဆါဟံၣ်န့ၣ်လီၤ.
“သုးခိၣ်နၫ်တဖၣ်မ့ၫ်ဟဲတဘျီလၫ်လၫ်န့ၣ် ပထံၣ်ဘၣ်လၢ သုးကီၣ်ကးအသုးဖိတဖၣ် မၤသံ၀ဲကမျၢၫ်တဖၣ် န့ၣ်လီၤ.သုးကီၣ်ကးန့ၣ် ဆိကမိၣ်၀ဲဒၣ်ထဲ ကပညိၣ်ဒုးဃီၤ ကမျၢၫ်တဖၣ်လီၤအဂ့ၫ်”တၫ်အဲၣ်ဆိ တဲ၀ဲလီၤ.
သုးကီၣ်ကးန့ၣ် လဲၤတ့ၫ်လီၤမ့ၣ်ပိၫ် ဖဲဒံမီဆိၣ်ကီၫ်ဆၣ်အမုၫ်ထီၣ် ဘိၣ်လယါဒီးဒီဆိၣ်ခူၣ်သ၀ီ၀ံၤ တၫ်သံတၫ်ပှၫ် န့ၣ် မ့ၫ်ဖဲဒီဆိၣ်ခူၣ်သ၀ီန့ၣ်လီၤ.
ဖဲလါယနူၤအါရံၤ(၁၄)သီအနံၤ မုၫ်နၤအကတီၫ်စ့ၫ်ကီး သုးကီၣ်ကးလဲၤခးလီၤတၫ်လၢကလံၤကျါ ဖဲဖယါနံၣ် ဒီးပဒါည့သ၀ီဘၣ်ဆၣ် တၫ်သံတၫ်ပှၫ်တအိၣ်ဘၣ်.
ဖဲသုးရိၣ်မဲခိၣ်ကျၢၫ်ခံ စိ၀့ အီၣ်ဟါတၫ်အီၣ် ဖဲ၀့ၫ်လွဲၫ်ကီၫ်,ကီၫ်စဲၣ်ဘျီၣ်ရီဖှိၣ်ပူၤအကတီၫ် တၫ်ပၢၫ်ဆၢဂံၫ်ဘါ ကရၢတကပၤ ခး၀ဲဒီး (၁၀၇)မမ မျိာ်သၣ်(၄)ဖျၢၣ်အဂ့ၫ် ဘိးဘၣ်ရၤလီၤဃာ်၀ဲလီၤ.
Ref: The Irrawaddy
