လါယနူၤအါရံၤ(၉)သီ,၂၀၂၄နံၣ်
အ့ၣ်ယၣ်၀တံၣ်ကီၢ်ခီ, ဘိၣ်ကလ့ကီၢ်ဆၣ်အပူၤ သုးကီၣ်ကးအစုတီၤဖီလၥ် က၀ီၤဒ့ပၢပြးခိၣ်နၢ်တဖၣ် တဲ၀ဲလၢကမျၢၢ်တၢ်ဘၣ်ကဲသုးအဂီၢ်၀ံၤ ဃ့န့ၢ်ဆူၣ်ကျိၥ်စ့တဖၣ်အိၣ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
ဘိၣ်ကလ့၀့ၢ် က၀ီၤဒ့(၁)ပၢပြးခိၣ်လၢအမ့ၢ်အူပံးစံးန့ၣ် တဲ၀ဲလၢကမျၢၢ်တၢ်ဘၣ်ကဲသုးအဂီၢ်၀ံၤ တဲပျံၤတဲဖူးဃ့န့ၢ်ဆူၣ်၀ဲကျိၥ်စ့လၢ က၀ီၤဒ့ပူၤ တၢ်မၤလီၢ်ပှၤမၤတၢ်ဖိတဖၣ်အအိၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
“ဟဲနးဒိၣ်ထီၣ်လံ တဲ၀ဲလၢကမျၢၢ်တၢ်ဘၣ်ကဲသုးအဂီၢ်၀ံၤ မၤနၢၤအီၣ်ဃီၣ်ဃ့န့ၢ်ဆူၣ်ကျိၥ်စ့လၢ ပှၤမၤတၢ်ဖိတဖၣ်အအိၣ်န့ၣ် တစှၤလၢၤဘၣ်. လၢအပူၤကွံၥ်ဒၢး ဃ့ကျိၥ်စ့, အခဲအံၤဒၢး ဃ့စ့ၢ်ကီးလီၤ. အခဲန့ၣ်တူၢ်တန့ၢ်ကီၤတန့ၢ်လၢၤဘၣ်. အ၀ဲသ့ၣ်မၤ၀ဲဒ် အတၢ်ဘၣ်သးအသိးအဂ့ၢ်” က၀ီၤဒ့(၁)အိၣ် လီၢ်က၀ီၤဖိတဂၤ စံး၀ဲန့ၣ်လီၤ.
ပှၤမၤတၢ်ဖိလၢ စဲးဖီကဟၣ်တၢ်မၤလီၢ်ပူၤတဂၤန့ၣ် တၢတ၀ီဘၣ်ဟ့ၣ်၀ဲ(၁)ကလီၢ်ကၠး၀ံၤ ခံ၀ီတ၀ီန့ၣ် ဃ့၀ဲ(၅)ကလးကၠးအဂ့ၢ် ပှၤဘိၣ်ကလ့၀့ၢ်ဖိတဂၤ စံး၀ဲန့ၣ်လီၤ.
က၀ီၤဒ့ပၢပြးခိၣ်လၢအမ့ၢ် အူပံးစံးန့ၣ် မ့မ့ၢ်လၢ အဘူးအတံၢ်တဖၣ်တခီ တဃ့ကျိၥ်စ့ဘၣ်ဒီး ဃ့န့ၢ်ဆူၣ်ကျိၥ်စ့လၢထဲဒၣ်လၢ စဲးဖီကဟၣ်တၢ်မၤလီၢ်ပှၤမၤတၢ်ဖိအအိၣ်လီၤအဂ့ၢ် ပှၤဘိၣ်ကလ့၀့ၢ်ဖိစံး၀ဲန့ၣ်လီၤ.
က၀ီၤဒ့ပၢပြးခိၣ်လၢအမ့ၢ် အူပံးစံးန့ၣ် အမူဒါလီၢ်လၤအသးသမူ ကကတၢၢ်ကွံၥ်လၢ လါယနူၤအါရံၤလါလၢၤ၀ံၤ ဒ်သိးကမၤဘၣ်၀ဲဒ်ဆူညါအဂီၢ် ဟ့ၣ်ခိၣ်ဖးလၥ်ဆိးကျိၥ်စ့ဆူ သုးကီၣ်ကးအသုးလီၢ်လၤအိၣ်တဖၣ်အအိၣ်အဂ့ၢ် စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီအပူၤ သုးကီၣ်ကးအစုတီၤဖီလၥ် က၀ီၤဒ့ဒီးဒူသ၀ီပၢပြးခိၣ်အါတက့ၢ်န့ၣ် စးထီၣ်လၢ၂၀၂၄နံၣ်, လါအီးကထိဘၢၣ်န့ၣ် တဲ၀ဲလၢကမျၢၢ်တၢ်ဘၣ်ကဲသုးအဂီၢ်၀ံၤ တဲပျံၤတဲဖူးဃ့န့ၢ်ဆူၣ်ကျိၥ်စ့တဖၣ် အိၣ်အါထီၣ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီအပူၤ ကီၢ်ဆၣ်အိၣ်၀ဲ(၂၆)ဘ့ၣ်၀ံၤ လၢကီၢ်ဆၣ်တဘ့ၣ်စုၥ်စုၥ်အပူၤန့ၣ် ထၢန့ၢ်ဆူၣ်သုးလၢကျိၤကျဲၤကလုၥ်ကလုၥ်၀ံၤ ဆှၢ၀ဲဆူသုးတၢ်သိၣ်လိလီၢ်တဖၣ်ဒီး တၢ်သိၣ်လိမ့ၢ်၀ံၤအလီၢ်ခံန့ၣ် တၢ်ဆှၢအီၤဆူ တၢ်မဲၥ်ညါတၢ်ဒုးပျီတဖၣ်အိၣ်၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးသုးပူၤတၢ်ကစီၣ်အအိၣ်န့ၣ်လီၤ.
Ref: Ayeyarwaddy Times
