လါယနူၤအါရံၤ(၁၀)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၃),ကီၢ်ရ့ၣ်ချၢၣ်လွံၢ်ထူၣ်,လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ဖဲအပူၤကွံၥ်လါယနူၤအါရံၤ(၆)သီအနံၤန့ၣ် သုးကီၣ်ကးအစုတီၤဖီလၥ်(ခလရ၂၈၈)အပှၤသုးဖိ(၂)ဂၤဟဲဟ့ၣ်လီၤသးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အအိၣ်ဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ်န့ၣ် ကီၢ်ဆၣ်လၢၢ်ဒိၣ်ပှၤကတိၤတၢ်ပၢ ပဒိၣ်စီၤ၀ါမုၢ် စံးဘၣ် R2K န့ၣ်လီၤ.
အ၀ဲစံး၀ဲလၢ” လါယနူၤအါရံၤ(၆)သီအနံၤန့ၣ် ဒုၣ်ဒါအသုးလၢအမ့ၢ်၀ဲဒၣ် (ခလရ-၂၈၈)အပှၤသုးဖိ(၂)ဂၤန့ၣ် ဟဲဟ့ၣ်အသးလၢ လၢၢ်ဒိၣ်ကီၢ်ဆၣ်,သုးရ့ၣ်(၉) ဒီး ဒ်သုးလၢ ဟဲဟ့ၣ်လီၤအသး တၢ်ပၥ်ပနီၣ်၀ဲဒၣ် တၢ်သိၣ်တၢ်သီတၢ်ဘျၢအသိးန့ၣ် ပအံးထွဲကွၢ်ထွဲအီၤဂ့ၤဂ့ၤဘၣ်ဘၣ်လီၤအဂ့ၢ်”န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအပှၤသုးဖိ(၂)ဂၤလၢဟဲဟ့ၣ်လီၤအသးအံၤ ခီဖျိဟဲစိၥ်ဃုၥ်ဒီးတၢ်စုကဝဲၤဒ်အမ့ၢ်(MA1၁ခိၣ်,MA3၁ခိၣ်,ကျိဆၣ်ဒၢ(၈)ဘ့ၣ်,ကျိချံအဖျၢၣ်(၂၀၀)သ့ၣ်တဖၣ်အဃိ တၢ်ဟ့ၣ်လၤကပီၤ၀ဲစ့ပယီၤအကလီၢ်(၁၀)ကၠး တဂၤစုၥ်စုၥ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိးသုးလၢဟဲဟ့ၣ်လီၤအသးတဖၣ် တၢ်အံးထွဲကွၢ်ထွဲအီၤဒ်တၢ်ပၥ်ပနီၣ်ဃၥ်တၢ်သိၣ်တၢ်သီတၢ်ဘျၢ, ဂ့ၤဂ့ၤဘၣ်ဘၣ်အဂ့ၢ်လၢၢ်ဒိၣ်ကီၢ်ဆၣ် ပှၤဘၣ်မူဘၣ်ဒါစံး၀ဲန့ၣ်လီၤ.
လၢန့ၣ်အမဲၥ်ညါ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ စးထီၣ်လၢလါဒံၣ်စ့ဘၢၣ်(၁)သီတုၤ(၃၁)သီအနံၤ (၁)လါအတီၢ်ပူၤ ခီဖျိသုးမီၤစိရိၤအသုး တၢ်မၤကမၣ်ပှၤဂ့ၢ်၀ီခွဲးယၥ်တဖၣ်ဒ်အမ့ၢ် ခးကျိဖးဒိၣ်, ဒြိတၢ်ဒုး, ဒိးလီၤမ့ၣ်ပိၢ်ဒီးဖီၣ်န့ၢ်ဆူၣ်ကမျၢၢ်တဖၣ်အဃိ လီၢ်က၀ီၤကမျၢၢ်ဘၣ်သံ၀ဲ(၈)ဂၤ, ဘၣ်ဒိ၀ဲ(၃၃)ဂၤ, ဖီၣ်န့ၢ်ဆူၣ်ကမျၢၢ်(၁၀)ဂၤ, ဟံၣ်ဘၣ်ဟးဂီၤကွံၥ်၀ဲ(၂၂)ဖျၢၣ်, ကၠိဟးဂီၤ(၁)ဖျၢၣ်ဒီး တၢ်ဘါသရိၥ်ဘၣ်ဟးဂီၤကွံၥ်(၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ သုးကီၣ်ကးအသုးတဖၣ် မၤပှဲၤအါထီၣ်သုးအဂံၢ်အဘါအိၣ်၀ဲအသိး ဟူးဂဲၤအါထီၣ်၀ဲ သုးဂ့ၢ်၀ီတၢ်ဟူးတၢ်ဂဲၤတဖၣ်အဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
