လါယနူၤအါရံၤ(၉)သီ,၂၀၂၅နံၣ်
သုးကီၣ်ကးသုးကျိၤလၢ ကဟဲမၤစၢၤဆူ အနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤလၢအိၣ်ဖဲ လၢၢ်ကတံၥ်-ဃိၣ်သၢဖျၢၣ်ကျဲမုၢ်အဖီခိၣ်အံၤ ဘၣ်တၢ်ဒုးအီၤအဃိ သုးကီၣ်ကးအပှၤသုးဖိဘၣ်သံ၀ဲ(၄၀)ဂၤဒီး ဒုးယၤခိၣ်ပၥ်ဃုၥ် သုးကျိၤအံၤလီၤပြံးလီၤပျါဃ့ၢ်ပဒ့ၣ်သးအဂ့ၢ် (SOF)ပှၤဘၣ်မူဘၣ်ဒါ စံး၀ဲန့ၣ်လီၤ.
တၢ်ကထီၣ်ဒုးမၤန့ၢ်အနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအဂီၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်တဖၣ် က၀ီၤကးတံၥ်ဒုးအီၤအဃိ သုးကီၣ်ကးအသုးကျိၤလၢကဟဲမၤစၢၤအံၤ ဖဲလၢဟဲထီၣ်၀ဲအဆၢကတီၢ် KNLAဒီးသုးပၥ်ဖှိၣ်တဖၣ် ခိးဒုးအီၤလၢကျဲတီၤန့ၣ်လီၤ.
တၢ်ဒုးအပူၤ သုးကီၣ်ကးအပှၤသုးဖိဘၣ်သံ၀ဲ(၄၀)ဂၤ၀ံၤ တၢ်မၤန့ၢ်စ့ၢ်ကီး စုက၀ဲၤ(၃၀)ဘျဲၣ်န့ၣ်လီၤ. သုးကီၣ်ကးသုးကျိၤလၢအဟဲထီၣ်အံၤ ဘၣ်တၢ်ဒုးအီၤ၀ံၤအလီၢ်ခံ က့ၤဂုၥ်က့ၤအခံလီၤပြံးလီၤပြါဒီး ဒုးယၤခိၣ်သီပၥ်ဃုၥ် အပှၤသုးဖိ(၃၀)ဂၤတခီ လဲၤနုၥ်လီၤဆူ အနါကွ့သုးတၢ်တိၥ်ကူၣ်ကျဲၤခိၣ်သ့ၣ်ပူၤလံန့ၣ်လီၤ.
ခံခီခံကပၤတၢ်ဒုးအပူၤ သုးကီၣ်ကးတပၤ မၤစၢၤ၀ဲလၢ ဟီၣ်ခိၣ်မဲၥ်ဖံးခိၣ်အိၣ်အသိး ကလံၤကျါစ့ၢ်ကီး မၤစၢၤ၀ဲန့ၣ်လီၤ.
တၢ်ဒုးအပူၤ တၢ်ပၢၢ်ဆၢသုးပၥ်ဖှိၣ်တပၤ ဘၣ်သံ၀ဲ(၃)ဂၤဒီးဘၣ်ဒိ၀ဲ(၁၀)ဂၤန့ၣ်လီၤ. လၢၢ်ကတံၥ်-ဃိၣ်သၢဖျၢၣ်ကျဲမုၢ်အဖီခိၣ် ခီဖျိအနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအိၣ်အဃိ ဘၣ်ယိၣ်၀ဲလၢ တၢ်လ့ၤလိၤဟးထီၣ်အဂီၢ်အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
အနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤ သုတလီၤအဂီၢ် သုးကီၣ်ကးတပၤ ခးစၢၤ၀ဲလၢဟီၣ်ခိၣ်မဲၥ်ဖံးခိၣ်အိၣ်အသိး ခးစၢၤ၀ဲစ့ၢ်ကီးလၢ ကလံၤကျါအဃိ သ၀ီလၢအိၣ်ဘူးဒီးဖဲန့ၣ်တဖၣ်ဒ်အမ့ၢ် အနါကွ့, လိးရှါ,တည့ၣ်, ဖၣ်ယၣ်,ကၠါမံ, ဖါပၠးသ၀ီတဖၣ် ဘၣ်လဲၤအိၣ်ကဒုအသးဆူ အဘူးအတံၢ်တဖၣ်အိၣ်သ၀ီတဖၣ်အဂ့ၢ် စံး၀ဲန့ၣ်လီၤ.
Ref: DVB
