လါယနူၤအါရံၤ(၁၄)သီ,၂၀၂၅နံၣ်
၂၀၂၅နံၣ်, လါယနူၤအါရံၤ(၁၀)သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၂), တီအူကီၢ်ရ့ၣ်, ဒီၣ်ဖးခိၣ်ကီၢ်ဆၣ်,တီအူဒီၣ်ဖးခိၣ်ကျဲမုၢ်(၆)မံၤလၤအပူၤတၢ်ဒုးကဲထီၣ်သးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးရ့ၣ်(၅)သုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤအဃိသုးကီၣ်ကးအသုးသံ၀ဲ(၃)ဂၤဒီးတၢ်မၤန့ၢ်စ့ၢ်ကီးစုက၀ဲၤသၢခိၣ်ဒီးကျိချံ ပှၥ်သၣ်တဖၣ်အဂ့ၢ် သုးက့(၂) သုးရ့ၣ်(၅)တၢ်ကစီၣ်ဂံၢ်ထံးလၢ အမ့ၢ်Thawthikho ပၥ်ဖျါဃၥ်၀ဲ တၢ်ကစီၣ်န့ၣ်လီၤ.
လါယနူၤအါရံၤ(၁၀)သီအနံၤ, မုၢ်ထူၣ်(၁၂)နၣ်ရံၣ်အဆၢကတီၢ် တီအူဒီၣ်ဖးဒိၣ် ကျဲမုၢ်အဖီခိၣ် သုးက့နီၣ်ဂံၢ်(၂) (KNLA)သုးရ့ၣ်(၅)ဒီးသုးပၥ်ဖှိၣ် မၤတၢ်သမံသမိးအဆၢကတီၢ် သုးကီၣ်ကးအသုးသုးရ့ၣ်(၃၉)က့ၤဆူ ဘယ့းနီၣ်သုး၀့ၢ်ကတီၢ် ဟဲက့ၤတုၤဖဲ(၆)မံၤလၤအပူၤ တၢ်ဘၣ်သဂၢၢ်ခးလိၥ်သးအိၣ်ထီၣ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ဘၣ်သဂၢၢ်ခးလိၥ်သးအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ဘၣ်သံ၀ဲ(၃)ဂၤဒီး တၢ်မၤန့ၢ်စ့ၢ်ကီး M3 စုက၀ဲၤ(၃)ခိၣ်, ကျိဆၣ်ဒၢ(၉)ဒၢ, ကျိချံ(၂၀၀)ဖျၢၣ်, သုးဂ့ၢ်၀ီတၢ်ပီးတၢ်လီတဖၣ်အသိး တၢ်မၤဟးဂီၤကွံၥ်စ့ၢ်ကီး သိလ့ၣ်(၁)ခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒီၣ်ဖးခိၣ်ကီၢ်ဆၣ်, တီအူဒီၣ်ဖးခိၣ် ကျဲမုၢ်အဖီခိၣ် သ၀ီတဖၣ်အပူၤ သုးကီၣ်ကးအသုးကျိၤတဖၣ်အိၣ်၀ဲထီဘိလီၤဒီး ပၥ်လီၤခူသူၣ်ဃၥ် အသုးလၢကျဲမုၢ်အဖီခိၣ် သ၀ီတဖၣ်ပူၤအဂ့ၢ်, သုးကျိၤတနီၤန့ၣ် သုးအဂံၢ်အဘါအိၣ်(၈၀-၁၀၀)ညါအဂ့ၢ် သုးက့(၂) သုးရ့ၣ်(၅)တၢ်ကစီၣ် ပှၤဘၣ်မူဘၣ်ဒါ စံး၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၂), တီအူကီၢ်ရ့ၣ်အပူၤ (KNLA)တီခိၣ်ရိၥ်မဲတၢ်ပၢၢ်ဆၢသုးပၥ်ဖှိၣ် မၤ၀ဲဒုးယၤရဲၣ်ကျဲၤတဖၣ်၀ံၤ မ့မ့ၢ်လၢ သုးကီၣ်ကးအသုးတဖၣ်တခီ ဘၣ်ဒိးသန့ၤထီၣ်သးလၢ၀့ၢ်ဒီး ဘၣ်ဟူးဂဲၤ၀ဲသုးဂ့ၢ်၀ီအဂ့ၢ်, သုးကီၣ်ကးသုးကျိၤတဖၣ် ဟူးဂဲၤသုးဂ့ၢ်၀ီလၢ သ၀ီတဖၣ်တန့ၢ်လၢၤဘၣ်ဒီး ထုးကွံၥ်အသုးကလၢၤတဖၣ်ကယီကယီအဂ့ၢ် တၢ်သ့ၣ်ညါဘၣ်န့ၣ်လီၤ.
