လါယနူၤအါရံၤ(၁၀)သီ,၂၀၂၅နံၣ်
ကၠီၣ်တဲၣ်ပၢၤကီၢ် မၤပူၤဖျဲးထီၣ် တရူးခွါဂဲၤဒိလၢအမ့ၢ် Xingxing၀ံၤအလီၢ်ခံ လါဒံၣ်စ့ဘၢၣ်အတီၢ်ပူၤန့ၣ် တရူး Model Yang Zeqi လီၤမၣ်ကဒီးဖဲ ကၠီၣ်တဲၣ်-ပယီၤကီၢ်ဆၣ်ပူၤအဃိ ကၠီၣ်တဲၣ်ပၢၤကီၢ်တဖၣ် လူၤဃုကွၢ်သမံးသမိး၀ဲအဂ့ၢ် ပၢၤကီၢ်ခိၣ်ကျၢၢ် Pol General Thatchai Pitaneelaboot စံး၀ဲန့ၣ်လီၤ.
World Forum Facebook လံၥ်ကဘျံးပၤအပူၤ တၢ်ပၥ်ဖျါထီၣ်အဖီခိၣ် Yang Zeqi န့ၣ် ဒိးန့ၢ်ဘၣ် လံၥ်တၢ်ဒုးသ့ၣ်ညါလၢ တၢ်တူၢ်လိၥ်အီၤ auditionအဂီၢ်လၢ WeChatတဆီ၀ံၤအလီၢ်ခံ ဖဲလါဒံၣ်စ့ဘၢၣ်(၂၀)သီအနံၤန့ၣ် အိၣ်ဟးထီၣ်၀ဲလၢ Beijing Daxing International Airport ဒီးဟဲတုၤ၀ဲဆူ Suvarnabhumi Airportန့ၣ်လီၤ.
အိၣ်ဟးထီၣ်၀ဲဒီးသိလ့ၣ်တခိၣ်လၢ ကဘီယူၤသန့၀ံၤအလီၢ်ခံ ဒိးထီၣ်ကဒီးသိလ့ၣ်တခိၣ်လၢ ကၠီၣ်တဲၣ်-ပယီၤကီၢ်ဆၢ တၢ်ဂီၤမူကရၢရဲၣ်ကျဲၤအီၤဒီး လဲၤကဒီးဆူညါန့ၣ်လီၤ.
လါဒံၣ်စ့ဘၢၣ်(၂၁)သီအနံၤန့ၣ် သါသးဟးဂီၤအဂ့ၢ် ဆှၢ၀ဲ Message ဆူအသကိးတဖၣ်အအိၣ်၀ံၤ လါဒံၣ်စ့ဘၢၣ်(၂၉)သီအနံၤန့ၣ် စံးကတိၤတၢ်ဒီးအမိၢ်လီၢ်ခံကတၢၢ်တဘျီအဂ့ၢ်, ဖဲစံးကတိၤတၢ်ဒီးအမိၢ်အဆၢကတီၢ် ကူသိးဃၥ်၀ဲ ဆ့ကၤအသူဒီးဆ့ၣ်နီၤ၀ဲလၢ လီၢ်ဆ့ၣ်နီၤအဖီခိၣ် ဒီး မဲၥ်ချံအနၢၣ်န့ၣ် တၢ်ထံၣ်အီၤ တၢ်ဘၣ်ဒိဘၣ်ထံးတခါဘၣ်ဆၣ် စံး၀ဲအမိၢ်လၢ သါအိၣ်ဘၣ်လၢတၢ်ဘံၣ်တၢ်ဘၢအိၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲ၀ံၤအလီၢ်ခံ Zeqi အလီတဲစိပ့းကွံၥ်အသးဒီး တၢ်ဆဲးကျိးတန့ၢ်လၢၤဘၣ်အဃိ အဟံၣ်ဖိဃီဖိတဖၣ် ဃ့တၢ်မၤစၢၤလၢ တရူးပၢၤကီၢ်တကးဘၣ် ဃ့းစ့ၢ်ကီဒီးလၢ မီၢ်သီ၀ဲၤဒၢးလၢအိၣ်ဖဲ ကၠီၣ်တဲၣ်ဒီးပယီၤ ကီၢ်ပူၤအဂ့ၢ်န့ၣ်လီၤ.
တၢ်မၤပူၤဖျဲးထီၣ် တရူးခွါဂဲၤဒိ Xingxing၀ံၤအလီၢ်ခံ ကီၢ်တရူးအပူၤ တၢ်ဂီၤမူတၢ်ဂဲၤဒိပှၤတ၀ၢအပူၤ ပှၤလၢဘၣ်တၢ်ကူလဲၤမၤကၤအီၤအဂၤ အဟံၣ်ဖိဃီဖိတဖၣ်စ့ၢ်ကီး မၤဖျါထီၣ်၀ဲတဖၣ်အိၣ်၀ဲန့ၣ်လီၤ.
